គណបក្សប្រជាជនកម្ពុជា បានអះអាងហើយថា ការបោះឆ្នោតក្នុងនីតិកាលទីប្រាំនេះ បានទទួលសំឡេងឆ្នោតដ៏ច្រើនលើសលប់ដាច់ខាតនៅក្នុងសភា។ ស្របពេលជាមួយគ្នានេះដែរ គណៈកម្មាធិការជាតិរៀបចំការបោះឆ្នោត (គ.ជ.ប) ក៏បានប្រកាសជាផ្លូវការរួចហើយដែរថា គណបក្សប្រជាជនកម្ពុជា ទទួលបាន ៦៨អាសនៈ ក្នុងចំណោមអាសនៈសរុប ១២៣។ ចំណែកគណបក្សសង្គ្រោះជាតិ បានត្រឹម ៥៥អាសនៈ ក្នុងការប្រកួតប្រជែងប៉ុណ្ណោះ។
 |
| ក្បួនហែគណបក្សប្រជាជនកម្ពុជា និងគណបក្សសង្គ្រោះជាតិ ក្នុងយុទ្ធនាការឃោសនាបោះឆ្នោត កាលពីថ្ងៃទី១២ ខែកក្កដា ឆ្នាំ២០១៣។ RFA/Mom Sophon |
ប៉ុន្តែ អង្គការសង្គមស៊ីវិលដែលស្រាវជ្រាវអំពីលទ្ធផលក្រោយការបោះឆ្នោតវិញ ឲ្យដឹងថា គណបក្សប្រជាជនកម្ពុជា មិនមែនជាអ្នកឈ្នះឆ្នោតទេ។ តែការរកឃើញថាឈ្នះនេះ គឺឈ្នះលើតែរូបមន្តគណនាសំឡេងឆ្នោតប៉ុណ្ណោះ។
អង្គការសង្គមស៊ីវិល ព្រមានថា គណបក្សកាន់អំណាចអាចនឹងត្រូវប្រឈមមុខបាត់បង់កៅអីធ្ងន់ធ្ងរនៅក្នុងការបោះឆ្នោតសកលឆ្នាំ២០១៨ ខាងមុខ បើទោះបីជាគណបក្សដែលគ្រប់គ្រងអំណាចជាប់ៗគ្នាអស់រយៈពេល ៤អាណត្តិមកហើយនេះ ប្រកាសធ្វើកំណែទម្រង់គោលនយោបាយដ៏ស៊ីជម្រៅ សម្រាប់នីតិកាលទី៥ នេះក្ដី។
ការរកឃើញអំពីការធ្លាក់ចុះនៃប្រជាប្រិយភាពរបស់គណបក្សកាន់អំណាចនេះ ថានឹងពុំមានឥទ្ធិពលតតាំងទៀតនោះ ធ្វើឡើងនៅក្នុងកិច្ចពិគ្រោះយោបល់មួយរបស់សង្គមស៊ីវិល ដែលរៀបចំដោយមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ កាលពីថ្ងៃទី៨ ខែកញ្ញា នៅខេត្តសៀមរាប។
លោក កែម ឡី អ្នកស្រាវជ្រាវសង្គម និងជាអ្នកវិភាគឯករាជ្យផង និយាយថា គណបក្សប្រជាជនកម្ពុជា ទំនងនឹងលែងជាគូប្រកួតដ៏មានឥទ្ធិពល និងស្វិតស្វាញទៀតហើយ ក្នុងរយៈពេល ៥ឆ្នាំខាងមុខទៀតនេះ។ លោកបន្តថា យោងលើរបាយការណ៍នៃការស្រាវជ្រាវថ្មីៗក្នុងពេលកន្លងទៅ ក្រោយការបោះឆ្នោតរកឃើញថា ពលរដ្ឋម្ចាស់ឆ្នោតនឹងមិនមានជំនឿទៀតទេលើគណបក្សប្រជាជនកម្ពុជា បើទោះជាលោកនាយករដ្ឋមន្ត្រី ហ៊ុន សែន បានប្រកាសអំពីគោលនយោបាយកែទម្រង់ដ៏ស៊ីជម្រៅ កាលពីថ្ងៃទី២៥ កញ្ញា ក្តី។
ប៉ុន្តែ មន្ត្រីរដ្ឋាភិបាលវិញ បានប្រតិកម្មប្រឆាំងនឹងការទស្សន៍ទាយលទ្ធផលទុកជាមុននេះ ដោយចាត់ទុកថា គួរមើលឲ្យឃើញពីអ្វីដែលរដ្ឋាភិបាលកំពុងកែទម្រង់គោលនយោបាយឲ្យប្រាកដជាមុនសិន។ លើសពីនេះ សង្គមស៊ីវិលគួរបង្កើនកិច្ចសហប្រតិបត្តិការជាមួយរដ្ឋាភិបាល ក្នុងន័យធ្វើឲ្យយុទ្ធសាស្ត្រនៃការកែទម្រង់នេះមានភាពជោគជ័យ។
យ៉ាងក៏ដោយចុះ នៅក្នុងនីតិកាលទីប្រាំនេះ គណបក្សប្រជាជនកម្ពុជា របស់លោកនាយករដ្ឋមន្ត្រី ហ៊ុន សែន បានរបូតកៅអីពីសភាប្រមាណ ២០អាសនៈ ក្នុងចំណោមអាសនៈសរុប ១២៣ ដែលគណបក្សនេះធ្លាប់ឈ្នះរួចទៅហើយ។ អ្នកវិភាគគិតថា នេះជាការបាត់បង់ដ៏ច្រើនលើសលប់មួយដែលពុំធ្លាប់មានរបស់គណបក្សកាន់អំណាចដ៏យូរមួយនេះ ចាប់តាំងពីមានយុទ្ធនាការបោះឆ្នោត ឆ្នាំ១៩៩៣ មក។ នៅក្នុងអាណត្តិទី៤ គណបក្សគ្របគ្រងអំណាច ធ្លាប់ទទួលបានសំឡេងគាំទ្ររហូតដល់ ៩០អាសនៈនៅក្នុងសភា។
ឆ្លងកាត់បទពិសោធន៍អស់រយៈពេលជិត ៣០ឆ្នាំមកនេះ គណបក្សប្រជាជនកម្ពុជា ដែលបានគ្រងអំណាចដ៏យូរជាងគេក្នុងប្រវត្តិសាស្ត្រនយោបាយនៅកម្ពុជា ទើបទទួលបានការធ្លាក់ទឹកចិត្ត ដែលនឹកស្មានមិនដល់។ នេះអាចរាប់បានថា ការប្រែប្រួលទឹកចិត្តរបស់អ្នកគាំទ្រ និងចលនានៃការផ្លាស់ប្ដូរ ទំនងជាអាចទាញទម្លាក់គណបក្សគ្រប់គ្រងអំណាចមួយនេះក្នុងរយៈពេល ៥ឆ្នាំខាងមុខទៀត។
បើទោះជាបែបនេះក៏ដោយចុះ ប៉ុន្តែ លោក ទិត្យ សុធា មន្ត្រីនាំពាក្យនៃអង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី យល់ឃើញថា ការវិភាគរបស់សង្គមស៊ីវិលមិនត្រឹមត្រូវ និងចំទិសដៅឡើយ។ លោកបន្តថា ការកែទម្រង់គោលនយោបាយ នៅមិនទាន់ចាប់ផ្ដើមផង តែការសន្និដ្ឋានរបស់អង្គការក្រៅរដ្ឋាភិបាលទាំងនេះ ហាក់បានដើរមុនមួយជំហានទៅហើយ ជាពិសេសនោះ ការវាយតម្លៃនេះ គឺជាការស្រមើស្រមៃ ដោយពុំផ្អែកលើមូលដ្ឋានថែមទៀត។
ប៉ុន្តែ លោក កែម ឡី អត្ថាធិប្បាយថា ផ្អែកតាមបច្ចេកទេស និងការស្រាវជ្រាវ គណបក្សប្រជាជនកម្ពុជា ពុំមែនជាអ្នកឈ្នះពិតប្រាកដទេ។ លោកអះអាងថា អ្វីដែលគណបក្សកាន់អំណាចជោគជ័យនៅពេលនេះ គឺផ្អែកតាមរូបមន្តគណនាសំឡេង និងស៊ីបានតាមបច្ចេកទេសប៉ុណ្ណោះ។
ចំណែក លោក គល់ បញ្ញា នាយកអង្គការ ខុមហ្វ្រែល (Comfrel) មានប្រសាសន៍ថា ថ្វីត្បិតតែគេនៅមិនទាន់អាចសន្និដ្ឋានបានថា តើគណបក្សនយោបាយណាមួយដែលអាចទទួលបានសំឡេងឆ្នោតពិតប្រាកដក្ដី តែថា ភាពមិនប្រក្រតីនៃការបោះឆ្នោត ដែលហាក់បានលម្អៀងទៅរកបក្សកាន់អំណាចទៅហើយនោះ បានត្រូវគេរកឃើញយ៉ាងច្បាស់រួចទៅហើយ។
កិច្ចសន្ទនាដែលមានអង្គការសង្គមស៊ីវិល យុវជន និងបណ្ដាញផ្សព្វផ្សាយចូលរួមផង ដែលប្រើរយៈពេល ២ថ្ងៃ ក្នុងខេត្តសៀមរាប ក្រោមប្រធានបទ ការផ្សព្វផ្សាយព័ត៌មានអំពីការបោះឆ្នោត ត្រូវគេគិតថា នោះគឺជាផ្នែកមួយនៃយុទ្ធសាស្ត្រដែលឆ្លុះបញ្ចាំងឲ្យគណបក្សនយោបាយមួយ ត្រូវកែទម្រង់ចំណុចខ្វះខាតដែលខកខានមិនបានអនុវត្តក្នុងពេលកន្លងទៅ។
លោក មឿន ឈានណារិទ្ធ ប្រធានវិទ្យាស្ថានសម្រាប់ការសិក្សាផ្នែកវិស័យសារព័ត៌មាន យល់ឃើញថា ប្រព័ន្ធផ្សព្វផ្សាយ គឺជាផ្នែកមួយដ៏សំខាន់ដែលមិនអាចខ្វះបាន។ ប្រព័ន្ធព័ត៌មាននេះហើយ បានដើរតួនាទីជាសង្គមសេដ្ឋកិច្ចផង សង្គមនយោបាយផង និងជាសង្គមនាំសារផង។ ហេតុនេះ លោកគិតថា អ្នកបោះឆ្នោតដែលអាចសម្រេចចិត្តមួយដ៏ពិតប្រាកដទៅបាន គឺផ្អែកលើការទទួលបានព័ត៌មាន ដែលសុក្រឹតភាព និងអាចជឿទុកចិត្តបាន។
ការធ្លាក់ទឹកចិត្ត គឺជាជំងឺដែលមានសក្ដានុពល ដែលគេពិបាកនឹងមើលឃើញ ហើយក៏មិនអាចសន្មតត្រូវ។ តួយ៉ាង ដូចគណបក្សហ៊្វុនស៊ិនប៉ិច ក្រោយការបោះឆ្នោតកាលពីឆ្នាំ១៩៩៣ គណបក្សទទួលបានសំឡេងលើសលប់នៅក្នុងសភា។ ប៉ុន្តែ ក្រោយៗមកទៀត គណបក្សរាជានិយមមួយនេះ ត្រូវបាត់បង់ការគាំទ្រជាបន្តបន្ទាប់។ នៅនាទីចុងក្រោយ ជីវិតនយោបាយរបស់គណបក្សហ៊្វុនស៊ិនប៉ិច ក៏ត្រូវស្រុតចុះ។
សម្រាប់អ្នកវិភាគសង្គម និងអង្គការសង្គមស៊ីវិល យល់ឃើញថា ការកែទម្រង់គោលនយោបាយ នឹងមិនមានន័យសម្រាប់ការកសាងជំនឿចិត្តពីពលរដ្ឋទៀតទេនៅពេលនេះ។ អ្វីដែលម្ចាស់ឆ្នោតចង់បាននោះ គឺទាមទារឲ្យមានការផ្លាស់ប្ដូរដ៏ពិតប្រាកដមួយនៅកម្ពុជា៕
3 comments:
All together !!! Change is now...!
Go on ! All for one idea : …C.H.A.N.G.E … !
Everyone help our beloved homeland according to their ability …!!!
It’s time… HUN Sen must go !!! For the good of our youth and our beloved homeland !
That´s enough already 20-30 years...!!!
កែទម្រង់សុីឲជ្រៅជាងអាណត្តិមុន គ្រប់វិស័យ ះ បក្ខពួកនិយម គ្រួសារនិយម ពុករលួយគ្រប់
ស្ថាប័ន អយុត្តិធម៌ រឹបអូសដីអ្នកក្រ ជួលដី៩៩ឆ្នាំ កាប់បំផ្លាញព្រៃឈើ អន្តោបវេសន៍ធូររលុង
ហិនហោចជលផល រ៉ៃ យុវជនឥតការងារ ... តើ៩៩ឆ្នាំទៀតសុីភីភីអាកែបានទេ? កែមិនឡើងទេ
ទាល់តែដូរ ។
ភាសាល្ខោនអាមេបោក
សម រង្សី ,អាគឹម សុខា
និយាយភាសាពីរខុសគ្នា :
* ពេលនៅក្រៅស្រុកប្រាប់ខ្មែរថា៖
- ដេញអាយ៉ងហ៊ុន សែនចេញពីអំណាច!
- ដូរហ៊ុន សែន ដាក់ខ្លួនវិញ!
- ដេញអាយួនចេញពីស្រុកខ្មែរ ឲ្យតែខាងបាន!
_________________________________
* ដល់នៅក្នុងស្រុកនិយាយថា៖
(ឮតែពាក្យអត់ក្បាល អត់កន្ទុយ)
គឺនិយាយមួយកំណាត់ ទុកមួយកំណាត់ ..មិនច្បាស់លាស់?
(អត់ឮពាក្យអាយ៉ងហ៊ុន សែនសូម្បីមួយម៉ាត់!)
-ឮតែផ្លាស់ប្តូរ!....តែមិនដឹង ផ្លាស់ប្តូរស្អី?
-ឮតែដូរ.........តែមិនដឹង ដូរស្អី?
-ឮតែទាមទារយុត្តិធម៌?..តែមិនដឹង យុត្តិធម៌ស្អី?
Post a Comment