គជប ពុំមានសិទ្ធិអំណាច ក្នុងការបង្កើតគណៈកម្មការចម្រុះ តាមការស្នើរបស់គណបក្សសង្គ្រោះជាតិទេ

 

 

ទេព នីថាៈគជប ពុំ​មាន​សិទ្ធិ​អំណាច ក្នុង​ការបង្កើត​គណៈកម្មកា​រ​ចម្រុះ តាម​ការស្នើ​របស់​គណ​បក្ស​សង្គ្រោះ​ជាតិ​ទេ​(ព្រោះចោរខ្លាចពន្លឺនៃសេចក្តីពិត)

(ថ្ងៃទី 4 សីហា 2013, ម៉ោង 11:49:AM) | ដោយ: លី សិលាCE

ភ្នំពេញ: ​លោក ទេព នីថា អគ្គលេខាធិការ​គជប បានប្រកាសថា គជប ពុំ​មាន​សិទ្ធិ​អំណាច ដើម្បី​ទៅ​បង្កើត​គណៈកម្មការ​ចម្រុះ ក្នុង​ការដោះស្រាយ​ភាពមិនប្រក្រតី​នៃ​ការបោះឆ្នោត ដែល​មាន​សមាសភាព​ចូលរួម​ពី​អង្គការ​សង្គម​ស៊ីវិល និង​មាន​អង្គការសហប្រជាជាតិ ជា​អ្នកសម្របសម្រួល​។  គជប បន្ត​ដំណើរការ​នីតិវិធី និង​ការងារ​របស់​ខ្លួន​ជាធម្មតា​។​

​កាលពី​ព្រឹក​ថ្ងៃ​សៅរ៍ ទី​៣​សីហា ឆ្នាំ​២០១៣ កិច្ចប្រជុំ​រវាង​គជប ជាមួយ​តំណាង​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ បាន​ឯកភាពគ្នា​ជា​គោលការណ៍​ពីរ​ចំនុច​។ ទី​១-​បង្កើត​គណៈកម្មការ​ចម្រុះ​មួយ ដែល​មាន​គជប និង​គណបក្ស​ទាំង​ពីរ​ចូលរួម​។ ទី​២-​គណៈកម្មការ​ចម្រុះ​នេះ នឹង​ប្រជុំ​ពិភាក្សាគ្នា​អំពី​អាណត្តិ និង​ភារកិច្ច​របស់​ខ្លួន ជាបន្ទាន់ ក្រោយពី​ត្រូវ​បាន​បង្កើត​ហើយ​។

​តាម​គម្រោង នៅ​ថ្ងៃ​អាទិត្យ ទី​៤ ខែ​សីហា ឆ្នាំ​២០១៣ គជប ត្រូវ​រៀបចំ​កិច្ចប្រជុំ​បន្ត ជាមួយនឹង​តំណាង​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ ដើម្បី​និយាយ​ពី​អាណត្តិ និង​តួនាទី ភារកិច្ច​របស់​គណៈកម្មកា​រ​ចំពោះ​កិច្ច សម្រាប់​ដោះស្រាយ​ភាពមិនប្រក្រតី​នានា​ជុំវិញ​ការបោះឆ្នោត​។​

​ក៏​ប៉ុន្តែ​កិច្ច​នោះ មិនបាន​ធ្វើ​ទេ នៅ​ព្រឹក​ថ្ងៃអាទិត្យ ទី​៤ ខែ​សីហា ឆ្នាំ​២០១៣ ដោយសារ​តែ​គណបក្ស​សង្គ្រោះ​ជាតិ មិន​បាន​បញ្ជូន​តំណាង​ទៅ​។ គណបក្ស​សង្គ្រោះ​ជាតិ ចង់ឲ្យ​សមាសភាព​គណៈកម្មការ​ចំពោះ​កិច្ច​នោះ មាន​លក្ខណៈ​ទូលំទូលាយ​ជាង​នេះ គឺ​មាន​ការចូលរួម​ពី​តំណាង​គណបក្ស​ប្រជាជន​កម្ពុជា គណបក្ស​សង្គ្រោះ​ជាតិ ព្រមទាំង​អង្គការ​សង្គម​ស៊ីវិល អ្នកសង្កេតការណ៍​ជាតិ​-​អន្តរជាតិ ដោយ​មាន​គជប ជា​អ្នកសម្របសម្រួល និង​អង្គការ​សហប្រជាជាតិ ជា​អាជ្ញាកណ្តាល​។​

​ក៏​ប៉ុន្តែ​លោក ទេព នីថា អគ្គលេខាធិការ​គជប បាន​មានប្រសាសន៍​នៅ​ព្រឹក​ថ្ងៃអាទិត្យ ទី​៤ ខែ​សីហា ឆ្នាំ​២០១៣ ថា គជប​មាន​ការសោកស្តាយ ដែល​កិច្ចប្រជុំ​នៅ​ព្រឹក​នេះ ពុំ​អាច​ធ្វើបាន​។ តែ​គជប នឹង​បន្ត​ដំណើរការ​នីតិ​វ​ធី និង​ការងារ​របស់​ខ្លួន​។​

​លោក ទេព នីថា បានបញ្ជាក់​ថា "​គជប ពុំ​មាន​សិទ្ធិ​អំណាច​ទៅដល់​នោះទេ ( តាម​សំណើរ​របស់​គណបក្ស​សង្គ្រោះ​ជាតិ ក្នុង​ការបង្កើត​គណៈកម្មកា​រ​ចម្រុះ ដែលមាន​អង្គការសហប្រជាជាតិ ជា​អាជ្ញាកណ្តាល )​។ ម្យ៉ាងទៀត សូម្បីតែ​នៅក្នុង​សេចក្តីប្រកាស ឯកឧត្តម បាន គីមូន ក៏​បាន​និយាយ​ដែរ​ថា គាត់​សូម​ឲ្យ​អាជ្ញាធរ​មាន​សមត្ថកិច្ច​ដោះស្រាយ​បន្តឹង​ទាក់ទង​ការបោះឆ្នោត ឲ្យបាន​យុត្តិធម៌ និង​តម្លាភាព គាត់​មិន​បាន​សំដែង​ថា គាត់​ចង់​បញ្ចេញ​តួនាទី​ទាក់ទង​នឹង​ការបោះឆ្នោត​នៅ​ប្រទេស​កម្ពុជា​នោះ​ទេ​។ ដូច្នេះ ការស្នើ​សុំ​នោះ ហួស​ពី​សមត្ថកិច្ច និង​ហួស​ពី​សិទ្ធិ​អំណាច​របស់​ខ្លួន គឺថា គជប មិន​អាច​ធ្វើ​ទៅ​បាន​ទេ​"​។​

​លោក ទេព នីថា បានបញ្ជាក់​ថា គជប​ខិតខំ​ប្រឹងប្រែង​ធ្វើយ៉ាងណា​ឲ្យមាន​ការចូ​ល​រួម​ពី​គណបក្ស​សង្គ្រោះ​ជាតិ ក្នុង​គណៈកម្មការ​ចម្រុះ ដើម្បី​ពិនិត្យ​ដោះស្រាយ​លើ​ភាពមិន​ប្រក្រតី​នៃ​ការបោះឆ្នោត​។ តែ​គួរឲ្យ​សោកស្តាយ ដែល​ដំណើរការ​នេះ ពុំ​ទាន់​អាច​ទៅ​មុខ​រួច អាច​ថា យើង​ទៅ​មុខ​បាន​មួយ​ជំហាន ហើយ​ថយ​ក្រោយ​មក​វិញ ២ ជំហាន​វិញ​។

​តែ​ទោះបីជា​យ៉ាងណា លោក ទេព នីថា បានបញ្ជាក់​ថា គជប នៅ​តែ​រក្សា​ជំហរ​របស់​ខ្លួន ហើយ​នៅតែ​គោរព​នូវ​ការប្រជុំ​លើក​ទី​១ ថា​យើង​បង្កើត​គណៈកម្មការ​នេះ ហើយ​គជប នៅតែ​រង់ចាំ​ពី​សុ​ឆន្ទៈ​របស់​គណបក្ស​សង្គ្រោះ​ជាតិ ដើម្បី​ចូលរួម​ការបង្កើត​គណៈ​កម្ម​ការ​ចម្រុះ​នេះ​។​មកដល់ពេលនេះ នៅ​មិនទាន់​មាន​ការឆ្លើយតប​បែប​ណា​ពី​ខាង​គណបក្ស​សង្គ្រោះ​ជាតិនៅឡើយ​ទេ​៕