កុមារាឈ្មោះ ថេត អាយុ១១ឆ្នាំជិះលើខ្នងក្របីដែលកំពុងស៊ីស្មៅតាមវាលស្រែ ក្នុងស្រុកបាភ្នំ ខេត្តព្រៃវែង នាថ្ងៃទី៣០ សីហា ២០០៩។ Photo: RFA |
ដោយ ហ៊ុំ ចំរើន RFA 2013-11-19
ប្រជាពលរដ្ឋឲ្យដឹងថា ដំណាំស្រូវរបស់ពួកគាត់បានជួបបញ្ហាដាច់ទឹកបញ្ចូលស្រែជាង ២សប្ដាហ៍មកហើយ ពោលគឺស្រូវចាប់ដាច់ទឹកតាំងពីសាបព្រោះដុះថ្មីរហូតមក។ ហើយក្នុងនោះ ស្រូវរបស់អ្នកភូមិមួយចំនួនក៏បានចាប់ផ្ដើមងាប់បណ្ដើរៗផងដែរ។
ប្រជាពលរដ្ឋម្នាក់ឈ្មោះលោក អេង ស៊ីណា រស់នៅភូមិសូរិយា ឃុំបឹងដោល ស្រុកព្រះស្ដេច មានប្រសាសន៍នៅថ្ងៃទី១៨ វិច្ឆិកា ថា អ្នកភូមិពុំមានទឹកបញ្ចូលស្រែដោយសារបាក់ទំនប់ស្តុកទឹកពោធិ៍បុរី បណ្ដាលឲ្យទឹកដែលមាននៅក្នុងប្រឡាយ ហូរចេញអស់គ្មានសល់។ ហើយបញ្ហាទាំងនេះ ធ្វើឲ្យដំណាំស្រូវរបស់អ្នកភូមិអមប្រឡាយទឹកប្រមាណ ៥០០ហិកតារ រងផលប៉ះពាល់។ ហើយស្រែអ្នកភូមិដែលរងផលប៉ះពាល់ច្រើនជាងគេ គឺនៅភូមិសូរិយា៖ «ពីដើមមកហ្នឹង ប្រើទឹកទំនប់ពោធិ៍បុរី ហ្នឹងបាទ! ទំនប់ពោធិ៍បុរី ទប់នៅត្រង់អូរតាហែន ព្រោះវាជាន់ប្រព័ន្ធទឹកហ្នឹងទាំងអស់។ ដល់តែជីកប្រឡាយពីត្បូងមកទៅ ទទួលវាបាក់អាទំនប់ហ្នឹង វាហូរទៅទាំងអស់តែហ្មង។ រីងហ្នឹងជាប់កន្លះខែហើយ ពួកខ្ញុំអត់មានបាចដាក់អីទេ រីងអស់តែម្ដង។ បាទ! តាំងពីព្រោះហើយហ្នឹង អស់ទឹកហ្មង បើគ្មានដាក់ទេស្រូវហ្នឹងចប់ហ្មងអស់ហ្មង»។
លោកបន្តថា ស្រែរបស់អ្នកភូមិដែលជួបបញ្ហាខ្វះខាតទឹកបញ្ចូលស្រែមានប្រមាណជាង ៥០០ហិកតារ របស់ប្រជាពលរដ្ឋនៅឃុំបឹងដោល ស្រុកព្រះស្ដេច និងស្រែរបស់ប្រជាពលរដ្ឋមួយចំនួននៅឃុំឫស្សីស្រុក ស្រុកពាមជរ ខេត្តព្រៃវែង។
ឆ្លើយតបនឹងបញ្ហានេះ អភិបាលស្រុកព្រះស្ដេច លោក ប៉ិច សុង បង្ហាញថា អ្នកភូមិខ្វះទឹកបញ្ចូលស្រែនោះពិតជាមានមែន។ ប៉ុន្តែ ការខ្វះខាតទឹកនេះដោយសារការមិនចុះសម្រុងគ្នារឿងការបង្ហូរទឹកបញ្ចូលស្រែរវាងអ្នកភូមិក្រាំងក្រយ៉ង និងប្រជាពលរដ្ឋនៅភូមិសូរិយា។ លោកបន្តថា បញ្ហានេះអាជ្ញាធរកំពុងរៀបចំដោះស្រាយឲ្យពួកគាត់ ដើម្បីឲ្យបានទឹកបញ្ចូលស្រែហើយ៖ «អត់ធ្ងន់ធ្ងរអីទេបង គ្រាន់តែប្រជាជនខាងណោះគាត់ចង់បានទឹកដែរ យើងទៅដោះស្រាយណាបង បើសិនទឹក អ៊ីចឹងយើងប្រឹងប្រែងហើយ។ ទឹកវាមានទឹកកន្លែងស្តុកទំនប់ពោធិ៍បុរី ហ្នឹងហើយ តែគ្រាន់តែថា ខាងក្រាំងក្រយ៉ង គាត់អត់ឲ្យខាងនេះបង្ហូរមកលើសូរិយា តែប៉ុណ្ណឹងទេបង។ តែឥឡូវ ខ្ញុំឲ្យនាយករដ្ឋបាល ហើយនិងឃុំអី ចុះទៅដោះស្រាយជួបជាមួយឃុំក្រាំងក្រយ៉ង ស្រុកពាមជរ»។
យ៉ាងណាក៏ដោយ ប្រជាពលរដ្ឋបានឲ្យដឹងថា ស្រែស្រូវរបស់អ្នកភូមិដែលនៅឆ្ងាយពីដងប្រឡាយភាគខាងក្រោម បានទទួលរងគ្រោះការខ្វះខាតទឹកធ្ងន់ធ្ងរជាងគេ។
ប្រជាពលរដ្ឋអំពាវនាវសុំឲ្យក្រសួងធនធានទឹក និងមន្ត្រីដែលមានការពាក់ព័ន្ធនឹងបញ្ហានេះ ធ្វើយ៉ាងណាជួយដោះស្រាយពួកគាត់ឲ្យបានឆាប់ ដើម្បីជៀសវាងកុំឲ្យបញ្ហានេះកាន់តែមានសភាពធ្ងន់ធ្ងរ ពិបាកធ្វើការដោះស្រាយនោះ៕
1 comment:
Help...Mr Rainsy...Where are you???
Post a Comment