តុលាការ​ខេត្ត​ក្រចេះ ចោទប្រកាន់ និង​ឃុំខ្លួន​បុរស​តំណាង​អ្នក​ភូមិ​ម្នាក់ តវ៉ា​រឿង​ដីធ្លី​

ប្រជាពលរដ្ឋ​ប្រឈមមុខ​ជាមួយ​កម្លាំងប្រដាប់អាវុធ​ក្នុង​រឿង​ទំនាស់​ដីធ្លី ជាមួយ​ក្រុមហ៊ុន​ដាយ​ណា​មមកពី​ប្រទេស​វៀតណាម​នៅ​ស្រុក​ស្នួល​

ថ្ងៃទី 5 មីនា 2013 | ដោយ: ចិត្របុរី
Cambodia Express News

 

ខេត្តក្រចេះ: រហូត​ដល់​ព្រលប់​ថ្ងៃទី​៤ ខែ​មីនា ឆ្នាំ​២០១៣ ចៅក្រម​ស៊ើបសួរ​របស់​តុលាការ សាលាដំបូង​ខេត្តក្រចេះ លោក ចុក ងួន បាន​សម្រេច​ឃុំខ្លួន​បុរស​តំណាង​អ្នក​ភូមិ​ម្នាក់ ដែល​បាន​តវ៉ា​ដីធ្លី នៅ​ស្រុក​ស្នួល​។ ដីកា​ឃុំខ្លួន​បុរស​នោះ ធ្វើឡើង​តាម​ការចោទប្រកាន់​ពីបទ ឆបោក ដែល​ចេញ​ដោយ​លោក ហាក់ ហ៊​ន់ ព្រះរាជអាជ្ញារង តុលាការ​ខេត្ត​ក្រចេះ​។​

​សូម​រម្លឹកថា ទំនាស់​ដីធ្លី​រវាង​ពលរដ្ឋ និង​ក្រុមហ៊ុន​ដាយ​ណា​មមកពី​ប្រទេស​វៀតណាម​ បាន​វិវត្តន៍​មួយ​ជំ​ហ៊ាន​ទៀត ដោយ​ប៉ូលិស​បាន​ឃាត់​ខ្លួន​តំណាង​ពលរដ្ឋ​ម្នាក់ កាលពី​វេលា​ម៉ោង​ជិត ១២ ថ្ងៃត្រង់ ថ្ងៃទី​៤ ខែ​មីនា ឆ្នាំ​២០១៣ នៅពេលដែល​តំណាង​នោះ យក​ឯកសារ​ពាក់ព័ន្ធ​ដីធ្លី ទៅ​ដាក់​នៅ​សាលា​ស្រុក​ស្នួល ខេត្ត​ក្រចេះ​។​
​ប៉ូលិស​ចោទថា បុរស​តំណាង​នោះ ជា​មេខ្យល់ ដើរ​ប្រមូល​ប្រាក់​ពី​អ្នកស្រុក និង​បំផុសបំផុល​ឲ្យ​អ្នកភូមិ​តវ៉ា ទាមទារ​ដីធ្លី​ពី​ក្រុមហ៊ុន ដាយ​ណា​ម ដែល​មកពី​ប្រទេស​វៀតណាម​។ ប៉ូលិស​អះអាង​ថា មាន​ពាក្យបណ្តឹង​ពី​ប្រជាពលរដ្ឋ ៣ នាក់ ដែល​បាន​ប្តឹង​បុរស​នោះ​។​

​បុរស​ដែល​ត្រូវ​ចាប់ខ្លួន ហើយ​ត្រូវបាន​គេ​អះអាង​ថា ជា​តំណាង​អ្នកភូមិ​តវ៉ា​ដីធ្លី​នោះ ឈ្មោះ សឿន ផល អាយុ ៣៣​ឆ្នាំ រស់នៅ​ភូមិ​ឃ្សឹ​ម ក្នុង​ឃុំ​ឃ្សឹ​ម ស្រុក​ស្នួល ខេត្ត​ក្រចេះ​។​

​សូម​រម្លឹកថា កាលពី​ថ្ងៃ​ទី​១ ខែ​មីនា ឆ្នាំ​២០១៣ ប្រជាពលរដ្ឋ​ជា​ច្រើនសិប​នាក់ បាន​ព្យាយាម​ចូល​ទៅ​កាន់កាប់​ដីធ្លី ក្នុង​ដី ដែល​គេ​អះអាងថា ជា​របស់​ក្រុមហ៊ុន ដាយ​ណា​ម នៅ​ឃុំ​ឃ្សឹ​ម ស្រុក​ស្នួល រហូត​ដល់​អាជ្ញាធរ បាន​ដាក់​កម្លាំង​ប្រដាប់អាវុធ មក​រារាំង​ក្រុម​ប្រជាពលរដ្ឋ​។ តែ​មិន​មាន​អំពើហិង្សា កើតមាន​ទេ​។ ​ប្រជាពលរដ្ឋ​សំអាងថា ក្រុមហ៊ុន​ឈូស​ដី​លើ​ដី​ចំការ​របស់​ពួកគាត់​។​

​ក្នុងពេល​តវ៉ា​កាលណោះ លោក ខណ្ឌ ចំណាន អភិបាលរង​ខេត្ត​ក្រចេះ បាន​ចុះ​ជួប​ប្រជាពលរដ្ឋ និង​បាន​សន្យាថា នឹង​ធ្វើការ​ដោះស្រាយ​ជាមួយ​ពលរដ្ឋ ក្នុង​រយៈពេល ៥​ថ្ងៃ​ខាង​មុខ ទើប​ក្រុមអ្នកតវ៉ា ព្រម​រំសាយ​។ ឥឡូវនេះ តំណាង​របស់​ពួក​គាត់​ម្នាក់ បែរជា​ត្រូវ​ប៉ូលិស​ចាប់ខ្លួន មុនពេល​មាន​ការដោះស្រាយ​ទៅវិញ​។​
​រហូតមក​ដល់​ព្រឹក​ថ្ងៃទី​៥ ខែ​មីនា ឆ្នាំ​២០១៣ ការប្រឈមមុខ​រវាង​កម្លាំង​សមត្ថកិច្ច និង​ប្រជាពលរដ្ឋ​តវ៉ា នៅតែ​បន្ត​កើតមាន ពិសេស​ប្រជាពលរដ្ឋ ទាមទារ​ឲ្យ​ដោះលែង​បុរស​តំណាង​ម្នាក់ ដែល​ត្រូវ​ចាប់ឃុំខ្លួន កាលពី​ថ្ងៃ​ទី​៤​មីនា ឆ្នាំ​២០១៣៕