 |
| RFI/Siv Channa |
ទិវាសិទ្ធិមនុស្ស១០ធ្នូ មិនអាចរំលងក្រុមសហជីពកម្មករកាត់ដេរឡើយ។ ក្រុមសហជីពនៅកម្ពុជា សុទ្ធតែមានគម្រោងចូលរួមក្នុងទិវាអន្តរជាតិនេះ ដើម្បីទាមទារការគោរពសិទ្ធិការងារដល់កម្មករ។ សហភាពការងារកម្ពុជារបស់លោកអាត់ ធន់ នឹងចូលរួមជាមួយក្រុមអង្គការសិទ្ធិមនុស្សដើម្បីទាមទារតំឡើងប្រាក់ឈ្នួល រីឯក្រុមប្រឹក្សាសហជីពជាតិកម្ពុជារបស់លោកសោម អូនគ្រោងជួបជុំសហជីពរបស់ខ្លួន ដើម្បីអនុញ្ញាតអោយកម្មករថ្លែងសាររបស់ពួកគេ។
ប្រធានសហភាពការងារកម្ពុជា លោក អាត់ ធន់បានថ្លែងឱ្យដឹងថា លោកនឹងដឹកនាំកម្មករ កម្មារិនីចូលរួមជាមួយក្រុមអង្គការការពារសិទ្ធិមនុស្ស ដើម្បីប្រារព្ធទិវាសិទ្ធិមនុស្ស១០ធ្នូក្នុងពេលខាងមុខនេះ។ បើតាមលោកអាត់ ធន់ ទិវាដែលខាងក្រុមអង្គការសិទ្ធិមនុស្សគ្រោងរៀបចំជាមួយមនុស្ស៥០០០នាក់នោះ លោកនឹងបង្ហាញការទាមទារមួយចំនួនសម្រាប់ប្រយោជន៍កម្មករ កម្មការិនីក្នុងវិស័យវាយនភណ្ឌដែរ។
ការទាមទារប្រាក់ឈ្នួលឱ្យដល់១៥០ដុល្លារយ៉ាងតិច ប្រាក់អាហារ៣ពេលតម្លៃ៣ដុល្លារ ស្នើរឱ្យរដ្ឋាភិបាលបញ្ឈប់មិនឱ្យមានមន្ត្រីការពារនៅពីក្រោយរោងចក្រ ស្នើឱ្យក្រុមហ៊ុនតំកល់ប្រាក់អតីតភាពការងារ ទាមទរឱ្យក្រុមហ៊ុនបញ្ឈប់ការប្រើប្រាស់កិច្ចសន្យារយៈពេលខ្លី ដែលធ្វើឱ្យខាតបង់ប្រយោជន៍របស់កម្មករ និងចុងក្រោយគឺការស្នើឱ្យរដ្ឋាភិបាលបញ្ចប់ជម្លោះនៅក្នុងរោងចក្រ SL។ ចំពោះលោកអាត់ ធន់ ទាំងនេះគឺជាការទាមទារច្បាស់លាស់របស់សហជីពលោកនៅថ្ងៃទិវាសិទ្ធិមនុស្សអន្តរជាតិ។
ក្នុងថ្ងៃទិវា១០ធ្នូខាងមុននេះ ក្រុមប្រឹក្សាសហជីពជាតិកម្ពុជារបស់លោកសោម អូន ក៏គ្រោងរៀបចំកម្មវិធីជួបជុំមួយចំនួនដែរ។ សម្រាប់ប្រធានសហជីពដែលមានសម្មានចិត្តចំពោះរដ្ឋាភិបាលនេះ ការជួបជុំមីទ្ទីងរម្លឹកថ្ងៃទិវាសិទ្ធិមនុស្សពិភពលោក និងអនុញ្ញាតឱ្យកម្មករឡើងថ្លែងសារសំណូមពរស្តីអំពីការសិទ្ធិការងារ នឹងត្រូវគេគ្រោងរៀបចំឡើង។
គណបក្សសង្គ្រោះជាតិឯណោះវិញ ក៏គ្រោងនឹងប្រារព្ធទិវាសិទ្ធិមនុស្ស១០ធ្នូនេះដែរ ក្រោមប្រធានបទទាមទារស្វែងរកយុត្តិធម៌ឱ្យកម្មកររងគ្រោះដោយអំពើហិង្សារបស់កម្មកររោងចក្រ SL។ ប៉ុន្តែ ចំពោះលោក អាត់ ធន់ ថ្វីដ្បិតប្រធានបទនៃការរៀបចំទិវាសិទ្ធិមនុស្សរបស់គណបក្សសង្គ្រោះជាតិ មានទាក់ទងនឹងបញ្ហារបស់រោងចក្រ SL ពិតមែន ប៉ុន្តែលោកអាត់ ធន់និយាយថា លោកមិនដឹងថា តើគណបក្សសង្គ្រោះជាតិនឹងរៀបចំពិធីនោះដាច់ដោយឡែកតែឯង ឬចូលរួមជាមួយក្រុមអង្គការសមាគមសិទ្ធិមនុស្សនោះឡើយ។
គួរបញ្ជាក់ថា ក្នុងរយៈពេលនៃការដង្ហែអង្គកឋិនទានទៅវត្តនានានៅតាមបណ្តាខេត្ត លោក សម រង្ស៊ី និងលោកកឹមសុខា ប្រធាន និងអនុប្រធានគណបក្សសង្គ្រោះជាតិក៏តែបានថ្លែងសារទៅកាន់អ្នកគាំទ្រអំពាវនាវឱ្យពួកគេចូលរួមធ្វើបាតុកម្មជាមួយគណបក្សសង្គ្រោះជាតិទៀតក្នុងពេលខាងមុខ។ ជាបាតុកម្មប្រឆាំងនឹងលទ្ធផលបោះឆ្នោតដដែល៕
No comments:
Post a Comment