អង្គការអន្តរជាតិពីរថ្កោលទោសសកម្មភាពអាជ្ញាធររារាំងអ្នកបឹងកក់

ដោយ៖ ស៊ុន ណារិន | ថ្ងៃព្រហស្បតិ៍ ទី5 ខែកញ្ញា ឆ្នាំ2013, ម៉ោង 08:06 AM

អ្នកស្រី យ៉ោម បុប្ផា និងកូនប្រុស នៅមុខតុលាការកំពូល (រូបថត ញឹម សុខន)

អង្គការអន្តរជាតិចំនួនពីរ កាលពីថ្ងៃពុធ អំពាវនាវឲ្យដោះលែងជាបន្ទាន់ សកម្មជនដីធ្លី អ្នកស្រីយ៉ោម បុប្ផា ដែលបានជាប់ពន្ធនាគារមួយឆ្នាំមកហើយ និងថ្កោលទោសសកម្មភាពទាំងឡាយណា ដែលរារាំងការដង្ហែក្បួនដោយសន្តិភាព។

អង្គការទាំងពីរនេះ គឺសហព័ន្ធអន្តរជាតិការពារសិទ្ធិមនុស្ស (FIDH)និងអង្គការប្រឆាំងការធ្វើទារុណកម្ម ពិភពលោក (OMCT)។

កាលពីថ្ងៃពុធ រថយន្តរបស់មជ្ឈមណ្ឌលសិទ្ធិមនុស្សកម្ពុជាមួយគ្រឿង និងសម្ភារៈរបស់អ្នកបឹងកក់ រួមមាន ឧបករណ៍បំពងសំឡេង ផ្កាឈូក អាវ និងទឹកសុទ្ធមួយចំនួន ត្រូវបានអាជ្ញាធរខណ្ឌដូនពេញ ឃាត់ទុកនៅតំបន់បឹងកក់ ខណៈរថយន្តគ្រឿងនេះ ជួយដឹកសម្ភារៈមួយចំនួនរបស់ប្រជាសហគមន៍បឹងកក់។

មកដល់ថ្ងៃនេះគឺជាថ្ងៃទី៣៦៦ ដែលអ្នកស្រី យ៉ោម បុប្ផា ត្រូវបានឃុំឃាំងក្នុងពន្ធនាគារ។ កញ្ញា សារ៉ា បេស អង្គការហ្វរ៉ុម អាស៊ី ចូលរួមយុទ្ធនាការគាំទ្រការដោះលែង អ្នកស្រី យ៉ោម បុប្ផា។ #ដោះលែងយ៉ោមបុប្ផា

Today marks 366 days of Ms. Yorm Bopha's imprisonment. Ms. Sarah Baes, Forum-Asia joins the campaign demand the release of Ms. Yorm Bopha. #freeyormbopha

Courtesy CCHR

សេចក្តីថ្លែងការណ៍របស់អង្គការ ចេញផ្សាយនៅថ្ងៃទី០៤ខែកញ្ញា ឲ្យដឹងថា អង្គការថ្កោលទោសសកម្មភាពរបស់អាជ្ញាធររាជធានីភ្នំពេញ ក្នុងការកម្រិតការដង្ហែដោយសន្តិភាពរបស់អ្នកបឹងកក់ ដើម្បីជាការគម្រប់ការជាប់ពន្ធនាគារមួយឆ្នាំរបស់អ្នកស្រីយ៉ោម បុប្ផា។ សេចក្តីថ្លែងការណ៍បន្តថា នេះជាការបញ្ជាក់ម្តងទៀតរបស់អង្គការ ក្នុងការអំពាវនាវឲ្យអាជ្ញាធរកម្ពុជា ដោះលែងអ្នកស្រីយ៉ោម បុប្ផា ជាបន្ទាន់ និងគ្មានលក្ខខណ្ឌ។

អង្គការនោះ បានជំរុញឲ្យអាជ្ញាធរកម្ពុជា គោរពទៅតាមសេចក្តីថ្លែងការណ៍របស់ អង្គការសហប្រជាជាតិ ស្តីពីអ្នកការពារសិទ្ធិមនុស្ស និងសេចក្តីថ្លែងការណ៍ជាសាកលនៃសិទ្ធិមនុស្ស និងកតិកាសញ្ញាអន្តរជាតិផ្សេងទៀត ដែលទទួលស្គាល់ដោយកម្ពុជា។

បន្ទាប់ពីការឃាត់រថយន្ត និងសម្ភារៈរបស់អ្នកបឹងកក់ អាជ្ញាធរ បានប្រគល់ឲ្យមជ្ឈមណ្ឌលសិទ្ធិមនុស្សកម្ពុជាវិញ។

ថ្មីៗនេះ អង្គការលើកលែងទោសអន្តរជាតិ(Amnesty International) ក៏បានអំពាវនាវឲ្យដោះលែងសកម្មជនដីធ្លី តំបន់បឹងកក់ អ្នកស្រីយ៉ោម បុប្ផា ជាបន្ទាន់ និងគ្មានលក្ខខណ្ឌ។

កាលពីថ្ងៃទី១៤ ខែមិថុនា ឆ្នាំ២០១៣ សាលាឧទ្ធរណ៍ បានសម្រេចតម្កល់សាលក្រម របស់សាលាដំបូងរាជធានីភ្នំពេញ ដោយផ្តន្ទាទោសសកម្មជនការពារដីធ្លី នៅតំបន់បឹងកក់ អ្នកស្រី យ៉ោម បុប្ផា ដាក់ពន្ធនាគារបីឆ្នាំ ប៉ុន្តែព្យួរទោស១ឆ្នាំ និងបង្គាប់ឲ្យសងជំងឺចិត្ត ២០លានរៀល ទៅជនរងគ្រោះជាអ្នករត់ម៉ូតូឌុបពីរអ្នក។ សាលាឧទ្ធរណ៍បានប្តូរបទចោទអ្នកស្រី យ៉ោម បុប្ផា ពីបទបង្ករបួសស្នាម ទៅបទផ្តើមគំនិតហិង្សាដោយចេតនាទៅលើអ្នករត់ម៉ូតូឌុបពីរនាក់ តាមមាត្រា២៨នៃក្រមព្រហ្មទណ្ឌថ្មី៕