អត្ថបទចុះផ្សាយនៅថ្ងៃ ពុធ 20 វិច្ឆិកា 2013
សមាជិកព្រឹទ្ធសភាគណបក្សសម រង្ស៊ីចំនួន ១១រូប បានសេចក្តីថ្លែងការណ៍មួយនៅថ្ងៃពុធនេះដោយបដិសេធមិនចូលប្រជុំដើម្បីអនុម័តច្បាប់ថវិកាដែលព្រឹទ្ធសភាគ្រោងបើកធ្វើនៅថ្ងៃព្រហស្បតិ៍ស្អែកនេះទេ។ ពួកគេបានផ្តល់ហេតុផលថា រដ្ឋសភានិងរដ្ឋាភិបាលដែលបង្កើតឡើងដោយគណបក្សប្រជាជនម្នាក់ឯងគឺគ្មានធម្មនុញ្ញភាពឡើយ។ ពហិការមិនចូលប្រជុំពីសំណាក់សមាជិកព្រឹទ្ធសភាគណបក្សសម រង្ស៊ី បាន កើតឡើងខណៈដែលវិបត្តិនយោបាយក្រោយការបោះឆ្នោតនៅមិនទាន់អាចដោះស្រាយបាន។
នៅក្នុងសេចក្តីថ្លែងការណ៍មួយដែលចេញផ្សាយនៅថ្ងៃពុធនេះ សមាជិកព្រឹទ្ធសភាគណបក្សសម រង្ស៊ី ទាំង ១១រូបបានប្រកាសថា ខ្លួននឹងមិនចូលប្រជុំនៅថ្ងៃព្រហស្បតិ៍ទី២១ វិច្ឆិកានេះទេ។ ការប្រកាសមិនចូលប្រជុំរបស់សមាជិកព្រឹទ្ធសភាគណបក្សសម រង្ស៊ី បានធ្វើឡើងខណៈដែលព្រឹទ្ធសភាគ្រោងបើកកិច្ចប្រជុំនៅថ្ងៃព្រហស្បតិ៍នេះដើម្បីពិភាក្សានិងអនុម័តសេចក្តីព្រាងច្បាប់មួយចំនួនក្នុងនោះក៏មានច្បាប់ស្តីពីថវិកាជាតិឆ្នាំ ២០១៤ ដែលរដ្ឋសភាទើបតែបានអនុម័តកាលពីថ្ងៃទី ១២វិច្ឆិកា។
សមាជិកព្រឹទ្ធសភាគណបក្សសម រង្ស៊ី បានលើកហេតុផលថា ការបង្កើតរដ្ឋសភា និងរដ្ឋាភិបាលដោយគណបក្សប្រជាជនកម្ពុជាជាឯកបក្សបានល្មើសទៅនឹងរដ្ឋធម្មនុញ្ញនិងមិនស្របច្បាប់ឡើយ។ ដូច្នេះ ពួកគេមិនចូលប្រជុំព្រឹទ្ធសភាដើម្បីអនុម័តសេចក្តីព្រាងច្បាប់ដែលរដ្ឋសភាឯកបក្សបានអនុម័តនោះឡើយ។
គួរបញ្ជាក់ថា គណបក្សសង្គ្រោះជាតិដែលមានតំណាងរាស្ត្រជាប់ឆ្នោត ៥៥ រូបបានធ្វើពហិការមិនចូលប្រជុំសភារហូតមកក្រោមហេតុផលថា មានភាពមិនប្រក្រតីជាច្រើនក្នុងពេលបោះឆ្នោតកាលពីថ្ងៃទី ២៨ កក្កដា។ គណបក្សប្រឆាំងដែលជាការរួមបញ្ចូលគ្នារវាងគណបក្សសម រង្ស៊ី និងគណបក្សសិទ្ធិមនុស្សនៅតែទាមទារឲ្យមានការស៊ើបអង្កេតភាពមិនប្រក្រតីទាំងនោះ ប៉ុន្តែ គណបក្សប្រជាជនកម្ពុជាមិនយល់ព្រមឡើយ។ គណបក្សសង្គ្រោះជាតិក៏បានហៅរដ្ឋសភាថាមិនស្របច្បាប់ដែរ។
ឆ្លងកាត់មហាបាតុកម្ម៣លើក និងការចរចាគ្នាជាបន្តបន្ទាប់ គណបក្សទាំងពីរក៏នៅតែមិនអាចរកច្រកចេញពីវិបត្តិនយោបាយបានដដែល។ ទីបំផុត គណបក្សសង្គ្រោះជាតិបានប្រកាសគម្រោងធ្វើមហាបាតុកម្មម្តងទៀតនៅថ្ងៃទី១០ធ្នូខាងមុខ។ ការប្រកាសធ្វើពហិការមិនចូលប្រជុំរបស់សមាជិកព្រឹទ្ធសភាគណបក្សសម រង្ស៊ីនៅពេលនេះជាសញ្ញាថ្មីទៀតនៃការមិនចុះសម្រុងគ្នានៅក្នុងស្ថាប័ននីតិបញ្ញតិ្តទាំងពីរថ្នាក់។
ប៉ុន្តែ ពហិការនេះមិនបានបង្កការរាំងស្ទះដល់ដំណើរការកិច្ចប្រជុំទេ។ សេចក្តីព្រាងច្បាប់ថវិកាក៏ត្រូវបានរដ្ឋសភាអនុម័តដោយគ្មានវត្តមានតំណាងរាស្ត្រគណបក្សសង្រោះជាតិដែរ៕
1 comment:
If you don't stand up and find the justice,freedom for to day,the injustice will come back again and again for ever. We can't sleep and waiting justice and freedom drop from sky. We have to find justice and freedom to day for our self and for our next generation.
Post a Comment