នៅតាមមូលដ្ឋាននៃខេត្តកំពង់ឆ្នាំង អាជ្ញាធរនៅតែបន្តគំរាមកំហែងប្រជាពលរដ្ឋ និងសកម្មជនគណបក្សសង្គ្រោះជាតិ មិនឲ្យដើរប្រមូលស្នាមមេដៃ ដើម្បីគាំទ្រញត្តិរបស់គណបក្សសង្គ្រោះជាតិ ដែលគ្រោងនឹងដាក់ជូនតំណាងអង្គការសហប្រជាជាតិប្រចាំនៅកម្ពុជា នាថ្ងៃទី២៣ ខែតុលា។
 |
| ប្រជាពលរដ្ឋចូលរួមក្នុងសមាជបក្សសង្គ្រោះជាតិ ផ្ដិតមេដៃគាំទ្រញត្តិទាមទារតវ៉ារបស់បក្សសង្គ្រោះជាតិ នាទីលានប្រជាធិបតេយ្យ រាជធានីភ្នំពេញ កាលពីថ្ងៃទី៦ ខែតុលា ឆ្នាំ២០១៣។ Photo: RFA |
ដោយ ជិន ជេដ្ឋា 2013-10-18
មន្ត្រីគណបក្សសង្គ្រោះជាតិ បានព្រមានធ្វើបាតុកម្មប្រឆាំងទៅនឹងសកម្មភាពរារាំងរបស់អាជ្ញាធរនេះ ប្រសិនបើនៅតែបន្តការរឹតត្បិតសេរីភាពបញ្ចេញមតិរបស់ប្រជាពលរដ្ឋម្ចាស់ឆ្នោត។
គិតត្រឹមថ្ងៃទី១៧ ខែតុលា មន្ត្រីគណបក្សសង្គ្រោះជាតិ ប្រចាំខេត្តកំពង់ឆ្នាំង ប្រមូលស្នាមមេដៃរបស់ប្រជាពលរដ្ឋ ដើម្បីគាំទ្រញត្តិបានចំនួន ៦០% ហើយ ក្នុងចំណោមស្នាមមេដៃត្រូវការសរុបនៅទូទាំងខេត្តជាង ៩ម៉ឺនស្នាមមេដៃ បើទោះបីជាមានការរារាំងពីអាជ្ញាធរតាមមូលដ្ឋានក៏ដោយ។
មន្ត្រី និងជាសកម្មជនគាំទ្រគណបក្សសង្គ្រោះជាតិ ប្រចាំខេត្តកំពង់ឆ្នាំង លោក ដួង ចន្ដ្រា ថ្លែងថា សកម្មភាពរារាំង និងគំរាមកំហែងរបស់អាជ្ញាធរ ហាក់ធ្វើឡើងជាប្រព័ន្ធ ជាពិសេសនៅស្រុកជលគីរី ស្រុកកំពង់លែង និងស្រុករលាប្អៀរ។ លោកបន្តថា អាជ្ញាធរភូមិឃុំនៅតាមបណ្ដាស្រុកមួយចំនួននៃខេត្តកំពង់ឆ្នាំង បានធ្វើការគំរាមកំហែងទៅលើសកម្មជន និងប្រជាពលរដ្ឋដោយចំហ តាមរយៈការស្រែកដាក់ឧបករណ៍បំពងសំឡេងនៅតាមមូលដ្ឋាន។
លោក ដួង ចន្ដ្រា៖ «យើងបានរៀបជាកម្លាំងចុះជួយអន្តរាគមន៍ភ្លាមៗ នៅពេលដែលសកម្មជនយើងចុះទៅប្រមូលស្នាមមេដៃមានបញ្ហានោះ យើងមានក្រុមអន្តរាគមន៍ក្នុងមួយស្រុកពី ១០នាក់ទៅ ១៥នាក់ កិច្ចអន្តរាគមន៍ធ្វើទៅតាមផ្លូវច្បាប់ យើងទៅចរចាផ្ទាល់ជាមួយនឹងសមត្ថកិច្ចដែលមានមេឃុំ មានប៉ូលិសជាដើម ដែលជាអ្នកឃាត់ឃាំងនោះ ដើម្បីពន្យល់ពីការតស៊ូមតិរបស់យើងតាមញត្តិ ដើម្បីដាក់ជូនទៅអង្គការសហប្រជាជាតិ»។
អភិបាលនៃគណៈអភិបាលខេត្តកំពង់ឆ្នាំង លោក ឈួរ ច័ន្ទឌឿន មានប្រសាសន៍ថា លោកមិនទាន់ទទួលបានព័ត៌មានជុំវិញករណីនេះទេ ក៏ប៉ុន្តែ លោកថាសកម្មភាពដើរប្រមូលស្នាមមេដៃ ឬធ្វើអ្វីមួយ គេត្រូវតែសុំការអនុញ្ញាត ឬផ្ដល់ព័ត៌មានជាមុនដល់អាជ្ញាធរ បើមិនដូច្នោះទេ សកម្មភាពទាំងនោះ គឺធ្វើឡើងដោយខុសច្បាប់៖ «បើសិនមានអ្នកធ្វើក៏ដោយ តែអត់សុំច្បាប់វាខុស តែកាលណាខុសច្បាប់ អ្នកហ្នឹងត្រូវតែទទួលខុសត្រូវចំពោះមុខច្បាប់ ព្រោះអាពួកអ្នកធ្វើដែលលោកឯងនិយាយរឿងសង្គ្រោះជាតិ វាអត់ដែលរាយការណ៍ឲ្យអាជ្ញាធរឯណា»។
បន្ថែមលើនេះ មន្ត្រីនាំពាក្យរបស់ក្រសួងមហាផ្ទៃ លោក ខៀវ សុភ័គ ធ្លាប់មានប្រសាសន៍ប្រាប់វិទ្យុអាស៊ីសេរី ថា ក្រសួង ឬអាជ្ញាធរមិនដែលហាមឃាត់គណបក្សសង្គ្រោះជាតិ មិនឲ្យដើរប្រមូលស្នាមមេដៃពលរដ្ឋនោះទេ ក៏ប៉ុន្តែ សកម្មភាពនេះត្រូវតែធ្វើឡើងនៅតាមទីស្នាក់ការគណបក្សរបស់ខ្លួន ដើម្បីកុំឲ្យខុសទៅនឹងគោលការណ៍បោះឆ្នោតដោយសម្ងាត់។
ទាក់ទងនឹងបញ្ហានេះ នាយកប្រតិបត្តិនៃគណៈកម្មាធិការរៀបចំការបោះឆ្នោតដោយសេរី និងយុត្តិធម៌នៅកម្ពុជា ខុមហ្វ្រែល (Comfrel) លោក គល់ បញ្ញា ពន្យល់ថា ការសម្ដែងមតិ ឬសកម្មភាពប្រមូលស្នាមមេដៃរបស់ប្រជាពលរដ្ឋ ដើម្បីសម្ដែងនូវការមិនពេញចិត្តអ្វីមួយនោះ គឺអាចធ្វើឡើងនៅទីកន្លែងណាក៏បាន ហើយវាក៏មិនអាចធ្វើឲ្យប៉ះពាល់ដល់គោលការណ៍បោះឆ្នោតដោយសម្ងាត់នោះដែរ ពីព្រោះថា គោលការណ៍សម្ងាត់នេះគេអនុវត្តតែនៅក្នុងអំឡុងពេលនៃការបោះឆ្នោតប៉ុណ្ណោះ៖ «ការងារហ្នឹងធ្វើដោយសកម្មភាពអាជ្ញាធរ ដោយមេភូមិ ដោយមន្ត្រីរាជការកងកម្លាំងប្រដាប់អាវុធ អាហ្នឹងមានបញ្ហា បើគ្រាន់ថាសម្ដែងមតិតាមរយៈហត្ថលេខា តាមរយៈការផ្ដិតមេដៃអី វាជារឿងដែលអាចធ្វើបាន ទាល់តែសុំការអនុញ្ញាតវីវរ ហើយរដ្ឋអំណាចយើងមានបញ្ហាហើយ»។
មន្ត្រីគណបក្សសង្គ្រោះជាតិ បញ្ជាក់ថា សកម្មភាពប្រមូលស្នាមមេដៃពលរដ្ឋម្ចាស់ឆ្នោត ដើម្បីគាំទ្រញត្តិដាក់ជូនអង្គការសហប្រជាជាតិ និងប្រទេសហត្ថលេខីនៃកិច្ចព្រមព្រៀងទីក្រុងប៉ារីស ២៣ តុលា ឲ្យជួយដោះស្រាយវិបត្តិនយោបាយ ដែលកំពុងតែកើតមាននៅកម្ពុជា ត្រូវបានមេភូមិ មេឃុំ និងនាយប៉ុស្តិ៍នគរបាល រដ្ឋបាលឃុំមួយចំនួនក្នុងខេត្តកំពង់ឆ្នាំង រារាំងជាបន្តបន្ទាប់៕
No comments:
Post a Comment