ស៊ូប៊ែរឌី​កំណត់​ពេល​មក​កម្ពុជា

លោក​សូរិយ៉ា ស៊ូប៊ែ​រឌី ពេល​មក​​បំពេញ​បេសកកម្ម​នៅ​កម្ពុជា​ កាល​ពី​​ឆ្នាំ​​មុន​​​។ រូបថត ហេង ជីវ័ន

Tuesday, 09 April 2013
ABBY SEIFF
ភ្នំពេញប៉ុស្តិ៍

ភ្នំពេញៈ យោង​តាម​មន្រ្តី​អង្គការ​សហប្រជាជាតិ បាន​ឲ្យ​ដឹង​ថា ​លោក សូរីយ៉ា ស៊ូប៊ែរឌី អ្នក​រាយការណ៍​ពិសេស ទទួល​បន្ទុក​សិទិ្ធ​មនុស្ស​ របស់​អង្គការ​សហ​ប្រជាជាតិ​ប្រចាំ​នៅ​កម្ពុជា នឹង​មក​បំពេញ​បេសកកម្ម​នៅ​កម្ពុជា​រយៈ​ពេល ១ សប្តាហ៍ ចាប់​ផ្តើម​នៅ​ថ្ងៃ ទី១៩ ខែ​ឧសភា​ខាង​មុខ។

លោក James Heenan ​មន្រ្តី​ទទួល​បន្ទុក​ការិយាល័យ​ឧត្តម​ស្នងការ​អង្គការ​សហ​ប្រជាជាតិ ទទួល​បន្ទុក​សិទិ្ធ​មនុស្ស​បាន​ថ្លែង​ថា៖ «លោក​សាស្រ្តចារ្យ ស៊ូប៊ែរឌី ​បាន​ចង្អុល​បង្ហាញ​ថា គាត់​នឹង​ផ្តោត​លើ​ការ​អនុវត្តតាម​អនុសាសន៍​ដែល​គាត់​បាន​លើក​ ឡើង​ក្នុង​របាយការណ៍​មុន ព្រម​ទាំង​លើ​កិច្ច​ពិភាក្សា​ជាមួយ​នឹង​រាជ​រដ្ឋាភិបាល​កម្ពុជា សង្គម​ស៊ីវិល និង​ស្ថាប័ន​ដទៃ​ទៀត​ ស្តីពី​ការ​លើក​កម្ពស់​ការ​គោរព​សិទិ្ធ​មនុស្ស ​នៅ​កម្ពុជា»។

ក្នុង​របាយការណ៍​លើក​មុន ​អ្នក​រាយការណ៍​ពិសេស​រូប​នេះ បាន​ជំរុញ​ឲ្យ​ធ្វើ​កំណែ​ទម្រង់​ប្រាកដ​ប្រជា​ លើ​កិច្ច​ដំណើរការ​បោះឆ្នោត និង​ការ​កែប្រែ​ឡើង​វិញ​ នូវ​កិច្ច​ដំណើរ​ការ​ផ្តល់​ដី​សម្បទាន​ដោយ​លោក​ព្រមាន​ថា ​គោល​នយោបាយ​នេះ​ នៅ​ទីបំផុត​នឹង​ប៉ះពាល់​ដល់​ស្ថិរភាព​របស់​ជាតិ។

ក្នុង​រយៈ ពេល​តិច​ជាង ១ ខែ បន្ទាប់​ពី​លោក​ បាន​បង្ហាញ​របាយការណ៍ ទៅ​ក្រុម​ប្រឹក្សា​សិទិ្ធ​មនុស្ស​អង្គការ​សហប្រជាជាតិ លោក​នាយក​រដ្ឋ​មន្រ្តី ហ៊ុន សែន បាន​រិះគន់​លោក​សាស្ត្រាចារ្យ​សាកល​វិទ្យាល័យ Leeds ​រូប​នេះ។

ក្នុង​សុន្ទរកថា កាល​ពី​ខែ​តុលា ឆ្នាំ​មុន​លោក​នាយក​រដ្ឋ​មន្រ្តីហ៊ុន សែន បាន​ហៅ​អនុសាសន៍​ទាំង​នោះ​ថា​ គ្មាន​មូលដ្ឋាន ហើយ​លើក​ឡើង​ថា អនុសាសន៍​ទាំង​នោះ ​ពឹង​ផ្អែក​ខ្លាំង​ទៅ​លើ​ព័ត៌មាន ពី​អង្គ​ការ​ក្រៅ​រដ្ឋាភិបាល និង​បក្ស​ប្រឆាំង៕