សហភាពអឺរ៉ុបជំរុញឲ្យដោះស្រាយវិបត្តិនយោបាយនៅកម្ពុជាដោយសន្តិវិធី

..............................................
ដោយ៖ តាំង វីដា និង អ៊ឹង ប៊ុនថន | ថ្ងៃពុធ ទី14 ខែសីហា ឆ្នាំ2013 | 1 ម៉ោង មុន VOD
សហភាពអឺរ៉ុប ជំរុញជាថ្មីម្តងទៀត ឲ្យគណបក្សនយោបាយដែលជាប់ឆ្នោត ដោះស្រាយវិបត្តិជាប់កាំងនយោបាយនៅកម្ពុជា ក្រោយការបោះឆ្នោតជាតិនេះ ដោយរក្សាសន្តិភាព និងឈរលើស្មារតីគោរពលទ្ធិប្រជាធិបតេយ្យ។
លិខិតផ្ញើជូនប្រធានគណបក្សសង្គ្រោះជាតិ លោក សម រង្ស៊ី ចុះថ្ងៃទី១២ ខែសីហា ឆ្នាំ២០១៣ តំណាងជាន់ខ្ពស់សហភាពអឺរ៉ុប លោកស្រី Catherine Ashton បានសាទរចំពោះភាពជោគជ័យរបស់គណបក្សសង្គ្រោះជាតិ ដែលទទួលបានការគាំទ្រជិតទ្វេដង ក្នុងការបោះឆ្នោតជាតិអាណត្តិទី៥នេះ។ លោកស្រីយល់ថា ជោគជ័យនេះដោយសារការចូលរួមយ៉ាងសកម្មរបស់យុវជន ដែលបង្ហាញពី ដំណើរការលទ្ធិប្រជាធិបតេយ្យនៅកម្ពុជា។
ទោះជាយ៉ាងណា ក្នុងលិខិតដដែលនេះ លោកស្រី Catherine Ashton ជំរុញឲ្យគណបក្សនយោបាយ ចូលរួមចរចារជាមួយនឹងភាគីពាក់ព័ន្ធ ដើម្បីរកដំណោះស្រាយ ឲ្យបានឆាប់រហ័ស ដោយសារនេះជាដំណាក់កាលដ៏សំខាន់ ដើម្បីរក្សាសន្តិសុខ និងដំណើរលទ្ធិប្រជាធិបតេយ្យនៅកម្ពុជា។

អ្នកនាំពាក្យគណបក្សសង្គ្រោះជាតិ លោក យឹម សុវណ្ណ អះអាងថា ការជំរុញរបស់សហភាពអឺរ៉ុប គឺស្របទៅនឹងឆន្ទៈរបស់គណបក្សសង្គ្រោះជាតិ ដែលតែងតែអនុវត្តកន្លងមក ហើយការធ្វើបាតុកម្ម គឺគ្រាន់តែជម្រើសចុងក្រោយ ប្រសិនបើមិនមានការចរចាដោយសន្តិវិធីនោះ ៖ “គណបក្សសង្គ្រោះជាតិ មិនចង់ធ្វើបាតុកម្មទេ សុំឲ្យរដ្ឋាភិបាលដោះស្រាយ តាមរយៈគណៈកម្មការពិសេស ដែលយើងបានស្នើសុំតាំងពីដើមទីមក ប្រសិនជាមានបាតុកម្មកើតឡើង នោះជាទង្វើដ៏ខុសឆ្គង របស់គ.ជ.ប និងគណបក្សកាន់អំណាច កុំឲ្យចោទប្រកាន់ថា គណបក្សសង្គ្រោះជាតិ ធ្វើបាតុកម្ម មិនមែនអញ្ចឹងទេ យើងបានពុះពារដើម្បីរកដំណោះស្រាយ ដោយសន្តិវិធីអស់ហើយ”។

អគ្គលេខាធិការ គ.ជ.ប លោក ទេព នីថា ឲ្យដឹងថា ដើម្បីរក្សាស្ថិរភាពនយោបាយ ស្របតាមការជំរុញពីបណ្តាសហគមន៍បរទេស គឺ គ.ជ.ប បានខិតខំបង្កើតឲ្យមានការចរចារវាងគណបក្សទាំងពីរ រហូតលើសកាលកំណត់ប្រកាសលទ្ធផលបោះឆ្នោតបណ្តោះអាសន្ន ដល់ទៅ២ថ្ងៃ ដែលកត្តានេះ លោកចាត់ទុកថា លើសពីសមត្ថកិច្ចរបស់ គ.ជ.ប ទៅហើយ ៖ “ក្រោយពីយើងរងចាំ ដែលមិនអាចសំរេចនឹងការបង្កើតនេះ យើងក៏ប្រកាសលទ្ធផលបណ្តោះអាសន្ន អ៊ីចឹងទេអ្វីៗគឺដូចជាសម្រាប់ គ.ជ.ប នេះគឺវាហួសពេល អនុវត្តសមត្ថកិច្ចរបស់ខ្លួនដែលទាក់ទងទៅនឹងកាល នេះហើយ ព្រោះកាលណាប្តឹងលើលទ្ធផលការផ្សាយ លទ្ធផលបណ្តោះអាសន្នហើយ ការប្តឹងតវ៉ា គឺគេត្រូវធ្វើទៅតាមច្បាប់របស់ គជប ៧២ម៉ោង ឬក៏ប្តឹងផ្ទាល់ ឬក្រុមព្រឹក្សាធម្មនុញ្ញ ៧២ម៉ោង”។

អ្នកវិភាគនយោបាយ លោកបណ្ឌិត ឡៅ ម៉ុងហៃ យល់ថា សហភាពអឺរ៉ុប គឺជាប្រភពជំនួយ និងជាទីផ្សារដ៏ធំមួយសម្រាប់កម្ពុជា ហើយរាល់ការជំរុញរបស់ប្រទេសលោកខាងលិចនេះ គឺធ្វើឡើងដើម្បីពង្រឹងលទ្ធិប្រជាធិបតេយ្យនៅកម្ពុជា ដែលរដ្ឋាភិបាលគប្បីពិចារណា ៖ “គេចង់ឲ្យយើងហ្នឹងចេះរស់ គ្រប់គ្រងប្រទេសឲ្យបានសុខសប្បាយ ហើយប្រកបដោយនីតិរដ្ឋទៅ។ យើងឲ្យចេះរស់ តាមអ្នកជំនួយហ្នឹង ព្រោះយើងមិនចង់អញ្ចឹងទេ គឺចង់តែទទួលជំនួយមក ហើយគេចាត់ចែងស្រែកចិត្តទៅ ហើយពុករលួយ គាបសង្កត់ ទៅជាចងក្រងជាខ្សែ ជាក្រុម ជាបក្សពួកអីទៅ។”

សូមបញ្ជាក់ថា ក្រោយមួយថ្ងៃនៃការបោះឆ្នោតនៅកម្ពុជា តំណាងជាន់ខ្ពស់សហភាពអឺរ៉ុប បានចេញសេចក្តីថ្លែងការណ៍ សំដែងការសោកស្តាយ ដែលអាជ្ញាធរ មិនបានចាត់វិធានការចាំបាច់ ដើម្បីដោះស្រាយនូវកំហុសឆ្គងមួយចំនួន។ បញ្ហាទាំងនោះ ដូចជាការធ្វើឲ្យប្រសើរនូវបញ្ជីអ្នកបោះឆ្នោត ការធានាសមត្ថភាពនៃការប្រើប្រាស់ប្រព័ន្ធផ្សព្វផ្សាយ ការការពារមិនឲ្យប្រើធនធានរដ្ឋ ការប្រើមន្ត្រីរាជការ និងកងទ័ពទៅឃោសនាបោះឆ្នោតជាដើម៕

សូមសរសេរមកកាន់លោក តាំង វីដា តាមរយៈ vida@vodhotnews.com