ក្រុម​អ្នកគាំទ្រ​លោក ម៉ម សូណង់ដូ ប្រមូលផ្តុំ​នៅក្រៅ​តុលាការ​សាលាឧទ្ធរណ៍​

ថ្ងៃទី 5 មីនា 2013 | ដោយ: រតនា
Cambodia Express News

ភ្នំពេញ: ប្រជាពលរដ្ឋ​មកពី​សមាគម​អ្នកប្រជាធិបតេយ្យ របស់លោក ម៉ម សូណង់ដូ រាប់រយ​នាក់ បាន​ប្រមូលផ្តុំ លើក​បដា កាន់​រូបលោក​ម៉ម​សូណង់ដូ និង​ស្រែក​មេក្រូ​គាំទ្រ​លោក​ម៉ម​សូណង់ដូ នៅ​ព្រឹក​ថ្ងៃទី​៥ ខែមីនា ឆ្នាំ​២០១៣ ទាមទារ​ឲ្យ​ចៅក្រម​ក្រុមប្រឹក្សា​ជំនុំជម្រះ​សាលាឧទ្ធរណ៍ ពិចារណា​ដោះលែង​លោក ម៉ម សូណង់ដូ ពី​ពន្ធនាគារ ពីព្រោះ​ក្រុម​អ្នកគាំទ្រ អះអាងថា លោក ម៉ម សូណង់ដូ ពុំបាន​ធ្វើអំពើ​ខុសច្បាប់​ទេ​។

​ការប្រមូលផ្តុំ​តវ៉ា​របស់​ប្រជាពលរដ្ឋ​ជាច្រើន​នាក់​នោះ បាន​ធ្វើឡើង​ខណៈដែល​តុលាការ​សាលាឧទ្ធរណ៍ នៅ​ព្រឹក​ថ្ងៃទី​៥ ខែមីនា ឆ្នាំ​២០១៣ បាន​បើកសវនាការ​កាត់ក្តី លើ​ករណី​របស់លោក ម៉ម សូណង់ដូ ដែល​ត្រូវ​តុលាការក្រុង​ភ្នំពេញ សម្រេច​ផ្តន្ទាទោស ដាក់ពន្ធនាគារ ២០ ឆ្នាំ កាលពី​ថ្ងៃទី​១ ខែតុលា ឆ្នាំ​២០១២​។​

​លោកស្រី ឃួន ផាន់​ណា​រី អគ្គលេខាធិការរង សមាគម​អ្នកប្រជាធិបតេយ្យ បាន​មានប្រសាសន៍ប្រាប់​ក្រុមអ្នកកាសែត នៅមុខ​តុលាការ​សាលាឧទ្ធរណ៍​ថា ការជួបជុំ​របស់​ក្រុម​អ្នកគាំទ្រ ទាមទារ​ឲ្យ​តុលាការ​សាលាឧទ្ធរណ៍ ពិចារណា ដោះលែង​លោក ម៉ម សូណង់ដូ ពីព្រោះ​គាត់​បាន​បានធ្វើ​អ្វី​ខុសច្បាប់​ទេ​។​
​លោកស្រី បាន​មានប្រសាសន៍​បន្តថា ប្រជាពលរដ្ឋ​ទាំងនោះ មកពី​បណ្តា​ខេត្ត​នានា ដូចជា កំពង់ចាម កណ្តាល តាកែវ ព្រៃវែង និង​ខេត្តក្រចេះ ជាដើម​។
​លោកស្រី ផាន់​ណា​រី បាន​បន្ថែមថា "​លោក ម៉ម សូណង់ដូ មាន​សុខភាព​ទ្រុឌទ្រោម ទើប​យើង​សុំ​ឲ្យ​តុលាការ ដោះលែង​គាត់​"​។​
​នៅ​ព្រឹក​ថ្ងៃទី​៥ ខែមីនា​នេះ ប្អូនស្រី​ទី​៨ របស់លោក ម៉ម សូណង់ដូ គឺ​លោកស្រី ម៉ម ម៉ាសា​ឌី ក៏បាន​មកពី​ប្រទេស​បារាំង មក​ចូលរួម​តាមដាន​សវនាការ​កាត់ទោស​លោក ម៉ម សូណង់ដូ​ផងដែរ​។ លោកស្រី ម៉ម ម៉ាសា​ឌី បាន​និយាយថា លោកស្រី មានការ​ជឿជាក់ថា តុលាការ​នឹង​ដោះលែង​បងប្រុស​របស់លោក​ស្រី​វិញ ពីព្រោះ​គាត់​អត់​បានធ្វើ​អ្វី​ខុសច្បាប់​ទេ​។​

​នៅ​ព្រឹក​ថ្ងៃទី​៥ ខែមីនា ឆ្នាំ​២០១៣ លោក ម៉ម សូណង់ដូ និង​ពិរុទ្ធជន​ជា​អ្នកភូមិ​ផ្សេងទៀត ត្រូវបាន​គេ​នាំខ្លួន មក​កាត់ទោស នៅ​តុលាការ​សាលាឧទ្ធរណ៍​។ ក្រុម​សកម្មជន​សិទ្ធិ​មនុស្សជាតិ អន្តរជាតិ និង​អ្នកកាសែត​ជាច្រើន​នាក់ បាន​តាមដាន​សវនាកា​រ​នោះ​។​
​លោក ម៉ម សូណង់ដូ ត្រូវបាន​តុលាការ​សាលាដំបូង​រាជធានី​ភ្នំពេញ កាលពី​ថ្ងៃទី​១ ខែតុលា ឆ្នាំ​២០១២ សម្រេច​ផ្តន្ទាទោស​ដាក់ពន្ធនាគារ ២០ ឆ្នាំ និង​ពិន័យ​ជា​ប្រាក់ ១០ លាន​រៀល ពីបទ​ជាប់ពន្ធ​ពាក់​នឹង​ការបង្កើត​តំបន់អបគមន៍ ប្រឆាំង​រាជរដ្ឋាភិបាល តាមរយៈ​ជម្លោះដីធ្លី នៅ​ភូមិ​ប្រ​ម៉ា ខេត្តក្រចេះ​។​
​តាម​គម្រោង​សវនាការ​លើ​ករណី​លោក ម៉ម សូណង់ដូ នៅ​តុលាការ​សាលាឧទ្ធរណ៍ នឹងត្រូវ​ធ្វើឡើង​រយៈពេល ៣ ថ្ងៃ​។ សាក្សី​ក្នុង​រឿង​នឹង ទាំង​សាក្សី​ដាក់បន្ទុក និង​ដោះ​បន្ទុក មាន​ប្រហែលជា ១០ នាក់​។

​មាន​អាយុ ៧១​ឆ្នាំ លោក ម៉ម សូណង់ដូ ត្រូវបាន​ចាប់ខ្លួន​កាលពី​ថ្ងៃទី​១៥ ខែកក្កដា ឆ្នាំ​២០១២ តាមរយៈ​បណ្តឹង​ចោទប្រកាន់​ពីបទ​ញុះញង់​ឲ្យ​មានការ​បង្កើត​តំបន់អបគមន៍​ក្នុងភូមិ​ប្រ​ម៉ា ឃុំ​កំពង់​ដំរី ស្រុក​ឆ្លូង ខេត្តក្រចេះ​។​
​ក៏ប៉ុន្តែ​សហគមន៍​សិទ្ធិ​មនុស្សជាតិ និង​អន្តរជាតិ រួមទាំង​ក្រុម​អ្នកគាំទ្រ​រូបលោក បាន​ច្រានចោល​ការចោទប្រកាន់ ហើយ​ចាត់ទុកថា ជា​រឿង​នយោបាយ និង​ទាមទារ​ឲ្យ​មានការ​ដោះលែង​លោក​ម៉ម​សូណង់ដូ ឲ្យ​មាន​សេរីភាព​ឡើងវិញ​។​
​កាលពី​ថ្ងៃទី​៤ ខែមីនា ឆ្នាំ​២០១៣ អង្គការ​លើកលែងទោស​អន្តរជាតិ Amnesty International បានចេញ​សេចក្តីថ្លែងការណ៍ អំពាវនាវ​ឲ្យ​តុលាការ ដោះលែង​លោក ម៉ម សូណង់ដូ​។​
​យ៉ាងណាក៏ដោយ មន្ត្រី​រដ្ឋាភិបាល​បាន​បដិសេធ និង​ថា សំណុំរឿង​ក្តី​នោះ ស្ថិតនៅក្នុង​ដៃ​តុលាការ ដែល​រាជរដ្ឋាភិបាល មិនបាន​លូកដៃ ជ្រៀតជ្រែក​លើ​រឿងក្តី​បទល្មើស ប្រឆាំងនឹង​ច្បាប់​នោះឡើយ​៕