“ការ​សម្រេច​របស់​តុលាការ​អន្តរជាតិ​មិន​ធ្វើ​ឲ្យ​ប៉ះពាល់​ដល់​ទេសចរ​ថៃ​នៅ​កម្ពុជា”

RFA/Den Ayuthyea

អ្នក​​​​ប្រកប​មុខ​របរ​ចិញ្ចឹម​ជីវិត​បាន​កម្រៃ​ពី​វិស័យ​​ទេសចរណ៍​ខ្លះ ​កំពុង​ព្រួយ​បារម្ភ​ខ្លាច​ក្រែង​ចំនួន​អ្នក​ទេសចរ​ជន​ជាតិ​ថៃ មក​ទស្សនា​​កម្ពុជា មាន​​ការ​ថយ​ចុះ។

ដោយ ហង្ស សាវយុត RFA 2013-11-18

ការ​ព្រួយ​បារម្ភ ​គឺ​​បន្ទាប់​ពី​តុលាការ​យុត្តិធម៌​អន្តរជាតិ ​បកស្រាយ​សាលក្រម​​សម្រេច​ឱ្យ​ដី​នៅ​ជុំវិញ​ ប្រាសាទ​ព្រះវិហារ ស្ថិត​នៅ​​ក្រោម​អធិបតេយ្យភាព​កម្ពុជា​នោះ ថា​អាច​នឹង​ធ្វើ​ឱ្យ​ថៃ អាក់អន់ស្រពន់ចិត្ត។

ទោះ​ជា​យ៉ាង​ណា ទីភ្នាក់ងារ​ទេសចរណ៍​ឯកជន និង​មន្ត្រី​រដ្ឋាភិបាល​កម្ពុជា ​បាន​អះអាង​ថា ការ​បកស្រាយ​សាលក្រម​របស់​តុលាការ​យុត្តិធម៌​អន្តរជាតិ​ជុំវិញ​រឿង​ជម្លោះ​ព្រំដែន​ខ្មែរ-​ថៃ នៅ​ជិត​ប្រាសាទ​ព្រះវិហារ កាល​ពី​ពេល​ថ្មីៗ មិន​​ធ្វើ​ឱ្យ​ប៉ះពាល់​ដល់​ទឹក​ចិត្ត​ជនជាតិ​ថៃ ជា​ច្រើន ​ដែល​ចង់​មក​ធ្វើ​​ទេសចរណ៍​​នៅ​​កម្ពុជា​ទេ។

ទីភ្នាក់ងារ​ទេសចរណ៍​ផ្នែក​​ឯកជន បាន​ឱ្យ​ដឹង​ថា ក្នុង​រយៈពេល​១​សប្ដាហ៍​​​ចុង​ក្រោយ​នេះ ចំនួន​ជនជាតិ​ថៃ ដែល​ចូល​មក​ទស្សនា​ប្រាសាទ​អង្គរវត្ត ខេត្ត​សៀមរាប នៅ​តែ​កើន​ឡើង។

តំណាង​ទីភ្នាក់ងារ​​ទេសចរណ៍ គ្រេនដ៍ ប៊ុកឃីង (Grand Booking) គឺ​លោក តេះ កុសល។ លោក​បាន​មាន​ប្រសាសន៍​កាល​ពី​ល្ងាច​ថ្ងៃ​អាទិត្យ ទី​១៧ ខែ​វិច្ឆិកា ថា ជនជាតិ​ថៃ ជា​ច្រើន​នៅ​​តែ​ចុះ​​ឈ្មោះ​មក​ធ្វើ​ទេសចរណ៍​នៅ​ខេត្ត​សៀមរាប ​តាម​រយៈ​ក្រុមហ៊ុន​របស់​លោក។

បុរស​ដដែល​បាន​បញ្ជាក់​ថា លោក​មិន​ទាន់​កត់​សម្គាល់​ឃើញ​ថា ចំនួន​អ្នក​ទេសចរ​ជនជាតិ​ថៃ ​បាន​​ថយ​ចុះ​ដោយសារ​តែ​​​តុលាការ​យុត្តិធម៌​អន្តរជាតិ ​​បក​ស្រាយ​សាលក្រម​រឿង​ជម្លោះ​ព្រំដែន​នៅ​ជិត​ប្រាសាទ​ព្រះវិហារ​នោះ​ទេ បើ​ទោះ​បី​ជា​ការ​បកស្រាយ​នោះ ​បាន​ផ្ដល់​ប្រយោជន៍​មក​ឱ្យ​កម្ពុជា​ក៏ដោយ៖ «ភ្ញៀវ​ដែល​ចុះ​ឈ្មោះ​ហើយ​សុទ្ធ​តែ​មាន​សកម្មភាព​ធម្មតា អត់​មាន​ការ​លុប​ចោល ឬ​ក៏​មាន​ការ​ផ្អាក​ដំណើរ គឺ​អត់​ទាន់​មាន​ទេ ប៉ុន្តែ​គ្រាន់​តែ​ថា សកម្មភាព​ដែល​ត្រូវ​កក់ (Booking) ថ្មី​មក វា​អត់​ទាន់​មាន។ ជន​ជាតិ​ថៃ កាល​ពី​ម្សិលម្ង៉ៃ ខ្ញុំ​ទើប​តែ​នាំ​ចេញ​ទៅ ១​ក្រុម ចូល​តាម​ច្រក​ប៉ោយប៉ែត ហើយ​ក៏​ចេញ​ទៅ​វិញ ច្រក​អូរស្មាច់»។

ចំណែក​មន្ត្រី​មន្ទីរ​ទេសចរណ៍​ក៏​បាន​អះអាង​ប្រហាក់ប្រហែល​គ្នា​ថា ចំនួន​ជនជាតិ​ថៃ ដែល​មក​ទស្សនា​កម្ពុជា នៅ​តែ​កើន​ឡើង។

ប្រធាន​មន្ទីរ​ទេសចរណ៍​ខេត្ត​សៀមរាប ​លោក ង៉ូវ សេងកាក់ បាន​មាន​ប្រសាសន៍​ថា អ្នក​ទេសចរណ៍​ជនជាតិ​ថៃ នៅ​តែ​បន្ត​ចូល​មក​ទស្សនា​ប្រាសាទ​អង្គរ​វត្ត​ខេត្ត​សៀមរាប។

លោក ង៉ូវ សេងកាក់ បាន​បញ្ជាក់​ថា ចំនួន​ជនជាតិ​ថៃ ដែល​ចូល​មក​ទស្សនា​ខេត្ត​សៀមរាប ក្នុង​ឆ្នាំ​២០១៣ មាន​ការ​កើន​ឡើង​ជាង​កាល​ពី​ឆ្នាំ​២០១២ កន្លង​ទៅ៖ «នៅ​តែ​មាន ខេត្ត​សៀមរាប យើង​ល្អ​តើ! ភ្ញៀវ​មក​ធម្មតា។ កើន​តើ!»។

ក្នុង​រយៈពេល ៩​ខែ ឆ្នាំ​​២០១៣ ​អ្នក​ទេសចរ​ជនជាតិ​ថៃ ដែល​ចូល​មក​ទស្សនា​កម្ពុជា មាន​ចំនួន​ប្រមាណ​ជាង ១៦​ម៉ឺន ៤​ពាន់​នាក់។ ចំនួន​នេះ​បាន​កើន​ឡើង ៧១% បើ​ប្រៀបធៀប​ទៅ​នឹង​រយៈ​ពេល​​ដូច​គ្នា​កាល​ពី​ឆ្នាំ​២០១២ កន្លង​ទៅ។

ចំណែក​អ្នក​វិយោគ​ទុន​មួយ​ចំនួន​បាន​មើល​ឃើញ​ថា សក្ដានុពល​នៃ​ពាណិជ្ជកម្ម​រវាង​កម្ពុជា-​ថៃ គឺ​មាន​ការ​ប្រែប្រួល​ខ្លះៗ ទៅ​តាម​ស្ថានភាព​នយោបាយ​នៃ​ប្រទេស​ទាំង​ពីរ ក៏​ប៉ុន្តែ​ការ​ដោះស្រាយ​ជម្លោះ​ព្រំដែន​នៅ​ជិត​តំបន់​ព្រះវិហារ​ដោយ​ពិត​ប្រាកដ នឹង​ផ្ដល់​ផល​ប្រយោជន៍​ល្អ​ដល់​វិស័យ​ពាណិជ្ជកម្ម​កម្ពុជា-​ថៃ៕