អ្នកវិភាគ៖ អង្គការសហប្រជាជាតិនៅតែមានឥទ្ធិពលជុំវិញស្ថានការណ៍នយោបាយនៅកម្ពុជា

....................................
ដោយ៖ ញឹម សុខន និង អ៊ឹង ប៊ុនថន | ថ្ងៃសុក្រ ទី9 ខែសីហា ឆ្នាំ2013 | 4 ម៉ោង មុន VOD
អ្នកវិភាគព្រឹត្តិការណ៍សង្គម ពន្យល់ថា តួនាទីរបស់អង្គការសហប្រជាជាតិ នៅតែមានតួនាទីសំខាន់ លើវិបត្តិនយោបាយនៅកម្ពុជា ដើម្បីជំរុញល្បឿននៃដំណើរការលិទ្ធិប្រជាធិបតេយ្យ ក្រោយការបោះឆ្នោតជាតិអាណត្តិទី៥នេះ។
ការបង្ហាញទស្សនៈរបស់អ្នកវិភាគ នាថ្ងៃសុក្រទី០៨ ខែសីហានេះ ជាការឆ្លុះបញ្ចាំងចំពោះលិខិតអគ្គលេខាធិការអង្គការសហប្រជាជាតិ លោក បាន គីមូន នាដើមខែសីហានេះ ដែលប្រកាសស្វាគមន៍ ដំណើរការបោះឆ្នោតនៅកម្ពុជា ថាបានធ្វើឡើងដោយសន្តិភាព។
ប៉ុន្តែ អង្គការសហប្រជាជាតិ ជំរុញឲ្យសមត្ថកិច្ចមានសមត្ថភាពដោះស្រាយរាល់បណ្តឹង របស់គណបក្សនយោបាយ ឲ្យបានត្រឹមត្រូវ និងមានតម្លាភាព ដើម្បីធានាលទ្ធផលបោះឆ្នោតនោះ ស្របតាមការបេ្តជ្ញា និងការគោរពឆន្ទៈរបស់ពលរដ្ឋកម្ពុជា។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ ពន្យល់ថា ឥទ្ធិពលអង្គការសហប្រជាជាតិ មកលើវិបត្តិនយោបាយនៅកម្ពុជាបច្ចុប្បន្ន នៅតែជារឿងសំខាន់ ដោយលោកអះអាងថា គណបក្សខ្លះបាន ធ្លាប់ចុះប្រជាប្រិយភាព ក្រោយការបោះឆ្នោត ដោយហេតុផលខ្លះនៃការច្រានចោលនូវអនុសាសន៍នានា របស់អង្គការសហប្រជាតិ។ លោកថា រាជរដ្ឋាភិបាលថ្មីនេះ ទំនងជាពិចារណាពីហេតុផលនេះ ៖ "ខ្ញុំថាជៀសវាងមិនរួចទេ យើងគ្រប់គ្រងប្រទេសមួយដែលអះអាងថា មានអធិបតេយ្យ មានឯករាជ្យភាពហ្នឹង មិនអាចបន្ដរបៀបគ្រប់គ្រងដែលកន្លងមក ហើយដែលឲ្យអ្នកគ្រប់គ្រងហ្នឹងនោះបាត់បងនៅការទុកចិត្ដ ពីប្រជាពលរដ្ឋយ៉ាងច្រើន មិនទាំងអស់ទេ ប៉ុន្ដែយ៉ាងច្រើន ម៉្លោះហើយគេត្រូវដកហូតមេរៀន ហើយក៏កែសម្រួលការខ្វះខាត បំពេញការខ្វះខាត ឫក៏រុះរើសឹងទាំងអស់ តាំងពីទស្សនៈនៃការគ្រប់គ្រងរដ្ឋ នីតិវិធី យន្ដការ ស្ថាប័ន ផ្សេងៗ" ។

សាស្ត្រាចារ្យផ្នែកវិទ្យាសាស្ត្រនយោបាយ លោកបណ្ឌិត សុខ ទូច យល់ថា តួនាទីរបស់អង្គការសហប្រជាជាតិ សម្រាប់ឃ្លាំមើលដំណើរប្រជាធិបតេយ្យនៅកម្ពុជា ជាចលករមួយផ្នែកដែរ ដើម្បីជំរុញឲ្យមានលទ្ធិប្រជាធិបតេយ្យនៅកម្ពុជា ប៉ុន្តែលោកថា ពលរដ្ឋខ្មែរជាម្ចាស់ឆ្នោតទៅវិញទេ ដែលជាអ្នកពន្លឿនបញ្ហានេះ ៖ "រឿងអង្គការសហប្រជាជាតិគេអត់ដែលមកលូកដៃទេ ប្រជាជនទទួលស្គាល់គឺទទួលស្គាល់ហើយ អង្គការសហប្រជាជាតិគ្រាន់តែព្រួយបារម្ភទេ ប៉ុន្ដែអ្នកដែលកំណត់ជោគវាសនារបស់ប្រទេសមួយ គឺអាស្រ័យទៅប្រជាជនប្រទេសនោះ អញ្ចឹងហើយបានខ្ញុំលើកមួយសាមកទៀតថា មានតែប្រជាជនប្រទេសនោះ អំណាចប្រជាជនទេនៅក្នុងសង្គមប្រជាធិបតេយ្យ បើសិនជាកុម្មុយនីស្ដអំណាចនៅលើបក្ស បក្សដឹកនាំរដ្ឋ គ្រប់គ្រងប្រជាជនធ្វើជាម្ចាស់ ឯអំណាចប្រជាធិបតេយ្យមិនមែននៅលើអង្គការសហប្រជាជាតិទេ នៅលើប្រជាជនកម្ពុជា អញ្ចឹងហើយបានគេឲ្យឈ្មោះថា ប្រជាមតិ រឿងអង្គការសហប្រជាជាតិទទួលស្គាល់ ការព្រួយបារម្ភហ្នឹងក៏ត្រូវយើងលើកមកធ្វើប្រជាមតិ ដូចខ្ញុំបានលើកខាងដើមអញ្ចឹង ដើម្បីអំណាចប្រជាជនហ្នឹង កាត់ទោសអ្នកប្រព្រឹត្ដមិនសមហ្នឹង គឺតាមសន្លឹកឆ្នោតហ្នឹងតែម្ដង" ។

ក្រោយការបោះឆ្នោតជាតិ ជ្រើសតាំងតំណាងរាស្ត្រ នីតិកាលទី៥នេះ គណបក្សពីរ ដែលទួលបានអសនៈក្នុងសភា គឺគណបក្សប្រជាជនកម្ពុជា និងគណបក្សសង្គ្រោះជាតិ អះអាងថា បានឈ្នះការបោះឆ្នោត រៀងៗខ្លួន បើទោះបីលទ្ធផលផ្លូវការនៃការបោះឆ្នោត មិនទាន់ត្រូវបានគណៈកម្មាធិការជាតិរៀបចំការបោះឆ្នោត ប្រកាសឲ្យដឹងក៏ដោយ។

ការខ្វែកគំនិតគ្នានេះ ធ្វើឲ្យគណបក្សប្រឆាំងគំរាមធ្វើមហាបាតុកម្ម ប្រឆាំងលទ្ធផលបោះឆ្នោត បើស្ថាប័នឯករាជ្យមួយមិនត្រូវបង្កើតឡើង ដោយមានគណបក្សនយោបាយ ដែលបានឈ្នះអាសនៈក្នុងសភា អ្នកអង្កេតការណ៍ជាតិនិងអន្តរជាតិ និងអង្គការសហប្រជាជាតិ ជាអាជ្ញាកណ្តាល ដើម្បីស៊ើបអង្កេតភាពមិនប្រក្រតីនៃការបោះឆ្នោត៕

សូមសរសេរមកលោក ញឹម សុខន តាមរយៈ sakhorn@vodhotnews.com