សង្គមស៊ីវិលចំនួន៤០ខកចិត្តចំពោះសមត្ថកិច្ចរារាំងប្រជាពលរដ្ឋចូលរួមមហាបាតុកម្ម

......................................
ដោយ៖ ពៅ មេត្ដា | ថ្ងៃសៅរ៍ ទី7 ខែកញ្ញា ឆ្នាំ2013 | 49 នាទី មុន VOD
អង្គការសង្គមស៊ីវិលចំនួន៤០ ដែលធ្វើការលើការផ្សព្វផ្សាយលទ្ធិប្រជាធិបតេយ្យ សិទ្ធិមនុស្ស និងអប់រំផ្នែកច្បាប់ សំដែងការខកចិត្តចំពោះកម្លាំងសមត្ថកិច្ចចម្រុះ ដែលរារាំងប្រជាពលរដ្ឋមកពីតាមបណ្តាខេត្ត ចូលរួមការធ្វើមហាបាតុកម្មរបស់គណបក្សសង្គ្រោះជាតិ នៅថ្ងៃសៅរ៍នេះ។
សេចក្តីថ្លែងការណ៍រួមរបស់អង្គការសង្គមស៊ីវិលទាំង៤០ ចេញផ្សាយនៅថ្ងៃនេះ បានលើកឡើងថា ការដែលសមត្ថកិច្ចដាក់របាំងពង្រាយនៅតាមផ្លូវនានា ពង្រឹងការត្រួតពិនិត្យលើប្រជាពលរដ្ឋ ដែលមានបំណងចូលរួមធ្វើមហាបាតុកម្មដោយអហិង្សារបស់គណបក្សសង្គ្រោះជាតិនោះ ថា ជាការរំលោភលើសិទ្ធិសេរីភាពបញ្ចេញមតិ និង សិទ្ធិធ្វើដំណើររបស់ ប្រជាពលរដ្ឋ។
អង្គការសង្គមស៊ីវិលទាំង៤០នោះ រួមមាន គណៈកម្មាធិការប្រព្រឹត្តកម្ម មណ្ឌលមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព សមាគមការពារសិទ្ធិមនុស្សអាដហុក អង្គការនិកហ្វ្រិច និងអង្គការខុមហ្វ្រែលជាដើម។

អង្គការសង្គមស៊ីវិល ក៏ស្នើឲ្យរដ្ឋាភិបាលអប់រំសមត្ថកិច្ច ដែលរារាំងប្រជាពលរដ្ឋទាំងនោះ ឲ្យយល់ពីសិទ្ធិសេរីភាពធ្វើដំណើររបស់ប្រជាពលរដ្ឋ និងស្នើឲ្យរាជរដ្ឋាភិបាល ជាភាគីនៃសន្និសញ្ញាអន្តរជាតិស្តីពីសិទ្ធិមនុស្ស គោរពសិទ្ធិមនុស្សពិសេស សិទ្ធិសំដែងមតិ សិទ្ធិជួបប្រជុំ និងសិទ្ធិសេរីភាពក្នុងការធ្វើដំណើរ៕

សូមសរសេរមកកាន់ លោក ពៅ មេត្តា តាមរយៈ minpov@vodhotnews.com