សកម្មជន​បក្ស​ប្រឆាំង​នៅ​រតនគិរី​ត្រូវ​បាន​កោះ​ហៅ​ទៅ​បំភ្លឺ​រឿង​ប្រមូល​ស្នាម​មេដៃ

មន្ត្រី​គណបក្ស​សង្គ្រោះ​ជាតិ​ប្រចាំ​ខេត្ត​រតនគិរី អះអាង​ថា សមត្ថកិច្ច​ប៉ូលិស​នៅ​ស្រុក​ចំនួន​២ បាន​ដាក់​កងកម្លាំង​រារាំង​សកម្មភាព​ប្រមូល​ស្នាម​មេដៃ​គាំទ្រ​លើ​ញត្តិ​របស់​គណបក្ស​សង្គ្រោះ​ជាតិ ដាក់​ជូន​អគ្គលេខាធិការ​អង្គការ​សហប្រជាជាតិ​ពី​ភាព​អយុត្តិធម៌​ទាក់ទង​លទ្ធផល​បោះ​ឆ្នោត​ជ្រើសតាំង​តំណាងរាស្ត្រ​នីតិកាល​ទី​៥ កន្លង​ទៅ​នេះ។

សកម្មភាព​សមត្ថកិច្ច​ប៉ូលិស​ស្រុក​បរកែវ រារាំង​សកម្មភាព​ប្រជាពលរដ្ឋ​ចូល​រូម​ផ្តិត​មេដៃ​គាំទ្រ​ញត្តិ​គណបក្ស​សង្ក្រោះ​ជាតិ នៅ​ខេត្ត​រតនគិរី កាល​ពី​ថ្ងៃ​ទី​១៩ ខែ​តុលា ឆ្នាំ​២០១៣។ Adhoc Photo

ដោយ រដ្ឋា វិសាល 2013-10-20

តំណាង​គណបក្ស​សង្គ្រោះ​ជាតិ ប្រចាំ​ខេត្ត​រតនគិរី លោក អៀម អឿន មាន​ប្រសាសន៍​បញ្ជាក់​ថា ប៉ូលិស​ស្រុក​បរកែវ និង​ស្រុក​អូរយ៉ាដាវ កាល​ពី​ថ្ងៃ​សៅរ៍ ទី​១៩ ខែ​តុលា បាន​ដក​ហូត​ញត្តិ​ហើយ​ដាក់​កងកម្លាំង​រារាំង​មិន​ឲ្យ​ប្រជាពលរដ្ឋ​ចូល​រួម​ផ្តិត​មេដៃ និង​កោះ​ហៅ​សកម្មជន​គណបក្ស​សង្គ្រោះ​ជាតិ​ឲ្យ​ចូល​ខ្លូន​នៅ​កាន់​ប៉ុស្តិ៍​ប៉ូលិស​នៅ​ថ្ងៃ​ច័ន្ទ ទី​២១ ខែ​តុលា ក្នុង​រឿង​ប្រមូល​ស្នាម​មេដៃ​ប្រជាពលរដ្ឋ។



លោក​បន្ត​ថា មន្ត្រី​ប៉ូលិស​អះអាង​ថា នេះ​ជា​បញ្ជា​របស់​អាជ្ញាធរ​ស្រុក ហាម​មិន​ឲ្យ​មន្ត្រី​គណបក្ស​សង្គ្រោះ​ជាតិ ប្រមូល​ស្នាម​មេដៃ​ដោយ​គ្មាន​ការ​អនុញ្ញាត​ពី​អាជ្ញាធរ​មូលដ្ឋាន៖ «ជា​គោលការណ៍​របស់​ប្រជាពលរដ្ឋ​ជា​ម្ចាស់​ឆ្នោត ហើយ​ដល់​គេ​ទៅ​ហាម​ឃាត់​អ៊ីចឹង​វា​មិន​ដឹង​ទៅ​រំលោភ​សិទ្ធិ​ដល់​កម្រិត​ណា យើង​រក​លេខ​ដាក់​អត់​បាន។ បើ​សិន​យើង​មិន​ធ្វើ​អ៊ីចឹង យើង​ហៅ​គាត់​មក​ទីលាន​ប្រជាធិបតេយ្យ ប្រជាពលរដ្ឋ​គាត់​អត់​មាន​ពេល​វេលា​មក​ទេ»។

សមត្ថកិច្ច​ប៉ូលិស​ដែល​ពាក់ព័ន្ធ​រារាំង​សកម្មភាព​ប្រមូល​ស្នាម​មេដៃ រួម​មាន​ឃុំ​កិចុង ឃុំ​ស៊ឺង ឃុំ​កក់ ក្នុង​ស្រុក​បរកែវ និង​សមត្ថកិច្ច​ឃុំ​យ៉ាសោម ក្នុង​ស្រុក​អូរយ៉ាដាវ។

ឆ្លើយ​តប​សេចក្តី​អះអាង​នេះ នាយ​នគរបាល​ប៉ុស្តិ៍​ឃុំ​ស៊ឺង លោក លេង ហេង មាន​ប្រសាសន៍​បញ្ជាក់​ថា លោក​បាន​ចុះ​ល្បាត​នៅ​មូលដ្ឋាន ហើយ​បាន​ឃើញ​មាន​សកម្មភាព​ប្រមូល​ស្នាម​មេដៃ​ប្រជាពលរដ្ឋ​ដោយ​មិន​បាន​ជូន​ដំណឹង​មក​អាជ្ញាធរ​មូលដ្ឋាន ហេតុ​នេះ​លោក​សម្រេច​ឲ្យ​ផ្អាក​សកម្មភាព​នេះ​ដើម្បី​សុំ​ការ​សម្រេច​ពី​អាជ្ញាធរ​ស្រុក។

លោក​បន្ត​ថា ការ​ប្រមូល​ស្នាម​មេដៃ​ប្រជាពលរដ្ឋ​នេះ ធ្វើ​ឲ្យ​ប៉ះពាល់​សណ្តាប់ធ្នាប់​សាធារណៈ​ក្នុង​ភូមិ​ឃុំ៖ «ថា​ឲ្យ​គាត់​ធ្វើ​បែបបទ​សិន កុំ​ឲ្យ​វា​កើត​ចលាចល។ យើង​ត្រូវ​ដក​ទុក​សិន ចាំ​ឆ្លង​យោបល់»។

ទាក់ទិន​ករណី​នេះ​ដែរ មន្ត្រី​ផ្នែក​អង្កេត​សមាគម​អាដហុក (ADHOC) ខេត្ត​រតនគិរី លោក មាន ព្រហ្មមុនី មាន​ប្រសាសន៍​បញ្ជាក់​ថា ប៉ូលិស​មូលដ្ឋាន​ពិត​ជា​បាន​ដាក់​កងកម្លាំង​រារាំង​មិន​ឲ្យ​ប្រជាពលរដ្ឋ​ចូល​រួម​ផ្តិត​មេដៃ​គាំទ្រ​ញត្តិ​នោះ​មែន។

លោក​បន្ត​ថា នេះ​ជា​ការ​គំរាម​កំហែង​សិទ្ធិ​បញ្ចេញ​មតិ​របស់​ពលរដ្ឋ​ក្នុង​វិស័យ​នយោបាយ៖ «មាន​សន្តិសុខ​ភូមិ មាន​ប៉ូលិស ឈរ​នៅ​ចាំ​ហ្នឹង ហើយ​ខ្ញុំ​សួរ​គាត់​ថា អត់​ឲ្យ​ធ្វើ​ទេ កាល​ណា​អត់​លិខិត​អនុញ្ញាត​ពី​ថ្នាក់​លើ​មក។ គាត់​សួរ​​ទៅ​អភិបាល​ស្រុក គឺ​ហាម​ដាច់​ខាត គឺ​អត់​ឲ្យ​បន្ត​ប្រមូល​ស្នាម​មេដៃ​ទេ»។

ទោះ​ជា​យ៉ាង​នេះ​ក៏ដោយ ស្នងការ​ប៉ូលិស​ខេត្ត​រតនគិរី លោក រ៉ាយ រ៉ៃ បដិសេធ​ថា អាជ្ញាធរ​ប៉ូលិស​មិន​បាន​គំរាម​កំហែង​សិទ្ធិ​បញ្ចេញ​មតិ​ពលរដ្ឋ​នោះ​ទេ ក៏​ប៉ុន្តែ​មន្ត្រី​គណបក្ស​សង្គ្រោះ​ជាតិ មិន​បាន​ជូន​ដំណឹង​ស្តី​ពី​សកម្មភាព​ប្រមូល​ស្នាម​មេដៃ​ជូន​អាជ្ញាធរ​បាន​ដឹង ហេតុ​នេះ​មន្ត្រី​មាន​សមត្ថកិច្ច​ត្រូវ​តែ​ហាម​ឃាត់ និង​កោះ​អញ្ជើញ​សកម្មជន​មក​សាកសួរ​បំភ្លឺ​ពី​បញ្ហា​នេះ។

លោក រ៉ាយ រ៉ៃ៖ «បើ​យើង​ទៅ​តាម​សាធារណៈ តាម​ផ្ទះ ចំការ ផ្ទះ​ស្រែ​របស់​គេ។ ទី​១ របៀប​យើង​មក​គាប​សង្កត់​គាត់​ផ្តិត​មេដៃ។ ទី​២ របៀប​ថា​យើង​ទៅ​លួង​លោម​ចិត្ត​គាត់​អ៊ីចឹង​ណា! វា​ខុសៗ​តែ​ប៉ុណ្ណឹង។ បើ​គាត់​ផ្តិត​មេដៃ​នៅ​ទីស្នាក់ការ​មាន​ស្អី»។

មន្ត្រី​ជាន់​ខ្ពស់​គណបក្ស​សង្គ្រោះ​ជាតិ បាន​បើក​យុទ្ធនាការ​ប្រមូល​ស្នាម​មេដៃ​ប្រជាពលរដ្ឋ​អ្នក​គាំទ្រ​ញត្តិ​គណបក្ស​សង្គ្រោះ​ជាតិ តាំង​ពី​ថ្ងៃ​ទី​៩ រហូត​ដល់​ថ្ងៃ​ទី​២៣ ខែ​តុលា ដើម្បី​ដង្ហែ​ញត្តិ​នេះ​ដាក់​ជូន​មន្ត្រី​ការិយាល័យ​តំណាង​ឧត្តម​ស្នងការ​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅ​ទីក្រុង​ភ្នំពេញ និង​មន្ត្រី​ស្ថានទូត​បណ្តា​ប្រទេស​ធំ​មួយ​ចំនូន​នៅ​កម្ពុជា ខណៈ​ពេល​គណបក្ស​នេះ​គ្រោង​ធ្វើ​បាតុកម្ម​អហិង្សា​លើក​ទី​៣ ចាប់​ពី​វេលា​ម៉ោង ៧​ព្រឹក ដល់​វេលា​ម៉ោង ៦​ល្ងាច ថ្ងៃ​ទី​២៣ ដល់​ថ្ងៃ​ទី​២៥ ខែ​តុលា នា​ទីលាន​ប្រជាធិបតេយ្យ។ អនុ​ប្រធាន​គណបក្ស​សង្គ្រោះ​ជាតិ លោក កឹម សុខា មាន​ប្រសាសន៍​ថា ប្រជាពលរដ្ឋ​ប្រមាណ ២​លាន​នាក់​បាន​ផ្តិត​មេដៃ​គាំទ្រ​ញត្តិ​នេះ៕