ក្រសួងសាធារណការ និងដឹកជញ្ជូនកម្ពុជា សហការជាមួយទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន ចៃកា (JICA) បានបើកសិក្ខាសាលាបង្ហាញអំពីគោលនយោបាយជាតិ ស្ដីពី កំពង់ផែ និងប្រព័ន្ធគ្រប់គ្រងកំពង់ផែ ដើម្បីផ្សព្វផ្សាយគោលនយោបាយស្ដីពីប្រព័ន្ធគ្រប់គ្រងកំពង់ផែ ដែលទើបបង្កើតថ្មីនេះ ទៅដល់ក្រសួង និងកំពង់ផែឯកជន និងភាគីពាក់ព័ន្ធដទៃទៀត។
ដោយ វោហារ ជាតិ 2013-10-18
គោលនយោបាយជាតិថ្មីនេះ មានបំណងសំដៅធានាការអភិវឌ្ឍវិស័យកំពង់ផែ ប្រកបដោយចីរភាព និងប្រសិទ្ធភាពខ្ពស់។
នេះជាលើកដំបូងហើយដែលកម្ពុជា ប្រកាសផ្សព្វផ្សាយអំពីគោលនយោបាយជាតិ ស្ដីពី កំពង់ផែ និងប្រព័ន្ធគ្រប់គ្រងកំពង់ផែ ស្រពពេលដែលសេដ្ឋកិច្ចកម្ពុជា កំពុងមានកំណើនសេដ្ឋកិច្ចជាបណ្ដើរៗ។
រដ្ឋមន្ត្រីក្រសួងសាធារណការ និងដឹកជញ្ជូន លោក ត្រាំ អ៊ីវតឹក បានប្រកាសប្រាប់មន្ត្រីរាជការ រួមទាំងតំណាងក្រុមហ៊ុនឯកជននានា ដែលចូលរួមពិធីនោះថា កំពង់ផែ មានតួនាទីសំខាន់ណាស់ក្នុងការជំរុញសកម្មភាពពាណិជ្ជកម្មគ្រប់ប្រភេទ និងអភិវឌ្ឍសេដ្ឋកិច្ចជាតិ ជាមួយប្រទេសក្នុងតំបន់ និងអន្តរជាតិ។ លោកថា ដើម្បីឲ្យកំពង់ផែកម្ពុជា អាចប្រកួតប្រជែងជាមួយប្រទេសក្នុងតំបន់ និងអន្តរជាតិបាន លុះត្រាកម្ពុជា មានកំពង់ផែ ទំនើប និងប្រព័ន្ធគ្រប់គ្រងទាន់សម័យ។
នៅក្នុងសិក្ខាសាលាពេញមួយព្រឹកថ្ងៃទី១៧ តុលា នៅសណ្ឋាគារ ឡឺ រ៉ូយ៉ាល់ (Le Royal) រាជធានីភ្នំពេញ ដែលមានមន្ត្រីរដ្ឋាភិបាល ភ្នាក់ងារក្រុមហ៊ុនឯកជនជាតិ និងអន្តរជាតិ ជាង ១០០នាក់ ចូលរួមនោះ បានពិភាក្សាគ្នាផ្ដោតលើការរៀបចំកំពង់ផែឲ្យមានចីរភាព អាចផ្ដល់សេវាមួយដែលអ្នកប្រើប្រាស់ទុកចិត្តបាន មានលក្ខណៈងាយស្រួល លើកដាក់ទំនិញឆាប់រហ័ស តម្លៃសមរម្យ មានសន្តិសុខ និងសុវត្ថិភាពដល់នាវា ទំនិញ និងអ្នកធ្វើដំណើរ ព្រមទាំងចូលរួមចំណែកការពារបរិស្ថាន ដើម្បីមានសមត្ថភាពប្រកួតប្រជែងជាមួយកំពង់ផែផ្សេងៗទៀត នៅក្នុងតំបន់ និងអន្តរជាតិ។
អគ្គនាយកនៃអគ្គនាយកដ្ឋានដឹកជញ្ជូនក្រសួងសាធារណការ លោក ចាន់ តារា ដែលដឹកនាំកិច្ចពិភាក្សាក្នុងសិក្ខាសាលានោះ បានបញ្ជាក់ថា ការផ្សព្វផ្សាយគោលនយោបាយជាតិស្ដីអំពីប្រព័ន្ធគ្រប់គ្រងកំពង់ផែ នេះ ក៏ជាសារថ្មីមួយដែលរដ្ឋាភិបាលបើកឱកាសឲ្យវិនិយោគិនមានសិទ្ធិចាប់ផ្ដើមវិនិយោគលើវិស័យកំពង់ផែ នៅកម្ពុជា បានដែរ៖ «គឺក្នុងអត្ថន័យមួយ គឺដើម្បីទាក់ទាញអ្នកវិនិយោគទុនទាំងអស់ដែលមានការពាក់ព័ន្ធជាមួយកំពង់ផែហ្នឹង ដែលលោកមានទុន ហើយចង់វិនិយោគកំពង់ផែ នៅក្នុងព្រះរាជាណាចក្រកម្ពុជា នេះ គឺថាលោកអាចចូលមកវិនិយោគបាន ហើយយើងបានគោលនយោបាយនេះ គឺថាបង្កើតបរិយាកាសមួយដែលឲ្យអ្នកវិនិយោគអាចចូលរួមបាន ធ្វើការជាមួយរដ្ឋាភិបាលដើម្បីវិនិយោគកំពង់ផែ ធ្វើប្រតិបត្តិការកំពង់ផែ ដើម្បីរកផលចំណេញទទួលទានបាន»។
កម្ពុជា សព្វថ្ងៃមានកំពង់ផែពីរ គឺកំពង់ផែសមុទ្រខេត្តព្រះសីហនុ និងកំពង់ផែភ្នំពេញ ជារបស់រដ្ឋ ហើយដាក់ឲ្យប្រតិបត្តិការជាស្វយ័ត។ ក្រៅពីនេះ របាយការណ៍ក្រសួងសាធារណការ និងដឹកជញ្ជូន បង្ហាញថា មានកំពង់ផែឯកជនផ្សេងទៀត ដូចជាកំពង់ផែសមុទ្រកែវផុស ស្ទឹងហាវ កំពត ស្រែអំបិល កោះកុង និងកំពង់ផែតូចៗនៅតាមប្រព័ន្ធទន្លេមេគង្គជាច្រើន កំពុងប្រតិបត្តិការអាជីវកម្ម។
ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ចៃកា លោក យូកូអិ ហ៊ីរូយូគី (Yokoi Hiroyuki) តំណាង ចៃកា បញ្ជាក់ថា គម្រោងស្ដីពី កំពង់ផែ និងប្រព័ន្ធគ្រប់គ្រងកំពង់ផែ នេះ ចៃកា បានធ្វើការជាមួយក្រសួងសាធារណការកម្ពុជា ចាប់តាំងពីឆ្នាំ២០០៩ មកម្ល៉េះ។ លោកថា គម្រោងនេះអាចជួយឲ្យកម្ពុជា មានឱកាសចូលរួមប្រកួតប្រជែងផ្នែកសេវាកម្មដឹកជញ្ជូនតាមផ្លូវសមុទ្ររបស់សហគ្រាស និងក្រុមហ៊ុនឯកជននានា នៅពេលកម្ពុជា ធ្វើសមាហរណកម្មសេដ្ឋកិច្ចអាស៊ាន នៅឆ្នាំ២០១៥ ខាងមុខ។ ក៏ប៉ុន្តែ លោកថា ប៉ុណ្ណេះនៅមិនទាន់គ្រប់គ្រាន់ទេ កម្ពុជា ត្រូវការអភិវឌ្ឍលើផ្នែកការងារកំពង់ផែជាច្រើនទៀត ដើម្បីប្រកួតប្រជែងជាមួយប្រទេសអាស៊ាន ជាពិសេសប្រទេសជឿនលឿនជិតខាង ដូចជា វៀតណាម និងថៃ ដែលមានប្រព័ន្ធគ្រប់គ្រងកំពង់ផែទំនើប និងយកថ្លៃសេវាថោកជាងកម្ពុជា។ ត្រង់នេះ លោកថា កម្ពុជា ងាយប្រឈមមុខពីរ គឺបាត់បង់ឱកាស និងមានឱកាស។ បាត់បង់ឱកាស គឺថាបើសិនជាប្រព័ន្ធគ្រប់គ្រងកំពង់ផែកម្ពុជា ទុកនៅដដែលដូចសព្វថ្ងៃនេះ ឧបករណ៍ សម្ភារៈកំពង់ផែ មិនទំនើប យកថ្លៃសេវាថ្លៃជាងប្រទេសជិតខាង ខ្វះប្រព័ន្ធគមនាគមន៍ជាដើម។ កម្ពុជា អាចមានឱកាសដណ្ដើមយកទីផ្សារដឹកជញ្ជូននៅក្នុងតំបន់បាន លុះត្រាតែកម្ពុជា ពង្រឹងរចនាសម្ព័ន្ធរូបវន្ត និងរចនាសម្ព័ន្ធសំណុំនៃផ្នែកនានាជាសេវា សម្រាប់បម្រើវិស័យផលិតកម្ម ឬមិនផលិតកម្មនៃសេដ្ឋកិច្ចជាតិ។
នៅក្នុងសិក្ខាសាលានោះដែរ តំណាងក្រុមហ៊ុនដឹកជញ្ជូនឯកជនក៏បានត្អូញត្អែរដែរថា តម្លៃសេវាកម្មកំពង់ផែអន្តរជាតិកម្ពុជា បានយកថ្លៃខ្ពស់ជាងកំពង់ផែប្រទេសជិតខាង ដូចជាប្រទេសវៀតណាម ថៃ ជាដើម ដែលធ្វើឲ្យអ្នកវិនិយោគបរទេសភាគច្រើន បានព្យាយាមមិនដឹកទំនិញចូលច្រកកំពង់ផែកម្ពុជា បែរជានាំគ្នាដឹកចូលកំពង់ផែប្រទេសជិតខាង ធ្វើឲ្យបាត់បង់ប្រាក់ចំណូលជាតិច្រើន។ តំណាងក្រុមហ៊ុនឯកជនទាំងនោះបានទាមទារឲ្យរដ្ឋាភិបាល ពិចារណាឡើងវិញអំពីតម្លៃខ្ពស់នេះ។
ទាក់ទងការយកថ្លៃសេវាកំពង់ផែថ្លៃនេះ លោក ចាន់ តារា បានលើកហេតុផលថា ការកំណត់យកថ្លៃខ្ពស់នេះ មិនមែនធ្វើឡើងដោយរដ្ឋាភិបាលតែម្ខាងនោះទេ គឺមានក្រុមហ៊ុនផ្សេងៗទៀត រួមទាំងវិនិយោគិនបរទេសមួយចំនួន បានរួមចំណែកធ្វើឲ្យសេវាកម្មនេះឡើងថ្លៃដែរ។
ចំពោះការទាមទារឲ្យបញ្ចុះតម្លៃសេវាកម្មកំពង់ផែនេះ លោក ចាន់ តារា បានឆ្លើយថា លោកនឹងយករឿងនេះទៅពិភាក្សាជាមួយលោករដ្ឋមន្ត្រីក្រសួងសាធារណការ និងដឹកជញ្ជូន។ បន្ថែមលើនេះ លោកបញ្ជាក់ថា តម្លៃសេវាកម្មកំពង់ផែ ក៏នឹងធ្លាក់ចុះជាស្វ័យប្រវត្តិដែរ នៅពេលគោលនយោបាយជាតិ ស្ដីពី កំពង់ផែ និងប្រព័ន្ធគ្រប់គ្រងកំពង់ផែ ដំណើរការពេញលេញ៕
No comments:
Post a Comment