ព្រះសង្ឃ វឿង សំណាង៖ វត្ត​ហៅ​ចូល​វិញ តែ​កត់​ចូល​ក្នុង​បញ្ជី​«ខ្មៅ»

Tue 27 Aug, 2013

ភ្នំពេញ៖ ព្រះតេជគុណ វឿង សំណាង គង់នៅវត្តបុទុមវតី ត្រូវបានព្រះគ្រូមេសូត្រស្តាំវត្ត​ និងជាព្រះមេគុណ​រាជធានី បញ្ជា​ឲ្យមេកុដិ បណ្តេញព្រះអង្គចេញពីវត្តទាំងយប់ ដោយសារតែព្រះអង្គមានវត្តមាន នៅលានប្រជាធិបតេយ្យកាលពីថ្ងៃទី២៦ ខែសីហាម្សិលម៉ិញនេះ។ នៅថ្ងៃអង្គារនេះ ព្រះសង្ឃអង្គនេះ ត្រូវបានមេកុដហៅចូលទៅវត្តវិញ តែមានសង្ឃដីការពន្យល់​ថា ព្រះតេជគុណត្រូវបានគេកត់ចូល«បញ្ជីខ្មៅ»របស់វត្ត។

ព្រះតេជគុណ វឿង សំណាង។ (រូបថត ក្នុងទំព័រហ្វេសប៊ុកព្រះអង្គ)
ក្នុងកិច្ចសម្ភាសជាមួយទស្សនាវដ្តីមនោរម្យព័ងអាំងហ្វូ ព្រះតេជគុណ វឿង សំណាង ជានិស្សិតផ្នែករដ្ឋបាល នៃពុទ្ធិកៈ​សកលវិទ្យាល័យព្រះសីហនុរាជ្យ ស្នាក់នៅក្នុងវត្តបុទុមវតី កុដិលេខ២៥ និងក៏ជានិស្សិតកំពុងសិក្សានៅ សកលវិទ្យាល័យ​បញ្ញាសាស្រ្តផងដែរ។ សាមណនិស្សិត រូបនេះបានមានសង្ឃដីកាថា ព្រះអង្គបានទៅមើលពីទិដ្ឋភាពទូទៅ នៃ«វេទិការ​ម្ចាស់ឆ្នោត ដើម្បីស្វែងរកយុត្តិធម៌» នារសៀលថ្ងៃទី២៦ ខែសីហា នៅទីលានប្រជាធិបតេយ្យ ដែលរៀបចំដោយ​គណបក្ស​សង្គ្រោះជាតិ។

ខុសនឹង«ច្បាប់វត្ត»?

ក្រោយពីព្រះអង្គបាននិមន្តត្រឡប់មកវិញ នៅម៉ោងប្រហែលជា៦.៤០នាទី ត្រូវបានព្រះមេគុណរាជធានី ព្រះតេជគុណ ឃឹម សន និងជាព្រះគ្រូមេសូត្រស្តាំវត្តបុទុមវតី បានបញ្ជាឲ្យព្រះតេជគុណ ឡុង សុភាព ដែលជាមេកុដិ បណ្តេញព្រះអង្គ (ព្រះតេជគុណ វឿង សំណាង) ចេញពីកុដិទាំងយប់។ «អាត្មាគ្រាន់តែបំពេញតួនាទីជាប្រជាពលរដ្ឋ ដោយបានទៅ​ឈរ​ស្តាប់ទាក់ទងបញ្ហា ការបញ្ចេញមតិរបស់ប្រជាពលរដ្ឋ។ (...)

អ្វីដែលអាត្មាបានធ្វើមិនខុសនឹងច្បាប់រដ្ឋទេ ព្រោះអាត្មាជា​ប្រជាពលរដ្ឋ ហើយអាត្មាក៏មិនបានទៅស្រែកឡូឡាឯណាដែរ។» នេះជាការបង្ហាញសង្ឃដីការ របស់ព្រះតេជគុណ វឿង សំណាង។

ការបណ្តេញព្រះអង្គចេញមួយយប់នេះ ព្រះតេជគុណបានឲ្យដឹងថា គេបានធ្វើឡើង តាមរយៈការចោទប្រកាន់ ដោយសារ ព្រះអង្គបានធ្វើខុស​នឹង​«ច្បាប់វត្ត»។ ព្រះអង្គក៏បានចោទជាសង្ឃដីកាថា «ក្នុងព្រះពុទ្ធសាសនាក្តី តាមប្រព័ន្ធច្បាប់រដ្ឋក្តី អាត្មាជាប្រជាពលរដ្ឋម្នាក់ និងជាព្រះសង្ឃមួយអង្គនោះ គ្រាន់តែចូលរួមឈរមើល និងគ្រាន់តែស្តាប់នោះ តើ(វា)ខុស​ដែរ​ឬ​យ៉ាងណា?»

ហៅចូលវត្តវិញ តែត្រូវមាន«កិច្ចសន្យា»

តែទោះជាយ៉ាងនេះក្តី ក្រោយការបណ្តេញចេញតាមរយៈពាក្យសម្តី (មិនមានជាលិខិតស្នាមទេ) ព្រះតេជគុណ​បាន​បញ្ជាក់​ថា ពេលដែលព្រះអង្គ កំពុងស្វះស្វែងរការអន្តរាគមន៍ ពីអង្គការសហប្រជាជាតិ ពីអង្គការសង្គមស៊ីវិលនានា នៅវេលា​ម៉ោង​ជាងប្រាំបីព្រឹកថ្ងៃទី២៧ ខែសីហានេះ ព្រះអង្គក៏ត្រូវបានមេកុដិហៅ ដោយបានអនុញ្ញាតិឲ្យស្នាក់នៅក្នុងកុដិជាបន្តរទៀត តាមរយៈនៃការធ្វើ«កិច្ចសន្យា»មួយ។

ទោះបីព្រះអង្គបានចូលគង់នៅធម្មតា បានបន្តរការសិក្សាក៏ពិតមែន តែឈ្មោះព្រះអង្គត្រូវបាន កត់ត្រា ចូលក្នុងបញ្ជី​«ខ្មៅ»​របស់វត្តរួចទៅហើយ។ តែទោះជាយ៉ាងនេះក្តី ព្រះអង្គមិនមានការខ្លាច រអានោះដែរ ប្រសិនបើ​ព្រះអង្គមិនបាន​ធ្វើខុស​ពិត​មែននោះ។ «អ្វីដែលកើតឡើងចំពោះអាត្មា អាត្មាមិនខ្លាចចំពោះភាពអយុត្តិធម៌នោះទេ អ្វីដែលអាត្មាចង់បាន ការ​រស់​នៅ​ដោយសុក្រិត ដោយយុត្តិធម៌។ (...) អ្វីដែលអាត្មាបានធ្វើ ក្នុងគោលបំណងចង់ស្វែងយល់ អំពីរបត់សង្គមតែ ប៉ុណ្ណោះ មិន​មែនចូលរួមក្នុងបក្សប្រឆាំងនោះទេ។»

សង្ឃមិនត្រូវចូលរួមក្នុងចលនានយោបាយ រួចចុះសម្តេច ទេព វង្ស ?

ទាក់ទងនិងការត្រឡប់ចូលទៅគង់នៅបន្តរ ដោយមានកិច្ចសន្យានោះ ព្រះអង្គមិនបានបញ្ជាក់អ្វី ច្រើននោះទេ ដោយគ្រាន់​តែបង្ហាញថា ជា«កិច្ចសន្យាគោរពតាម ច្បាប់វត្ត»។

ព្រះអង្គបានសង្ខេបដោយខ្លីថា ចំណុចល្អរបស់ច្បាប់វត្ត គេមិន​អនុញ្ញាត​ឲ្យចេញពីវត្តដើម្បីធ្វើបាតុ កម្ម កុប្បកម្ម ឬធ្វើសកម្មភាពណាមួយ ដែលនាំឲ្យមានបញ្ហា ដល់វត្ត (វា) ជាការរក្សាសណ្តាប់ធ្នាប់​របស់វត្ត។

ទស្សនាវដ្តីមនោរម្យព័ងអាំងហ្វូមិនអាចសុំការបំភ្លឺពីព្រះតេជគុណ ឃឹម សន ព្រះគ្រូមេសូត្រស្តាំ និងព្រះតេជគុណ ឡុង សុភាព មេកុដិវត្តបុទុមវតីបានទេ នាល្ងាចនេះ ដោយទូរស័ព្ទព្រះអង្គហៅមិនចូល។

បញ្ហានៃការបណ្តេញចេញនេះ ត្រូវបាន លោក អ៊ូ វីរៈ ប្រធានមជ្ឍមណ្ឌល សិទ្ធិមនុស្សកម្ពុជា ធ្វើការបកស្រាយថា ប្រសិន​បើជាការបណ្តេញចេញ ដោយ«អាបត្តិ»នោះ វាជាការត្រឹមត្រូវ និងក៏ដើម្បីពង្រឹងនូវប្រពន្ធ័ច្បាប់វត្ត វិន័យសម្រាប់​ព្រះសង្ឃ​ដែលជារឿងចាំបាច់។ លោកបានបន្តរថា តែបើសិនជាបណ្តេញចេញ ដោយសារព្រះអង្គចូលរួមស្តាប់ការសម្តែងមតិ នោះ ជាការមិនត្រឹមត្រូវទេ។

លោកបានបញ្ជាក់យ៉ាងដូច្នេះថា ការបណ្តេញចេញ តាមរយៈការចូលរួមដោយសន្តិវិធីលើការតវ៉ា ណាមួយ ដែលមាន​លក្ខណៈជានយោបាយ នោះវាក៏មិនត្រឹមត្រូវដែរ។ ជាមួយគ្នានេះ លោក អ៊ូ វីរះ ក៏បានលើកជាឧទាហរណ៍ថា «នៅពេល ​ដែលសម្តេច ទេព វង្ស មានសង្ឃដីកាលំអៀង ទៅគណបក្សកាន់អំណាចទាំងស្រុងនោះ លោកជេរគេ ជេរឯង ប្រើពាក្យ មិនសមរម្យ ដែលមានលក្ខណៈនយោបាយទាំងស្រុងនោះ ជារឿងមួយមិនល្អសម្រាប់វត្តអារាម ក្នុងប្រទេសកម្ពុជា​យើង​នោះទេ។

នេះជាបញ្ហាមួយត្រូវកែទម្រង់ខ្លាំងណាស់ រួមផ្សំនឹងព្រះសង្ឃដែលខ្វះវិន័យផង។ (…) ទាក់ទងនឹងរឿង​នយោបាយ ព្រះសង្ឃនៅកម្ពុជាត្រូវបានគាបសង្កត់ក្នុងកម្រិតខ្ពស់ និងជាបញ្ហាដែលត្រូវធ្វើការជជែកគ្នាជាបន្តរទៀត។»

សូមបញ្ជាក់ដែរថា កាលពីថ្ងៃទី០២ ខែសីហា សម្តេចព្រះអគ្គមហាសង្ឃរាជាធិបតី ទេព វង្ស បានចេញលិខិតប្រកាសគាំទ្រ ចំពោះជ័យជំនេះរបស់គណបក្សប្រជាជនកម្ពុជា។

ក្នុងកិច្ចសម្ភាសកន្លងមក ជាមួយទស្សនាវដ្តីមនោរម្យព័ងអាំងហ្វូ លោក​យ៉ង់ គឹមអេង ក៏បានបង្ហាញដែរថាក្នុងនាមជាស្ថាប័នព្រះសង្ឃ មិនត្រូវធ្វើ«នយោបាយយ៉ាងជ្រៅ»ដូច្នេះទេ។ លោកគួរ​គង់​ជាកណ្តាល ហើយអាចជួយផ្សព្វផ្សាយនូវអ្វី ដែលត្រូវដោះស្រាយដោយសន្តិវិធី និងអហិង្សាក្នុងអំឡុងពេលចាំបាច់ ជា​ជាងការគាំទ្រទៅលើគណបក្សនយោបាយ៕
Courtesy http://www.monoroom.info



CNRP Statement on the Venerable Voeung Samnang being expelled from Wat Padmavatei (Wat Botumvatei) in the middle of the night by the Vice Chief Monk for attending the Public Forum with the CNRP leaders on 08.26.2557 2013 at the Democracy Square .

Note: This temple is also the official residence of Supreme Patriarch Non Nget, who in past years, harassed, intimidated and violated other his fellow Buddhist monks, Ven. Indapanno Tim Sakhorn, Ven. Saccamuni Luon Sovath.

This is a violation of human and religious rights as inscribed in the Cambodian Constitution, U.N. Universal Declaration of Human Rights and other international human rights treaties, especially the Buddha’s Teaching of adhering the Middle Path, non-violence, peace, compassion and kindness.