 |
| សកម្មភាពបេក្ខជនប្រឡងគ្រូអនុវិទ្យាល័យ នៅមណ្ឌលសាលាបឋមសិក្សា ក្រុងព្រៃវែង ខេត្តព្រៃវែង សម័យប្រឡងថ្ងៃទី១៩ តុលា ឆ្នាំ២០១៣។ RFA/Hum Chamroeun |
ការអះអាងនេះ គឺបន្ទាប់ពីបេក្ខជនបានទៅមើលឈ្មោះលទ្ធផលប្រឡង ដែលបានបិទនៅសាលាគរុកោសល្យភូមិភាគព្រៃវែងកាលពីថ្ងៃទី០២វិច្ឆិកា។ បេក្ខជនប្រឡងគ្រូអនុវិទ្យាល័យ ឲ្យដឹងថា មុខវិជ្ជាដែលគេចូលប្រឡងជំនួសជាប់ភាគច្រើន ជាមុខវិជ្ជាឯកទេសផ្នែកខ្មែរ គេហកិច្ច និងជំនាញ គណិតវិទ្យា រូបវិទ្យាជាដើម ។ ហើយ ផ្នែកនិមួយៗយ៉ាងហោចណាស់ ក៏មានបេក្ខជនប្រឡងជាប់ ដោយសារគេប្រឡងជំនួសនោះពី២ទៅ៣នាក់ដែរ។
បេក្ខជនប្រឡង មកពីស្រុកកំពង់រោទិ៍ ខេត្តស្វាយរៀង សុំមិនបញ្ចេញឈ្មោះម្នាក់ មានប្រសាសន៍នៅថ្ងៃទី ០៥ វិច្ឆិកាថា ពេលទៅមើលលទ្ធផលឈ្មោះប្រឡងគ្រូ នៅសាលាគរុកោសល្យ ព្រៃវែង គ្រានោះ ខ្លួនបានប្រទះឃើញមានឈ្មោះសិស្សប្រឡងជាប់មួយចំនួន ជាប់ដោយមានអ្នកប្រឡងជំនួស ។ បេក្ខជនដដែលបន្តថា ខ្លួនបានឃើញសកម្មភាពមិនប្រក្រតីកើតមានតាំងពីថ្ងៃប្រឡងមកម្ល៉េះ ប៉ុន្តែសកម្មភាពនោះបេក្ខជនពុំហ៊ាននិយាយ ព្រោះខ្លាចធ្វើឲ្យប៉ះពាល់ដល់បេក្ខភាពប្រឡងរបស់ខ្លួន៖ «ចាសប៉ុន្តែប្អូនអត់ហ៊ានប្រាប់ឈ្មោះទេភាគច្រើនគ្រូបង្រៀនដូចថាគាត់មានបទពិសោធន៍ខ្លាំងអញ្ចឹងគាត់ចូលទៅដឹងថាជាប់ហ្មង។ ហើយដល់ពេលសិស្សៗចូលទៅបានត្រឹមតែបម្រុងអីហ្នឹងបង បម្រុងទី១បម្រុងទី២ទី៣អីហ្នឹងអស់ហើយ។ ដូចថាអ្នកចូលឲ្យគេជំនួសហ្នឹងដូចអត់ពូកែផងបង ហើយប្អូនឆ្ងល់ដល់ពេលទៅបង្រៀនគេធ្វើមេចទៅ»។
 |
| ថ្ងៃទី០៥ ខែវិច្ឆិកា ឆ្នាំ២០១៣៖ សាលាគរុកោសល្យភូមិភាគ ព្រៃវែង ស្ថិតនៅក្រុងព្រៃវែង ខេត្តព្រៃវែង។ RFA/Hum Chamroeun |
យ៉ាងណាក៏ដោយបេក្ខជនប្រឡងអះអាងថា អ្នកប្រឡងជាប់ ជួលឲ្យគេប្រឡងក្នុងតំលៃប្រមាណពី១ពាន់ទៅ៣ពាន់ដុល្លារអាមេរិក ក្នុងមួយនាក់។ បេក្ខជនប្រឡងស្នើឲ្យក្រសួងអប់រំ យុវជន និងកីឡា និងមន្ត្រីដែលមានពាក់ព័ន្ធការប្រឡងគ្រូបឋមភូមិនេះ ធ្វើយ៉ាងណាត្រួតពិនិត្យតាមដានរកឈ្មោះអ្នកដែលគ្មានសមត្ថភាពតែប្រឡងជាប់ និងលុបឈ្មោះបេក្ខជនចេញពីបញ្ជីឈ្មោះ ដើម្បីជៀសវាងកុំឲ្យសកម្មភាពនេះកើតមាននាពេលប្រឡងគ្រូឆ្នាំក្រោយទៀត។
លទ្ធផលឈ្មោះបេក្ខជនប្រឡងជាប់ គ្រូអនុវិទ្យាល័យនៅសាលាគរុកោសល្យ ភូមិភាគខេត្តព្រៃវែង ឆ្នាំ២០១៣នេះ សរុបទាំងអស់ចំនួន ១១៦នាក់។ ហើយគរុកោសល្យ ភូមិភាគនេះ មានបេក្ខជនប្រឡងមកពីខេត្តព្រៃវែងនិងខេត្តស្វាយរៀង ។ ចំពោះសិស្សដែលបានប្រឡងជាប់និងត្រូវសិក្សាតាមជំនាញឯកទេសរបស់ខ្លួន ប្រឡងជាប់នៅសាលាគរុកោសល្យភូមិភាគព្រៃវែងចំនួន២ឆ្នាំ ៕
No comments:
Post a Comment