ប្រមុខបក្សប្រឆាំងចុះជួបអ្នកគាំទ្របន្ទាប់ពីប្រកាសធ្វើបាតុកម្មជាថ្មីនៅថ្ងៃទី១០ធ្នូ

ដោយ លី ម៉េងហួរ rfi, អត្ថបទចុះ​ផ្សាយ​នៅ​ថ្ងៃ ពុធ 20 វិច្ឆិកា 2013

បន្ទាប់ពី​ប្រកាស​ធ្វើបាតុកម្ម​ជាថ្មី នៅ​ថ្ងៃទី១០ធ្នូ ទិវា​សិទ្ធិមនុស្ស​អន្តរជាតិ លោក សម រង្ស៊ី និង​លោក កឹម សុខា បាន​បន្ត​ចុះ​ជួប​សកម្មជន ដើម្បី​គៀងគរ ប្រមូល​កម្លាំង​អ្នកគាំទ្រ ឡើងមក​ធ្វើបាតុកម្ម​ជាថ្មី នៅ​ថ្ងៃទី១០ធ្នូ នៅ​រាជធានី​ភ្នំពេញ។ នៅ​ថ្ងៃទី២០ និង​ថ្ងៃទី២១វិច្ឆិកា​នេះ លោក​សម រង្ស៊ី និង​លោក​កឹម​សុខា ត្រូវ​ចុះទៅ​ជួប​សកម្មជន នៅ​ខេត្តព្រៃវែង និង​ខេត្តស្វាយរៀង។

បន្ទាប់ពី​ហែ​កឋិន ជួប​សំណេះសំណាល​ជា​បន្តបន្ទាប់​ជាមួយ​ក្រុម​អ្នកគាំទ្រ លោក សម រង្ស៊ី និង​លោក​កឹម​សុខា បានរួម​ដំណើរ​គ្នា ចុះ​ជួប​ប្រជាពលរដ្ឋ និង​សមាជិក​ក្រុមប្រឹក្សាឃុំ​សង្កាត់ របស់​បក្សប្រឆាំង នៅ​ព្រឹក​ថ្ងៃទី២០ ខែវិច្ឆិកា​នេះ នៅ​សង្កាត់​បារាយណ៍ ក្រុង​ព្រៃវែង។ តាម​កម្មវិធី នៅពេល​រសៀល មេបក្ស​ប្រឆាំង​ទាំងពីរ ក៏ត្រូវ​ជួប​សំណេះសំណាល ជាមួយ​បងប្អូន​ប្រជាពលរដ្ឋ នៅ​ឃុំ​ធា​យ ស្រុក​បាភ្នំ ខេត្តព្រៃវែង។

តាម​កម្មវិធី នៅ​ថ្ងៃទី២១ ខែវិច្ឆិកា វេលា​ម៉ោង ៨ ព្រឹក លោក សមរង្ស៊ី និង​លោក កឹម សុខា នឹង​បន្ត​ជួប​សំណេះសំណាល​ជាមួយ​បងប្អូន​ប្រជាពលរដ្ឋ និង​សមាជិក​ក្រុមប្រឹក្សា ឃុំ-សង្កាត់ នៅ​ក្រុង​ស្វាយរៀង ជាប់​ព្រំដែន​វៀតណាម។ លុះដល់​ម៉ោង ២ រសៀល លោក​ទាំងពីរ នឹង​ជួប​សំណេះសំណាល ជាមួយ​បងប្អូន​ប្រជាពលរដ្ឋ​នៅ​ឃុំ​គ្រោលគោ ស្រុក​ស្វាយជ្រុំ ខេត្តស្វាយរៀង។

ដំណើរ​ចុះ​មូលដ្ឋាន​ជួប​សកម្មជន​អ្នកគាំទ្រ​របស់​មេបក្ស​ប្រឆាំង នាពេលនេះ បានធ្វើ​ឡើង នៅពេលដែល​គណបក្ស​ស​ង្គ្រោះ​ជាតិ បានប្រកាស​កំណត់ យក​ថ្ងៃ១០ធ្នូ ទិវា​សិទ្ធិមនុស្ស​អន្តរជាតិ ជា​ថ្ងៃ​ធ្វើបាតុកម្ម​ជាថ្មី នៅ​ភ្នំពេញ។ ជា​បាតុកម្ម ដែល​លោក​កឹម​សុខា ឲ្យ​ដឹងថា ដើម្បី​តវ៉ា​រក​យុត្តិធម៌​សម្រាប់​អ្នកបោះឆ្នោត និង​ទាមទារ​យុត្តិធម៌​សម្រាប់​បាតុករ ដែល​ត្រូវបាន​បាញ់សម្លាប់ និង​បង្ក្រាប ក្នុង​បាតុកម្ម​កន្លងមក។

លោក កឹម​សុខា បាន​បញ្ជាក់ថា បាតុកម្មអហិង្សា​ជាថ្មី​របស់​គណបក្ស​សង្គ្រោះ​ជាតិ នៅ​ថ្ងៃ​ប្រារព្ធ​ទិវា​សិទ្ធិមនុស្ស​អន្តរជាតិ ថ្ងៃទី១០ធ្នូ​ខាងមុខ នឹងធ្វើ​ឡើង នៅ​ទីលាន​ប្រជាធិបតេយ្យ ហើយ​មាន​ទាំង​ការដើរ​ហែ​ក្បួន តាម​ដងផ្លូវ​ផងដែរ។ ប៉ុន្តែ​មកដល់​ថ្ងៃនេះ​ថ្នាក់ដឹកនាំ​គណបក្ស​សង្គ្រោះ​ជាតិ កំពុងតែ​ប្រជុំ​ជជែក​បន្ថែម អំពី​គម្រោង​ដឹកនាំ​បាតុកម្ម​តវ៉ា​ជាថ្មី​នោះ ដើម្បី​កុំ​ឲ្យ​ជាន់គ្នា នឹង​ក្រុម​អង្គការ​សមាគម​សិទ្ធិមនុស្ស ព្រមទាំង​សហជីព ដែល​នឹង​ប្រារព្ធ​ទិវា​សិទ្ធិមនុស្ស​អន្តរជាតិ ថ្ងៃ១០ធ្នូ នៅ​ភ្នំពេញ។  

ការកំណត់​ថ្ងៃ​ធ្វើបាតុកម្ម​ជាថ្មី​របស់​គណបក្ស​សង្គ្រោះ​ជាតិ នា​ថ្ងៃទី១០ធ្នូ ត្រូវបាន​លោក ទិ​ត សុធា អ្នកនាំពាក្យ​អង្គភាព​ព័ត៌មាន និង​ប្រតិកម្ម​រហ័ស របស់​ទីស្តីការគណៈរដ្ឋមន្ត្រី ព្រមាន​ជាមុន​ថា បើសិនជា​ការតវ៉ា​រប​ស់​គណបក្សប្រឆាំង ជ្រុល​ហួស និង​មិនមាន​សុំច្បាប់ ឬក៏​ប្រមូល​កម្លាំង​បង្កចលាចល​អ្វីមួយ នោះ​រដ្ឋាភិបាល នឹងមាន​វិធានការ​ទប់ស្កាត់ ជាមិនខាន។

ចាប់តាំងពី​ថ្ងៃ​បោះឆ្នោត ថ្ងៃទី២៨កក្កដា ឆ្នាំ២០១៣ គណបក្ស​សង្គ្រោះ​ជាតិ ដឹកនាំ​ដោយ​លោក​សមរង្ស៊ី និង​លោក​កឹម​សុខា បានធ្វើ​បាតុកម្ម ៣ លើក​រួចមកហើយ ដើម្បី​តវ៉ា​នឹង​លទ្ធផល​បោះឆ្នោត។ បាតុកម្ម​របស់​បក្សប្រឆាំង ដែលមាន​អ្នកចូលរួម​រាប់ម៉ឺន​នាក់ មាន​ទាំង​ទ្រង់ទ្រាយ​ធំ ៣ យប់ ៣ ថ្ងៃ ចំនួន ២ លើក ដោយមាន​ទាំង​ការដើរ​ហែ​ក្បួន តាមផ្លូវ​ថែមទៀត។ បាតុកម្ម​ទាំងនោះ មិនមាន​អំពើហិង្សា​កើតឡើង ដែល​បង្ក​ជាការ​ប៉ះទង្គិច​រវាង​អាជ្ញាធរ​សមត្ថកិច្ច​ប៉ូលិស​ប៉េអឹម ជាមួយនឹង​ក្រុមបាតុករ​របស់​បក្សប្រឆាំង​នោះឡើយ៕