កាប់អស់ឈើទើបនឹកឃើញដេញដោលឬ ?
អ្នកភូមិជិះទូក តាមទន្លេសេសាន ក្នុងខេត្តស្ទឹងត្រែង។ រូបថត ម៉ៃ វីរៈ
Friday, 22 November 2013 ម៉ៃ ទិត្យថារ៉ា PPP
ភ្នំពេញៈ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានចេញលិខិតទៅរដ្ឋមន្ត្រីក្រសួង កសិកម្ម រុក្ខាប្រមាញ់ និងនេសាទ ឲ្យបំភ្លឺ ចំពោះការអនុវត្តសេចក្តីជូនដំណឹងរបស់រាជរដ្ឋាភិបាល ស្តីពីការផ្អាកសកម្មភាពប្រមូលផល អនុផលព្រៃឈើរបស់ក្រុមហ៊ុន Ang & Associates Lawyers Co.,Ltd ដែលកាប់ឈើនៅក្នុងអាងស្តុកទឹកនៃគម្រោងវារីអគ្គិសនី សេសាន ក្រោម ២ នៅខណៈដែលសំណង់វារីអគ្គិសនីមិនទាន់ចាប់ដំណើរការសាងសង់។
ការដែលរដ្ឋាភិបាល ស្នើឲ្យក្រសួង កសិកម្ម ធ្វើការបំភ្លឺ ពីការប្រមូលផលព្រៃឈើនៅតំបន់បាតអាងនេះគឺបន្ទាប់ពីមានសេចក្តីរាយការណ៍ជាច្រើនថា សកម្មភាពកាប់បំផ្លាញព្រៃឈើ នៅក្នុងតំបន់នោះ និងការប្រមូលទិញឈើពីតំបន់ខាងក្រៅបានកើតឡើងយ៉ាងពេញបន្ទុក។
នៅក្នុងលិខិតដែលចុះហត្ថលេខាដោយ លោក ប៊ុន អ៊ុយ រដ្ឋលេខាធិការទីស្តីការគណៈរដ្ឋមន្ត្រីកាលពីថ្ងៃ ទី១៣ ខែ វិច្ឆិកា បានសរសេរថា ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីជម្រាមជូនឯកឧត្តម រដ្ឋមន្ត្រីក្រសួង កសិកម្ម ស្តីពីករណីរបាយការណ៍វឌ្ឍនភាពលើការអនុវត្តសេចក្តីជូនដំណឹង របស់រាជរដ្ឋាភិបាល ស្តីពីការផ្អាកសកម្មភាពប្រមូលផល អនុផលព្រៃឈើរបស់ក្រុមហ៊ុន Ang & Associates Lawyers Co.,Ltd ដែលកាប់ឈើនៅក្នុងអាងស្តុកទឹកនៃគម្រោងវារីអគ្គិសនី សេសាន ក្រោម ២ មេត្តាជ្រាបថា មិនត្រូវឲ្យមានការប្រមូលទិញឈើពីប្រភពខាងក្រៅតំបន់អនុញ្ញាតឲ្យធ្វើអាជីវកម្មរបស់ខ្លួនឡើយ ពីព្រោះការប្រមូលទិញបែបនេះ និងក្លាយជាទីផ្សារមួយដែលលើកទឹកចិត្តឲ្យមានការកាប់ឈើដោយអនាធិបតេយ្យ។
នៅក្នុងលិខិតបានឲ្យដឹងទៀតថា សុំពិនិត្យឡើងវិញ ដែលតាមធម្មតា ក្នុងការសាងសង់ទំនប់វារីអគ្គិសនីមុនៗ គឺកំណត់តំបន់ដែលត្រូវលិចមុនដាក់ឲ្យដេញថ្លៃ ដើម្បីកាប់ឈើនិងសម្អាតអាង សំណង់វារីអគ្គិសនី កសាងបានមួយចំនួនហើយ ទើបចាប់ផ្តើមកាប់ឈើ និងធ្វើការសម្អាតអាងជាក្រោយ។
ក្នុងលិខិតរបស់ទីស្តីការគណៈរដ្ឋមន្ត្រីនោះបានបញ្ជាក់ដោយចោទសួរថា៖ «លើកនេះការអនុវត្តខុសពីធម្មតា ទាំងបីចំណុចជាពិសេសចំណុច ទី១ និង ទី៣ មិនទាន់កំណត់ទីតាំងនិងមិនទាន់បានសាងសង់ បែរជានាំគ្នាកាប់ឈើ តើមកពីមូលហេតុអ្វី?»។
លោក អ៊ុក រ៉ាប៊ុន រដ្ឋមន្ត្រីក្រសួង កសិកម្ម រក្ខាប្រម៉ាញ់ និងនេសាទ និងលោក ទី សុគន្ធ រដ្ឋលេខាធិការក្រសួង កសិកម្មពុំអាចទាក់ទងដើម្បីធ្វើការអត្ថាធិប្បាយបានទេ កាលពីថ្ងៃម្សិលមិញ។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានឲ្យដឹងថា តាំងពីថ្ងៃចេញលិខិតមក ពុំទាន់មានការឆ្លើយតបមកវិញពីក្រសួង កសិកម្ម នៅឡើយទេ។ លោកបានថ្លែងថា៖ «យើងមិនទាន់ដឹងថា ចាត់វិធានការយ៉ាងណានោះទេ ប៉ុន្តែយើងធ្វើទៅតាមច្បាប់»។
កាលពីថ្ងៃ ទី២ ខែ វិច្ឆិកា ឆ្នាំ ២០១៣ លោកនាយករដ្ឋមន្ត្រី ហ៊ុន សែន បានចុះហត្ថលេខា ស្តីពីការផ្អាកសកម្មភាពប្រមូលផល អនុផលព្រៃឈើរបស់ក្រុមហ៊ុន Ang & Associates Lawyers Co.,Ltd ដែលកាប់ឈើនៅក្នុងអាងស្តុកទឹកនៃគម្រោងវារីអគ្គិសនី សេសាន ក្រោម ២ ហើយនៅថ្ងៃ ទី២២ ខែ កុម្ភៈ ឆ្នាំ ២០១៣ លោកនាយករដ្ឋមន្ត្រី ក៏បានចុះហត្ថលេខា លើបទបញ្ជា ០២ បប ស្តីពីវិធានការបង្ការទប់ស្កាត់ និងបង្រ្កាបការកាប់ការដឹកជញ្ជូន ការប្រមូលការស្តុកទុក និងការនាំឈើគ្រញូងចេញផងដែរ។
លោក សៀក មេគង្គ មេឃុំ ស្រែគ ស្រុក សេសាន បានថ្លែងថា បច្ចុប្បន្ននេះ ខាងក្រុមហ៊ុន បានស្ងប់ស្ងាត់ក្នុងការកាប់ឈើនៅក្នុងតំបន់បាតអាងនោះហើយ បន្ទាប់ពីក្រសួង កសិកម្ម បានហាម ប៉ុន្តែពួកគេសស្រោកសស្រាំដឹកឈើល្អៗដែលបានកាប់ពីមុនចេញពីអាង ហើយមានមួយក្រុមទៀត បានបន្តកាប់ឈើនៅក្បែរបាតអាង ដែលធ្វើឲ្យប៉ះពាល់ដល់ព្រៃសហគមន៍។
លោកបានថ្លែងថា៖ «ពលរដ្ឋ យើងកំពុងតែឆ្ងល់ចំពោះក្រុមហ៊ុននោះ ថាតើគេមកប្រមូលយកតែឈើល្អៗមុនយកទៅលក់ ដើម្បីយកលុយមកវិនិយោគតាមក្រោយឬ? ពីព្រោះគេពុំបានធ្វើអ្វីទាំងអស់ក្រៅពីកាប់ឈើ»។
លោកបានឲ្យដឹងទៀតថា ប្រជាពលរដ្ឋសព្វថ្ងៃ កំពុងតែគិតថា ប្រទេសកម្ពុជា នៅថ្ងៃអនាគតអាចនឹងអស់ព្រៃឈើទាំងស្រុងហើយ ហើយនៅពេលនោះ និងជួបប្រទះនូវគ្រោះមហន្តរាយ ដោយសារការប្រែប្រួលអាកាសធាតុ ដូចជា ធ្វើឲ្យកើតមានខ្យល់ព្យុះទឹកជំនន់ធ្ងន់ធ្ងរនិងគ្រោះរាំងស្ងួតជាដើម។ លោកបញ្ជាក់ថា៖ «ទៅថ្ងៃអនាគតពួកយើងនឹងត្រូវក្មេងជំនាន់ក្រោយជេរប្រមាថ ដោយគេថា យើងជំនាន់នេះ មិនចេះថែរក្សាព្រៃឈើ ទើបពួកគេលិចទឹករហូត។ គម្រោងវារីអគ្គិសនីនេះ ពុំបានជួយដល់ប្រជាជននោះទេ គឺបានត្រឹមតែបំផ្លាញធនធានធម្មជាតិតែប៉ុណ្ណោះ»។
ក្រុមហ៊ុន Hydrolancang International Energy ដែលជាសាខាមួយរបស់ក្រុមហ៊ុនចិនឈ្មោះ Huaneng ដែលជាកម្មសិទ្ធិ របស់រដ្ឋបានចុះអនុស្សរណៈ នៃការយោគយល់គ្នា ជាមួយក្រុមហ៊ុន Royal Group របស់លោក គិត ម៉េង កាលពីថ្ងៃ ទី២៦ ខែ វិច្ឆិកា ឆ្នាំ ២០១២ សម្រាប់ការផ្តល់ហិរញ្ញវត្ថុរយៈពេលពីរឆ្នាំ ចូលមកក្នុងគម្រោងទំនប់វារីអគ្គិសនីនេះ។
កាលពីពេលមុនក្នុងឆ្នាំនេះ ក្រុមហ៊ុន Ang & Associates ត្រូវបានរាយការណ៍ថា បានចុះកិច្ចព្រមព្រៀងវិនិយោគរួមគ្នាជាមួយលោក សុខ វណ្ណា ដែលជាបងប្អូនប្រុសលោក សុខ គង់ ស្ថាបនិកក្រុមហ៊ុន សូគីម៉ិច ដើម្បីឈូសឆាយតំបន់បាតអាង ដែលមានទំហំដល់ទៅ ៣៦ ០០០ ហិកតា ជាការរៀបចំសម្រាប់គម្រោងទំនប់វារីអគ្គិសនីដែលមានទឹកប្រាក់ ៨១៦ លានដុល្លារ៕
No comments:
Post a Comment