 |
| RFA/Van Vichar |
ដោយ សូត សុខប្រាថ្នា RFA 2013-11-03
ប្រជាពលរដ្ឋនៅខេត្តកំពង់ចាម បានសម្តែងប្រតិកម្មតបភ្លាមៗ ចំពោះថ្នាក់ដឹកនាំគណបក្សសង្រ្គោះជាតិ ដែលព្រមព្រៀងធ្វើកិច្ចចរចារជាមួយគណបក្សប្រជាជនកម្ពុជា ដែលកំណត់យកថ្ងៃទី៥ វិច្ឆិកា ខាងមុខនោះ។ ប្រជាពលរដ្ឋមួយចំនួនមិនបានឯកភាពទៅនឹងការសម្រេចចិត្តនោះឡើយ ដោយពួកគាត់បានលើកឡើងថា ភាពយុត្តិធម៌ទាក់ទិនទៅនឹងលទ្ធផលឆ្នោតមិនទាន់រកឃើញដើម្បីផ្ដល់ជូនពួកគាត់ស្ងប់ចិត្តនោះទេ។ ចំណែកប្រជាពលរដ្ឋផ្សេងទៀតយល់ព្រមឱ្យបក្សប្រឆាំងចូលរួមចរចា ក៏ប៉ុន្តែត្រូវរក្សាគោលជំហររបស់ខ្លួនឱ្យបានរឹងមាំ ពោលគឺត្រូវតែរកភាពយុត្តិធម៌ឱ្យបានជាមុនទើបជាការប្រសើរ។
ប្រជាពលរដ្ឋម្នាក់រស់នៅឃុំរកាគយ ស្រុកកងមាស លោក ខេមរា បានសម្ដែងនូវការមិនពេញចិត្តនៅពេលដែលលោកទទួលដំណឹងថា មេបក្សប្រឆាំងយល់ព្រមចូលតុចរចាជាមួយបក្សប្រជាជនកម្ពុជានោះ។ លោកបានលើកឡើងថា ការចរចាគឺជាលេសដដែលៗ គ្មានលទ្ធផលល្អសម្រាប់ប្រជាពលរដ្ឋនោះឡើយ ហើយប្រសិនបើការយល់ព្រមចរចាដើម្បីធ្វើការបែងចែកអំណាចជាមួយបក្សប្រជាជនកម្ពុជានោះ គឺធ្វើឱ្យបាត់បង់ជំនឿទុកចិត្តពីសំណាក់ប្រជាពលរដ្ឋដែលគាំទ្របក្សប្រឆាំង។
លើសពីនេះទៀត លោកលើកឡើងថា ទុកឱ្យបក្សប្រជាជនកម្ពុជា បន្តដឹកនាំប្រទេសដោយខុសច្បាប់ ហើយបក្សប្រឆាំងសុខចិត្តបន្តនៅរួមសុខរួមទុក្ខជាមួយប្រជាពលរដ្ឋ គឺជាការប្រសើរ៖ «រួមសុខរួមទុក្ខជាមួយប្រជាពលរដ្ឋវាល្អជាង! ទុកឱ្យសភាចោរទាំង ៦៨រូបនេះ បន្តដឹកនាំអំណាចតែបួនឆ្នាំកន្លះទៀតនឹងដួលរលំហើយ។ បើគណបក្សទាំងពីរជួយលោក ហ៊ុន សែន ឱ្យមានខ្យល់ដកដង្ហើម ខ្ញុំប្រជាពលរដ្ឋនៅខេត្តកំពង់ចាម នឹងដកសេចក្ដីទុកចិត្ត និងលែងគាំទ្រគណបក្សសង្គ្រោះជាតិ ជាបន្តទៀត ពីព្រោះគណបក្សប្រជាជនសព្វថ្ងៃ ទឹកនៅបំប៉ឹមច្រមុះទេ បើលោក សម រង្ស៊ី និង កឹម សុខា ទៅជួយលោក ហ៊ុន សែន ឱ្យមានខ្យល់ដកដង្ហើមនោះ ប្រជាពលរដ្ឋនឹងត្រូវស្លាប់ទាំងអស់គ្នា»។
ប្រភពដដែលបានឱ្យដឹងបន្តទៀត ដោយមិនមានជំនឿចិត្តទាល់តែសោះក្នុងការចរចាដើម្បីស្វែងរកការដោះស្រាយភាពមិនប្រក្រតីនៃការបោះឆ្នោតនៅពេលកន្លងទៅ ដោយលោកមើលឃើញពីលទ្ធផលជួបចរចាជាច្រើនលើកកន្លងមក ថាមិនបានផ្លែផ្កាទាល់តែសោះ៖ «មេបក្សប្រឆាំងទាំងពីរគួរនៅក្រៅវិញ ប្រសើរជាង ពីព្រោះនរណាក៏ចង់បានសុខសន្តិភាព ហើយគណបក្សប្រជាជនខូចណាស់ ហើយក្រែងលោយើងចាញ់បោកគេទៅ ចូលបង្កើតរដ្ឋាភិបាលដូចឆ្នាំ៩៣ (១៩៩៣) គេប៉ែងម្នាក់ម្តងៗ ពីព្រោះឆ្កែកន្ទុយខ្វៀននៅតែខ្វៀនហ្នឹង»។
ប្រជាពលរដ្ឋនៅឃុំជប់ ស្រុកត្បូងឃ្មុំ អ្នកស្រី លក្ខិណា វិញ បានសម្ដែងនូវការពេញចិត្តចំពោះការចូលតុចរចារបស់បក្សសង្គ្រោះជាតិ ជាមួយបក្សប្រជាជនកម្ពុជានោះ ថាជារឿងត្រឹមត្រូវ ពីព្រោះអ្នកស្រីយល់ថា របៀបវារៈដែលបក្សសង្គ្រោះជាតិដាក់ទៅនោះ ដើម្បីទាមទារភាពយុត្តិធម៌ជូនប្រជាពលរដ្ឋជាម្ចាស់ឆ្នោត ហើយដំណោះស្រាយត្រូវការធ្វើវាជាជំហានៗ។
អ្នកស្រី លក្ខិណា៖ «វារៈគាត់ដាក់ទាំងបីហ្នឹង ដូចមិនមានអីខុសនោះទេ ពីព្រោះអីគាត់តស៊ូប៉ុណ្ណឹង វាអាចឈានដល់មួយដំណាក់កាលៗ។ ខ្ញុំគិតថា វាអត់ខុសទេ ពីព្រោះអីគាត់ចូលទៅចរចា មិនមែនដើម្បីសុំអំណាចគេនោះទេ ពីព្រោះគាត់ដាក់វារៈទាំងបី ដើម្បីបង្កើតគណៈកម្មាធិការដើម្បីរាប់សន្លឹកឆ្នោតអីហ្នឹង ខ្ញុំថាអាហ្នឹងជារឿងត្រឹមត្រូវ»។
ក៏ប៉ុន្តែអ្នកស្រីក៏បានលើកឡើងដែរថា ប្រសិនបើការចរចានោះជាការចរចាដើម្បីធ្វើការបែងចែកអំណាចវិញ អ្នកស្រីនិងអ្នកគាំទ្រឯទៀតប្រាកដជាលែងគាំទ្រគណបក្សប្រឆាំងមួយនេះជាក់ជាមិនខាន។
ចំណែកឯប្រជាពលរដ្ឋរស់នៅឃុំល្វេ ស្រុកកោះសូទិន លោក មាស លី ក៏បានលើកឡើងដោយមានការប្រៀបធៀបទៅនឹងរឿងប្រវត្តិសាស្ត្រចិនមួយ គឺរឿងសាមកុក ដោយសារគណបក្សកាន់អំណាចសព្វថ្ងៃកំពុងតែប្រព្រឹត្តខ្លួនជាតួអង្គមួយនៅក្នុងរឿងនេះទៀតផង។
លោក មាស លី៖ «ពីព្រោះខ្ញុំយល់ថា អំណាចបច្ចុប្បន្នរបស់គណបក្សបច្ចុប្បន្ននេះ ខ្ញុំមើលឃើញថា គ.ជ.ប វាបន្លំសន្លឹកឆ្នោតឱ្យទៅគណបក្សកាន់អំណាចហើយ ហើយធ្វើផែនការឯកបក្សហ្នឹងវាខុសនឹងច្បាប់ មាត្រា ៧៦ ក៏វាខុស ១២០ ក៏មិនបានចូលប្រជុំ ព្រះមហាក្សត្រហ្នឹងសោតទៀត ក៏នៅក្រោមអំណាច ដូចជាអាឆាវៗ ទាមទារយកស្តេចរឿងសាមកុកហ្នឹង ហើយធ្វើឱ្យស្ដេចហ្នឹងធ្វើតាមអំណាចអាឆាវៗហ្នឹង ដូចគ្នាអ៊ីចឹង ដែលខ្ញុំប្រៀបធៀបទៅ»។
លោកបន្ថែមទៀតថា ការចរចាគប្បីមានសម្រាប់គណបក្សធំៗទាំងពីរ គឺត្រូវធ្វើឡើងដើម្បីបញ្ជាក់ថា នរណាជាឈ្នះនរណាជាអ្នកចាញ់ ដោយមានអង្គការអន្តរជាតិជាអ្នកដឹងឮ៖ «ចរចាអីចរចាទៅ ក៏ប៉ុន្តែមិនឱ្យទាមទារអំណាច គឺសូមឱ្យជ្រើសរើសគណៈកម្មាធិការឯករាជ្យមួយដើម្បីមើលសន្លឹកឆ្នោត ថានរណាឈ្នះនរណាចាញ់។ ឧត្ដមគតិរបស់ខ្ញុំ គឺសូមឱ្យដឹងថា អ្នកណាឈ្នះ អ្នកណាចាញ់យ៉ាងពិតប្រាកដ។ បើខ្ញុំចាញ់ក្នុងនាមខ្ញុំបោះឱ្យអ្នកដែលស្រលាញ់ជាតិ ខ្ញុំចាញ់ ខ្ញុំសុខចិត្តទទួលយក បើខ្ញុំឈ្នះ គឺសូមឱ្យមានអង្គការឯករាជ្យមួយថា ខ្ញុំជាអ្នកឈ្នះ អាហ្នឹងខ្ញុំត្រូវតាមយោបល់របស់ប្រជាពលរដ្ឋចង់បាន»។
ទោះជាយ៉ាងណាក៏ដោយ បញ្ហានេះត្រូវបានអនុប្រធានគណបក្សសង្គ្រោះជាតិ លោក កឹម សុខា បានមានប្រសាសន៍នៅថ្ងៃទី៣ វិច្ឆិកា ថា កិច្ចចរចានេះគឺជាការចរចាកម្រិតបច្ចេកទេសតែប៉ុណ្ណោះ។ គោលជំហររបស់បក្សសង្គ្រោះជាតិនៅតែដដែល គឺគោរពទៅតាមឆន្ទៈរបស់ប្រជាពលរដ្ឋជាម្ចាស់ឆ្នោតជាដាច់ខាត ពោលគឺប្រជាពលរដ្ឋត្រូវការចរចាដើម្បីដោះស្រាយភាពមិនប្រក្រតីដែលបានកើតមាននៅពេលកន្លងទៅ។ លោកបញ្ជាក់ថា គណបក្សសង្គ្រោះជាតិ គឺជាអ្នកឈ្នះ ដូចនេះការចរចានៅពេលខាងមុខ មិនអាចរំលងភាពអយុត្តិធម៌ដែលបានកើតឡើងនៅពេលបោះឆ្នោតនោះឡើយ ពីព្រោះវាជាមូលដ្ឋានគ្រឹះនៅក្នុងកិច្ចចរចា។
លោក កឹម សុខា បានបញ្ជាក់ពីគោលជំហរយ៉ាងច្បាស់ថា គ្មានការចរចាដើម្បីបែងចែកអំណាចនោះទេ៖ «ខ្ញុំសូមជម្រាបជូនបងប្អូនជនរួមជាតិ ពិសេសអ្នកដែលបោះឆ្នោតឱ្យគណបក្សសង្គ្រោះជាតិថា គោលជំហររបស់យើងខ្ញុំ ជាពិសេសខ្លួនខ្ញុំផ្ទាល់ មិនឱ្យគណបក្សប្រជាជនហ្នឹងជាន់ឈ្លីឆន្ទៈរបស់ប្រជាពលរដ្ឋជាដាច់ខាត ហើយជំហរយើងខ្ញុំ ដាច់ខាតត្រូវតែស្វែងរកការពិត ស្វែងរកយុត្តិធម៌ជុំវិញការបោះឆ្នោតកន្លងមកឱ្យឃើញជូនប្រជាពលរដ្ឋ។ ទោះបីគេទិញក៏មិនលក់ គេសម្លុតក៏មិនខ្លាច អត់ទៅចុះចូល ចុះញ៉មជាមួយពួកកាន់អំណាចផ្ដាច់ការ សូមឱ្យប្រជាពលរដ្ឋមានជំនឿ»។
លោកក៏បានជម្រាបជូនពីសមាសភាពអ្នកត្រូវចូលរួមចរចានៅថ្ងៃទី៥ វិច្ឆិកា របស់គណបក្សសង្គ្រោះជាតិ គឺរួមមានលោក យឹម សុវណ្ណ លោក សុន ឆ័យ លោក អេង ឆៃអ៊ាង លោក គួយ ប៊ុនរឿន និងលោក យ៉ែម បុញ្ញឫទ្ធិ ជាដើម៕
4 comments:
In this photo seems that Seng Theary was ready for the picture.
ALL WHAT I HAVE TO SAY.
ខ្មែរមួយចំនួនខ្លះបានដឹងជាមុនហើយថា មិនយូរទេពួក
សម រង្ស៊ី និង កឹមសុខា នេះនិង
ដល់ពេលចូលក្នុង បន្ទប់ចរចារបែងចែកអំណាចនិងកៅអីអង្គុយហើយ .....
ហ៊ុន សែន ធ្លាប់ចង្អុលសួរ សម រង្ស៊ី ថា
៥៥ យកមិនយក? សម រង្ស៊ី យក សម្តេច
៥៥ យកមិនយក? សម រង្ស៊ី យក សម្តេច
៥៥ យកមិនយក? សម រង្ស៊ី យក សម្តេច
ពិតណាស់!
ពិតជាអស្ចារ្យណាស់!
សម រង្ស៊ី ជាមេដឹកនាំមហាបាតុកម្មបង្គ្រប់កិច្ចមែន....
អញ្ចឹងការសង្ឃឹមអំពីជ័យជម្នៈរបស់ពលរដ្ឋលើគណបក្សសង្គ្រោះជាតិ
គឺជាការសង្ឃឹមខ្យល់លើមេឃតែប៉ុណ្ណោះ!
ពួកនេះសុទ្ធតែជាពួកកាន់មាត់បាវអោយចោរ
និងជាអ្នកជួយទប់ជើងគ្រែអោយអា ហ៊ុន សែន!
ហើយពួកប្រឆាំងផ្កាប់មុខទាំងនេះគឺគ្មានបំណងធ្វើការ
ផ្លាស់ប្តូរពិតប្រាកដទេ ក្រៅពីបង្គ្រប់កៅអី និងបង្គ្រប់ងារជាឯកឧត្ដមតែប៉ុណ្ណោះ។
មិនយូរទេ ហ៊ុនសែននិងកំចាយចោលទាំងអស់ហ្នឹង!
ជៀម យៀប ពិតជាមាត់ទិព្វមែន ( តែវៀចបន្តិច ) :
កាលពីសម រង្សីទៅក្រៅប្រទេស ជៀប យៀបបានដាក់ទំនាយឲយន្តហោះធ្លាក់ ស្រាប់តែមាន
យន្តហោះធ្លាក់មែន តែវាទៅជាយន្តហោះឡាវទៅវិញ ប្រហែលទេវតាច្រឡំ ព្រោះថៃ និងឡាវ
និយាយភាសាស្រដៀងគ្នា ។ បន្ទាប់មក ជៀម យៀប ក៏បានព្រុះក្តែងៗថា បើសង្គ្រោះជាតិហ្នឹង
មិនចូលទេ កៅអីសភាទាំង៥៥ នឹងត្រូវដកហូត ។ ឮតែប៉ុណ្ណេះ សម រង្សី & កឹម សុខា ឈរ
ជើងមិននឹង ច្រះជ្រួល ១ ថ្ងៃទូរស័ព្វទៅ ស ខេង ១០ដង ដើម្បីចរចារ ការពារកៅអីនោះ ព្រះ
វាសំខាន់ជាង ម្ចាស់ឆ្នោតដ៏សម្រែ ល្លង់ខ្លៅ ។ បាយ បាយ ម្ចាស់ឆ្នោត ពួកលោកអ្នកក្ររហាម
ពួកយើងធ្វើតាមមិនបានទេ យើងទាក់ទងសម្តេចវិញ មានលុយច្រើនជាង ហើយទើបបានពីថៅកែ
ចិនយ៉ាងសន្ធឹកសន្ធាប់ ។ល៕
Yes, she did look ready for camera; just like the freedom hijacker, Tep vanny (any posted pictures on web has to have her in there).
Post a Comment