មន្ត្រីផ្នែកអង្កេតនៃអង្គការសិទ្ធិមនុស្សលីកាដូ (Licadho) ប្រចាំខេត្តកំពង់ឆ្នាំង លោក ខុន ខូយ ផ្ដល់បទសម្ភាសន៍ ជាមួយវិទ្យុអាស៊ីសេរី កាលពីថ្ងៃទី២៩ ខែតុលា ឆ្នាំ២០១៣។ RFA/Chhin Chetha |
ដោយ ជិន ជេដ្ឋា 2013-10-30
មន្ត្រី សិទ្ធិមនុស្សបញ្ជាក់ថា ករណីនេះសមត្ថកិច្ចត្រូវតែស៊ើបអង្កេតឲ្យបានម៉ត់ចត់ និងផ្ដល់យុត្តិធម៌ជូនជនរងគ្រោះ ដើម្បីកុំឲ្យប្រទេសកម្ពុជា ទទួលរងនូវការរិះគន់ថា ជាប្រទេសពុំមានយុត្តិធម៌ ឬសន្តិសុខសុវត្ថិភាពសម្រាប់ជនជាតិបរទេស។
ការ អំពាវនាវរបស់មន្ត្រីអង្គការសិទ្ធិមនុស្សនេះ ធ្វើឡើងស្របពេលដែលមានការនិយាយតៗគ្នារបស់អ្នកឃុំពន្លៃ ស្រុកបរិបូរណ៍ ថា ជនសង្ស័យត្រូវបានគ្រួសារដាក់ប្រាក់តម្កល់ ដើម្បីសុំឲ្យនៅក្រៅឃុំបណ្ដោះអាសន្ន ក៏ប៉ុន្តែទាំងខាងមន្ត្រីតុលាការ និងពន្ធនាគារ ខេត្តកំពង់ឆ្នាំង បានឆ្លើយបដិសេធចំពោះពាក្យចចាមអារ៉ាមទាំងនេះ។
នាយក ក្រឡាបញ្ជីព្រះរាជអាជ្ញានៃសាលាដំបូងខេត្តកំពង់ឆ្នាំង លោក ហ៊ឹម ពុទ្ធាសុរិយៈ ថ្លែងថា ជនសង្ស័យកំពុងតែជាប់ឃុំក្នុងពន្ធនាគារ ហើយសំណុំរឿងបានបញ្ជូនទៅចៅក្រមស៊ើបសួររួចហើយ ក៏ប៉ុន្ដែលោកមិនបានដឹងច្បាស់ថា សំណុំរឿងនេះកំពុងតែនៅក្នុងដៃចៅក្រមណានោះទេ៖ «អាហ្នឹងបើអត់មានដីកា ខ្ញុំមិនអាចនិយាយបានទេ ឲ្យគាត់យកដីកាដោះលែងហ្នឹង ហើយគាត់ថត ហើយគាត់ផ្សព្វផ្សាយទៅ បើសិនជាមាន។ បើសិនជាអត់ទេ ខ្ញុំមិនដឹងថាម៉េច ហើយនៅអំឡុងពេលដែលចាត់ការហ្នឹង ខ្ញុំមានការនៅឯស្វាយរៀង ខ្ញុំអត់បាននៅទេបងមួយអាទិត្យ ហើយខ្ញុំទើបមកថ្ងៃច័ន្ទ នេះទេ»។
វិទ្យុ អាស៊ីសេរី មិនអាចស្វែងរកប្រភពទាក់ទងចៅក្រមស៊ើបសួរនៃសាលាដំបូងខេត្ត កំពង់ឆ្នាំង ដែលកាន់សំណុំរឿងនេះ និងអធិការប៉ូលិសស្រុកបរិបូរណ៍ លោក ជាង សុវណ្ណរិទ្ធិ ដើម្បីសុំការអត្ថាធិប្បាយបន្ថែមជុំវិញករណីនេះបានទេ នៅរសៀលថ្ងៃទី២៩ ខែតុលា។
របាយការណ៍ស៊ើបអង្កេតរបស់ មន្ត្រីអង្គការសិទ្ធិលីកាដូ ប្រចាំខេត្តកំពង់ឆ្នាំង បានឲ្យដឹងថា នៅរសៀលថ្ងៃទី២១ ខែតុលា ស្ត្រីជនជាតិអាមេរិក ម្នាក់ អាយុ ២៣ឆ្នាំ ជាអ្នកបម្រើការងារស្ម័គ្រចិត្តរបស់អង្គការ ភីស ខរ (Peace corp) បំពេញបេសកកម្មនៅក្នុងមណ្ឌលសុខភាពពន្លៃ ត្រូវបានជនសង្ស័យប៉ុនប៉ងចាប់រំលោភ ខណៈដែលស្ត្រីរូបនោះកំពុងតែជិះកង់ហាត់ប្រាណនៅតាមបណ្ដោយផ្លូវ ជាតិលេខ៥។ ជនល្មើសបានជិះម៉ូតូដេញតាមពីក្រោយមកដល់ចំណុចអូរតាយស ក្នុងភូមិក្បាលដំរី ឃុំត្រពាំងចាន់ ស្រុកបរិបូរណ៍ ក៏បានឈប់ម៉ូតូរបស់ខ្លួនពាំងពីខាងមុខកង់របស់ស្ត្រីរងគ្រោះ។ ភ្លាមនោះ ជនសង្ស័យក៏បានយកដៃម្ខាងលូកចាប់ទ្រូង និងដៃម្ខាងទៀតចាប់ទាញភ្លៅ បម្រុងផ្ដួលចាប់រំលោភ ក៏ប៉ុន្តែមិនបានសម្រេច ដោយជនរងគ្រោះបានប្រតាយប្រតប់រួចខ្លួន។ ហើយក៏បានជិះកង់ត្រឡប់ក្រោយទាំងភាពភ័យខ្លាច ទៅកាន់ផ្ទះជួលរបស់ខ្លួនវិញ នៅភូមិពន្លៃ ឃុំពន្លៃ ស្រុកបរិបូរណ៍ ខេត្តកំពង់ឆ្នាំង។
នៅថ្ងៃទី២៣ ខែតុលា ឆ្នាំ២០១៣ សមត្ថកិច្ចបានស៊ើបអង្កេត និងឃុំខ្លួនបណ្ដោះអាសន្នទៅលើជនសង្ស័យម្នាក់ឈ្មោះ លី ចាន់រិទ្ធិ ហៅ គារ អាយុ ៣៦ឆ្នាំ មុខរបរជាគ្រូបង្រៀននៅសាលាបឋមសិក្សា សម្ដេច មុនី រស់នៅភូមិដកព ឃុំខុនរ៉ង ស្រុកបរិបូរណ៍ ខេត្តកំពង់ឆ្នាំង។
មន្ត្រី ផ្នែកអង្កេតនៃអង្គការសិទ្ធិមនុស្សលីកាដូ ប្រចាំខេត្តកំពង់ឆ្នាំង លោក ខុន ខូយ មានប្រសាសន៍ថា ក្រោយការចុះស៊ើបអង្កេតរបស់លោកជាមួយមន្ត្រីសមាគមអាហុក លោកសន្និដ្ឋានបានថា ពិតជាមានករណីប៉ុនប៉ងលើជនបរទេសរូបនោះមែន។ លោកសូមឲ្យតុលាការ និងនគរបាលយុត្តិធម៌ ជួយរកយុត្តិធម៌ជូនជនរងគ្រោះឲ្យបានឆាប់៖ «ភ្ញៀវបរទេសដែលគេបានឮ ឬបានដឹងនូវដំណឹងហ្នឹង គឺគេមានការភ័យខ្លាច ឬក៏ព្រួយបារម្ភ។ អាហ្នឹង វាជាកត្តាមួយដែលប៉ះពាល់ទៅដល់ប្រទេសរបស់យើង»។
របាយការណ៍ ស៊ើបអង្កេតរបស់សមាគមអាដហុក (Adhoc) ខេត្តកំពង់ឆ្នាំង រយៈពេល ១០ខែ ក្នុងឆ្នាំ២០១៣ ខាងសមាគមទទួលបានករណីរំលោភសេពសន្ថវៈចំនួន ៨ករណី ហើយករណីជួញដូរមនុស្សមានចំនួន ២៧ករណី៕
1 comment:
It shame of regime Hun today.
Post a Comment