 |
| RFA photo |
ដោយ ដែន អយុធ្យា RFA 2013-11-14
រដ្ឋសភានីតិកាលទី៥ នៃរាជរដ្ឋាភិបាលកម្ពុជា កាលពីថ្ងៃទី១២ ខែវិច្ឆិកា បានអនុម័តជាឯកច្ឆន្ទលើសេចក្តីព្រាងច្បាប់បង្កើតក្រសួងមុខងារសាធារណៈ ក្រសួងឧស្សាហកម្ម និងសិប្បកម្ម និងក្រសួងរ៉ែ និងថាមពល។
ការអនុម័តនេះមាន ៦៦សំឡេង សុទ្ធតែជាសមាជិកសភាមកពីគណបក្សប្រជាជនកម្ពុជា។ រីឯសមាជិកសភាគណបក្សសង្គ្រោះជាតិ ធ្វើពហិការមិនចូលរួមប្រជុំទេ។
ការបង្កើតក្រសួងបន្ថែមចំនួន៣ របស់រដ្ឋាភិបាល ទទួលរងការរិះគន់ពីមន្ត្រីគណបក្សប្រឆាំង និងមន្ត្រីសង្គមស៊ីវិលមួយចំនួននៅកម្ពុជា។
លោក យឹម សុវណ្ណ អ្នកនាំពាក្យ និងជាបេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ។ លោកបានចាត់ទុកការបង្កើតក្រសួង៣បន្ថែមទៀត នឹងមិនចម្រើនដល់សង្គមជាតិទេ។ ផ្ទុយទៅវិញ នាំឲ្យខាតបង់ដល់ថវិកាជាតិកាន់តែច្រើនថែមទៀត។
មន្ត្រីបក្សប្រឆាំងរូបនេះថ្លែងចំអកថា ការបង្កើតក្រសួង៣បន្ថែម គ្រាន់ជាការបែងចែកអំណាចបុណ្យសក្តិជូនមន្ត្រីបក្សកាន់អំណាច និងបង្កើតឲ្យមានអំពើពុករលួយថែមទៀត។
ចំណែកមន្ត្រីសង្គមស៊ីវិលមួយចំនួន ក៏បានរិះគន់រដ្ឋាភិបាលដែលបង្កើតក្រសួងថ្មីចំនួន៣បន្ថែមក្នុងអាណត្តិទី៥ នេះដែរ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងជាប្រធានសហភាពសហជីពកម្ពុជា បានពេបជ្រាយចំពោះការបង្កើតក្រសួងថ្មីបន្ថែម នាំឲ្យរដ្ឋាភិបាលចំណាយថវិកាជាតិខ្ជះខ្ជាយឥតប្រយោជន៍ទៅវិញ។ មន្ត្រីសង្គមស៊ីវិលរូបនេះពោលចំអកថា មិនថាបង្កើតក្រសួងថ្មីត្រឹម៣ទេ សូម្បីបង្កើតឲ្យមានក្រសួង ២០ថែមទៀត ក៏គ្មានប្រយោជន៍ដែរ ដរាបណាប្រមុខរដ្ឋាភិបាល ឬថ្នាក់ដឹកនាំតាមក្រសួងនីមួយៗគ្មានឆន្ទៈលុបបំបាត់ភាពអសកម្មនៅក្នុងស្ថាប័នខ្លួន ឬនៅក្នុងសង្គមនោះ។
ប្រធានសមាគមប្រជាធិបតេយ្យឯករាជ្យសេដ្ឋកិច្ចក្រៅប្រព័ន្ធ លោក វ៉ន ពៅ ក៏គ្មានជំនឿថា ការបង្កើតក្រសួងបន្ថែមអាចជួយឲ្យសង្គមជាតិរីកចម្រើនទេ។ ផ្ទុយទៅវិញ លោកថា ការបង្កើតក្រសួងថ្មីចំនួន៣បន្ថែម នាំឲ្យខាតថវិកាជាតិទៅវិញទេ។ លោកថា ទោះលោកនាយករដ្ឋមន្ត្រី ហ៊ុន សែន ប្រកាសធ្វើកំណែទម្រង់ស៊ីជម្រៅនៃរាជរដ្ឋាភិបាលនីតិកាលទី៥ ឬព្រមានមិនឲ្យមានក្រសួងគ្រួសារនិយមបែបណាក្តី ក៏ប៉ុន្តែលោកមិនមានជំនឿថាមានប្រសិទ្ធភាពទេ។
ទោះយ៉ាងណា លោក ព្រាប កុល នាយកប្រតិបត្តិអង្គការតម្លាភាព ហាក់បានបង្ហាញទស្សនៈគាំទ្ររដ្ឋាភិបាលចំពោះការបង្កើតក្រសួងថ្មីចំនួន៣បន្ថែមពេលនេះ។ ប៉ុន្តែលោកថា នឹងរង់ចាំមើលប្រសិទ្ធភាពនៃការអនុវត្តការងាររបស់អ្នកដឹកនាំតាមក្រសួងទាំងនោះជាមុនសិន។
ដោយឡែក លោក សុក សំអឿន នាយកប្រតិបត្តិក្រុមអ្នកច្បាប់ការពារសិទ្ធិកម្ពុជា បានបង្ហាញអារម្មណ៍រារែកក្នុងការរិះគន់រដ្ឋាភិបាលបង្កើតក្រសួងថ្មី៣បន្ថែមក្នុងអាណត្តិទី៥ នាំឲ្យប្រទេសជាតិរីកចម្រើននេះទេ។ លោកថា បើចង់កែប្រែភាពមិនប្រក្រតី ឬភាពអសកម្មអ្វីមួយ សំខាន់ត្រូវផ្អែកទៅលើឆន្ទៈអ្នកដឹកនាំរដ្ឋាភិបាល ឬស្ថាប័ននីមួយៗ ទើបមានការផ្លាស់ប្ដូរពិតប្រាកដ។
យ៉ាងណាក៏ដោយ រដ្ឋសភាបានអនុម័តបង្កើតឲ្យមានក្រសួងថ្មីចំនួន៣បន្ថែមរួចហើយ កាលពីថ្ងៃទី១២ ខែវិច្ឆិកា រួមមាន ក្រសួងមុខងារសាធារណៈ ក្រសួងឧស្សាហកម្ម និងសិប្បកម្ម និងក្រសួងរ៉ែ និងថាមពល។
សមាជិករដ្ឋសភាគណបក្សប្រជាជនកម្ពុជា បានឲ្យដឹងថា ការបង្កើតក្រសួងថ្មីចំនួន៣បន្ថែម គឺស្របតាមគោលនយោបាយរបស់រដ្ឋាភិបាល និងយុទ្ធសាស្ត្រចតុកោណដំណាក់កាលទី៣ នៃរដ្ឋសភានីតិកាលទី៥។
ហើយថា ការបង្កើតក្រសួងថ្មីនេះដើម្បីគ្រប់គ្រងឲ្យមានប្រសិទ្ធភាពទៅលើប្រព័ន្ធមុខងារសាធារណៈ និងការធ្វើអាជីវកម្មធនធានរ៉ែ និងឧស្ម័នប្រេងកាត។ ជាងនេះ ក៏ដើម្បីគ្រប់គ្រងវិស័យឧស្សាហកម្ម និងថាមពលអគ្គិសនីឲ្យមានប្រសិទ្ធភាព ដែលជាវិស័យទ្រទ្រង់កំណើនសេដ្ឋកិច្ចជាតិរយៈពេលវែង ជាពិសេស ដើម្បីសម្រេចគោលដៅឆ្នាំ២០២០ កម្ពុជា មានអគ្គិសនីប្រើប្រាស់តាមទីជនបទនៅទូទាំងប្រទេស៕
No comments:
Post a Comment