ដោយ ស៊ុន ណារិន
ថ្ងៃព្រហស្បតិ៍ ទី20 មិថុនា ឆ្នាំ2013 ម៉ោង17:57 VOD
ក្រសួងការបរទេសសហរដ្ឋអាមេរិក កាលពីថ្ងៃពុធ
ព្រមានក្នុងរបាយការណ៍ជួញដូរមនុស្សរបស់ខ្លួនថា
នឹងដាក់កម្ពុជាក្នុងបញ្ជីខ្មៅនៃការជួញដូរមនុស្ស
ប្រសិនបើការប្រយុទ្ធប្រឆាំងនៃការជួញដូរមនុស្ស
បន្តធ្លាក់ចុះតទៅទៀត។
របាយការណ៍សម្រាប់ឆ្នាំ២០១៣ ចេញផ្សាយនៅខែមិថុនានេះ បង្ហាញថា
ប្រទេសកម្ពុជា នៅចំណាត់ថ្នាក់លេខរៀងទីពីរ ដែលមានន័យថា កម្ពុជា
ជាកន្លែងឆ្លងកាត់ និងគោលដៅនៃការជួញដូរមនុស្ស
និងការបង្ខំពលកម្ម។ របាយការណ៍បន្តថា
ប្រសិនបើមានការធ្លាក់ចុះជាងនេះទៀត
កម្ពុជានឹងត្រូវបានដាក់បញ្ចូលក្នុងបញ្ជីខ្មៅសម្រាប់ប្រទេស
ដែលមិនបានបំពេញស្តង់ដារអប្បបរមា
និងមិនបានបំពេញកិច្ចប្រឹងប្រែងសំខាន់
ក្នុងការប្រយុទ្ធប្រឆាំងនឹងការជួញដូរមនុស្ស។
របាយការណ៍របស់អាមេរិក ឲ្យដឹងទៀតថា បញ្ហាអំពើពុករលួយ
ក្នុងចំណោមមន្ត្រីពង្រឹងច្បាប់
និងកង្វះការការពារគ្រប់គ្រាន់សម្រាប់ស្ត្រី បុរស និងក្មេង
ដែលត្រូវបានជួញដូរផ្លូវភេទ និងការបង្ខំពលកម្ម
នាំឲ្យមានវប្បធម៌និទណ្ឌភាព សម្រាប់អ្នកជួញដូរមនុស្ស
និងការបដិសេធទៅនឹងយុត្តិធម៌សម្រាប់ជនរងគ្រោះ។
របាយការណ៍បន្តថា ពលរដ្ឋកម្ពុជា
បានស្វែងរកការងារធ្វើនៅប្រទេសក្នុងតំបន់មួយចំនួន ដូចជា
ម៉ាឡេស៊ី ថៃ វៀតណាម និងសិង្ហបុរី តាមរោងចក្រ និងឧស្សាហកម្មផ្សេងៗ
ហើយពួកគេបានក្លាយជាជនរងគ្រោះនៃការជួញដូរមនុស្ស
និងពលកម្មដោយបង្ខំ។ របាយការណ៍លើកឡើងទៀតថា ការជួញដូរផ្លូវភេទ
ពិសេសការលក់ដូរក្រមុំព្រហ្មចារីយ៍របស់ស្ត្រី និងកុមារី
កំពុងក្លាយជាបញ្ហានៅប្រទេសកម្ពុជា ដោយអ្នកទទួលសេវា
ជាបុរសរស់នៅតាមប្រទេសមួយចំនួន នៅតំបន់អាស៊ី សហរដ្ឋអាមេរិក
និងអឺរ៉ុប ដែលធ្វើដំណើរមកកម្ពុជា
ដើម្បីស្វែងរកទេសចរណ៍ផ្លូវភេទលើកុមារ។
ទាក់ទងនឹងបញ្ហានេះ រដ្ឋមន្ត្រីក្រសួងព័ត៌មាន
និងជាអ្នកនាំពាក្យរាជរដ្ឋាភិបាលកម្ពុជា លោក ខៀវ កាញារីទ្ធ
មានប្រសាសន៍ថា រដ្ឋាភិបាលមិននៅពីក្រោយខ្នង នៃអំពើជួញដូរមនុស្សទេ។
បន្ទាប់ពីពិធីបើកសម្ពោធស្ថានីយវិទ្យុបារាំង RFI នៅព្រឹកថ្ងៃទី២០
ខែមិថុនា លោក ខៀវ កាញារីទ្ធ បានមានប្រសាសន៍ថា រដ្ឋាភិបាលកម្ពុជា
បានធ្វើរាល់ថ្ងៃ ហើយរដ្ឋាភិបាល
មិនឈរពីក្រោយខ្នងនៃការជួញដូរនុស្សនោះទេ៕
1 comment:
ចម្លើយរបស់លោកខៀវ កាញារិទ្ធពិតជាត្រឹមត្រូវណាស់ដែលថា«រដ្ឋាភិបាលមិនឈរពីក្រោយខ្នងនៃការជួញដូរមនុស្សនោះ គឺឈរ ដើរនិងដឹកនាំមុខតែម្ដង!!!»
Post a Comment