គណបក្សសង្គ្រោះជាតិ នៅតែប្រកាន់ជំហរធ្វើបាតុកម្ម ៣ថ្ងៃជាប់គ្នា ចាប់ពីថ្ងៃទី២៣ ដល់ថ្ងៃទី២៥ ខែតុលា ខាងមុខ បើទោះបីជាសំណើសុំធ្វើមហាបាតុកម្មអហិង្សារបស់គណបក្សប្រឆាំងនេះ នៅមិនទាន់មានការសម្រេចផ្លូវការពីសាលារាជធានីភ្នំពេញ និងក្រសួងមហាផ្ទៃ អនុញ្ញាតឲ្យធ្វើនៅឡើយ។
ថ្នាក់ដឹកនាំសាលារាជធានីភ្នំពេញ និងមន្រ្តីគណបក្សសង្គ្រោះជាតិ គ្រោងជួបចរចាគ្នាម្តងទៀតនៅព្រឹកថ្ងៃទី២១ ខែតុលា ស្តីពីសំណើធ្វើមហាបាតុកម្មអហិង្សារយៈពេល ៣ថ្ងៃ ដែលគ្រោងធ្វើនៅទីលានប្រជាធិបតេយ្យ។
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ មានប្រសាសន៍ថា កិច្ចចរចាចំនួន ៣លើករវាងមន្រ្តីគណបក្សសង្គ្រោះជាតិ ជាមួយមន្រ្តីសាលារាជធានីភ្នំពេញ នៅមិនទាន់បានលទ្ធផលអ្វីនៅឡើយទេចំពោះសំណើសុំធ្វើមហាបាតុកម្មអហិង្សា ៣ថ្ងៃជាប់គ្នា នៅទីលានប្រជាធិបតេយ្យ នៅថ្ងៃទី២៣ ដល់ថ្ងៃទី២៥ ខែតុលា។
ថ្នាក់ដឹកនាំសាលារាជធានីភ្នំពេញ បានដាក់លិខិតសុំជួបចរចាជាមួយលោក កឹម សុខា អនុប្រធានគណបក្សសង្គ្រោះជាតិ កាលពីថ្ងៃទី១៨ ខែតុលា។ ប៉ុន្តែដោយជាប់រវល់បេសកម្មចែកអំណោយឲ្យពលរដ្ឋដែលរងគ្រោះដោយសារទឹកជំនន់នៅខេត្តកំពង់ធំ លោក កឹម សុខា បានអវត្តមានក្នុងកិច្ចចរចានោះ ហើយចាត់ឲ្យមន្រ្តីគណបក្សសង្គ្រោះជាតិ ប្រមាណ ៧នាក់ ទៅចូលរួមចរចាជំនួស។
យ៉ាងណាមន្រ្តីសាលារាជធានីភ្នំពេញ មិនព្រមបើកកិច្ចប្រជុំឡើយ ហើយសម្រេចរំសាយកិច្ចប្រជុំនោះភ្លាមៗ និងបានប្រកាសលើកពេលចរចាជាមួយគណបក្សសង្គ្រោះជាតិម្តងទៀត នៅព្រឹកថ្ងៃទី២១ ខែតុលា ព្រមទាំងទទូចឲ្យលោក កឹម សុខា ចូលរួមកិច្ចប្រជុំនោះជាដាច់ខាត។
លោក យ៉ែម បុញ្ញឫទ្ធិ បញ្ជាក់ថា គណបក្សសង្គ្រោះជាតិនៅតែប្រកាន់ជំហរធ្វើមហាបាតុកម្មយ៉ាងតិច ៣ថ្ងៃនៅទីលានប្រជាធិបតេយ្យ ដែលមានអ្នកចូលរួមប្រមាណ ២ម៉ឺននាក់ បើទោះបីជាគ្មានការអនុញ្ញាតពីសាលារាជធានីភ្នំពេញ និងក្រសួងមហាផ្ទៃ។
លោកបន្តថា លោក កឹម សុខា នឹងមិនមានវត្តមានទេក្នុងកិច្ចប្រជុំនៅថ្ងៃទី២១ ខែតុលា នោះ៖ «មាន ៧ ទៅ ៨រូប ទៅចូលរួម ប៉ុន្តែឯកឧត្តម កឹម សុខា គាត់រវល់មមាញឹកមែនទែន ព្រោះទឹកលិច។ អ៊ីចឹងគាត់រវល់ដល់ថ្ងៃទី២២ យប់ បើសាលារាជធានីភ្នំពេញ ចង់ជួប គឺទៅជួបគ្នានៅទីលានប្រជាធិបតេយ្យនៅពេលព្រឹកថ្ងៃទី២៣ (តុលា)»។
គម្រោងដឹកនាំធ្វើមហាបាតុកម្មអហិង្សានេះ នឹងចាប់ពីវេលាម៉ោង ៧ព្រឹក ដល់វេលាម៉ោង ៦ល្ងាច ថ្ងៃទី២៣ ដល់ថ្ងៃទី២៥ ខែតុលា នាទីលានប្រជាធិបតេយ្យ ក៏មានសម្ដែងមតិរបស់បាតុករ ការសម្ដែងសិល្បៈចម្រៀង និងមានបញ្ចាំងខ្សែភាពយន្តឯកសារផ្សេងៗជាដើម។
មហាបាតុកម្មរបស់គណបក្សសង្គ្រោះជាតិ នឹងមានការដើរហែក្បួរយកញត្តិ មានផ្តិតស្នាមមេដៃពលរដ្ឋប្រមាណជិត ២លាននាក់ទៅអង្គការសហប្រជាជាតិ និងស្ថានទូតទាំងអស់នៅកម្ពុជា។ ក្នុងញត្តិដាក់ទៅនោះ គោលបំណងសំខាន់គឺទាមទារសុំឲ្យមានការបង្កើតគណៈកម្មការស្វែងរកការពិតនៃភាពមិនប្រក្រតីនៃការបោះឆ្នោត។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា សាលារាជធានីភ្នំពេញ នៅមិនទាន់សម្រេចយ៉ាងណាចំពោះសំណើសុំរបស់គណបក្សសង្គ្រោះជាតិ នៅឡើយទេ។ ប៉ុន្តែប្រសិនបើលោក កឹម សុខា មិនព្រមចូលប្រជុំជាមួយសាលារាជធានីភ្នំពេញ កិច្ចចរចាស្តីពីការធ្វើមហាបាតុកម្មក៏គ្មានដែរ៖ «យើងក៏បានជូនលិខិតផ្ទាល់ដៃពីម្សិលមិញទៀត នឹងមានជំនួបថ្ងៃស្អែកម៉ោង ៩ព្រឹក ពិភាក្សាលម្អិតជាមួយលោក កឹម សុខា ហើយមកដល់ថ្ងៃនេះមិនទាន់បានទទួលដំណឹងអីនៅឡើយទេ គឺនៅរង់ចាំនៅថ្ងៃស្អែកជួបគ្នាសិន»។
នៅក្នុងលិខិតបក្សសង្គ្រោះជាតិ បានស្នើយកទីធ្លានៅសងខាងទីលានប្រជាធិបតេយ្យ ដើម្បីសង់ជាវេទិកា និងរោងសម្រាប់បាតុករ ជម្រកការពារភ្លៀង និងកម្ដៅថ្ងៃ ចាប់ពីថ្ងៃទី២២ ដល់យប់ថ្ងៃទី២៥ ខែតុលា។ ក្រៅពីនេះ ក៏បានស្នើឲ្យអាជ្ញាធរសាលារាជធានីភ្នំពេញ ជួយបង្កលក្ខណៈ និងសម្រួលទីតាំងមួយចំនួននៅជុំវិញបរិវេណទីលានប្រជាធិបតេយ្យ ដើម្បីធានាការពារសន្តិសុខ សុវត្ថិភាព ជូនដល់បាតុករនៃមហាបាតុកម្មអហិង្សាដោយអនុគ្រោះថែមទៀត៕
No comments:
Post a Comment