អង្គការលើកលែងទោស អំពាវនាវកុំឲ្យមានហិង្សានៅរាជធានីភ្នំពេញ ដោយសារមហាបាតុកម្ម

..........................................
ដោយ៖ លោក ស៊ុន ណារិន | ថ្ងៃសុក្រ ទី9 ខែសីហា ឆ្នាំ2013 | 2 ម៉ោង មុន VOD
អង្គការលើកលែងទោសអន្តរជាតិ នៅថ្ងៃសុក្រនេះ អំពាវនាវឲ្យអាជ្ញាធរកម្ពុជា និងមេដឹកនាំគណបក្សនយោបាយផ្សេងៗ ការពារហិង្សាដែលអាចកើតឡើងក្រោយការបោះឆ្នោត ដោយភាពអាចទៅរួចនៃការធ្វើមហាបាតុកម្ម និងការចល័តទ័ពចូលមករាជធានីភ្នំពេញ។
ការអំពាវនាវនេះ ធ្វើឡើងបន្ទាប់ពីរយៈពេលប៉ុន្មានថ្ងៃចុងក្រោយនេះ មានសេចក្តីរាយការណ៍ថា ប្រជាពលរដ្ឋមួយចំនួន និងសមត្ថកិច្ចប្រចាំខេត្តកំពង់ចាម បានប្រទះឃើញការចល័តរថពាសដែក និងទាហាន ប្រមាណជាង២០គ្រឿង ឆ្លងតាមខេត្តកំពង់ចាម ចូលមករាជធានីភ្នំពេញ ដែលធ្វើឲ្យប្រជាពលរដ្ឋមួយចំនួន កំពុងព្រួយបារម្ភពីសុវត្ថិភាព ក្រោយការបោះឆ្នោត។ ចំណែកនៅរាជធានីភ្នំពេញ គេសង្កេតឃើញមាន ការដឹកបន្លាលួស ជាបន្តបន្ទាប់ ដែលជាសញ្ញាទុកប្រឆាំងនឹងបាតុកម្ម។

អនុប្រធានអង្គការលើកលែងទោសអន្តរជាតិ លោកស្រី Isabelle Arradon មានប្រសាសន៍នៅក្នុងសេចក្តីថ្លែងការណ៍ថា ប្រជាជនកម្ពុជាជាច្រើន បានអំពាវនាវឲ្យមានការផ្លាស់ប្តូរ ដូច្នេះមេដឹកនាំគណបក្សនយោបាយ គួរតែធ្វើអ្វីដែលពួកគេអាចធានាថា បញ្ហាទាំងនេះ ត្រូវបានសម្រេចដោយសន្តិភាព និងការគោរពសិទ្ធិមនុស្សពេញទំហឹង។

លោកស្រី Isabelle Arradon មានប្រសាសន៍ថា៖«អាជ្ញាធរកម្ពុជា និងមេដឹកនាំគណបក្សផ្សេងៗ នៅកម្ពុជា ត្រូវតែធានាថា ភាពតានតឹងក្រោយការបោះឆ្នោត នឹងមិននាំមកនូវហិង្សា»។

លោកស្រីបន្តថា ប្រជាជនកម្ពុជា រួមមានអ្នកគាំទ្រនៃគណបក្សនយោបាយ ត្រូវតែផ្តល់កន្លែងដើម្បីបង្ហាញពីមតិ និងពួកគេត្រូវបានអនុញ្ញាតឲ្យរីករាយជាមួយសិទ្ធិរបស់ពួកគេ ក្នុងការប្រមូលផ្តុំដោយសន្តិភាព។
កន្លងទៅតំណាងទូតនៅក្នុងប្រទេសកម្ពុជា បានជួបជាមួយមន្ត្រីជាន់ខ្ពស់រដ្ឋាភិបាល ដោយអំពាវនាវឲ្យមានការដោះស្រាយមួយដោយសន្តិវិធី និងតាមគោលការណ៍ច្បាប់។

កាលពីថ្ងៃទី០៨ខែសីហា ក្រសួងមហាផ្ទៃ បានចេញសេចក្តីជូនដំណឹ ងព្រមានការធ្វើបាតុកម្មរបស់ គណបក្សប្រឆាំងថា ក្នុងករណីការធ្វើបាតុកម្មបានបង្កឲ្យមមានអំពើហិង្សា ការបំផ្លិចបំផ្លាញ ដល់សន្តិសុខជាតិ ការបំផ្លិចបំផ្លាញទ្រព្យសម្បត្តិសាធារណៈ ឬឯកជន និងសណ្តាប់ធ្នាប់សាធារណៈ អ្នកដឹកនាំធ្វើបាតុកម្ម និងអ្នកប្រព្រឹត្តបទល្មើសត្រូវទទួលខុសត្រូវចំពោះមុខច្បាប់អំពីផលវិបាកនានា ដែលកើតឡើងពីការធ្វើបាតុកម្មនេះ៕