Monday, December 16, 2013
សមាគមខ្មែរកម្ពុជាក្រោមធ្វើសន្និបាតប្រចាំឆ្នាំ
ដោយ យាង សុជាមេត្តា RFA 2013-12-14
សន្និបាតប្រចាំឆ្នាំនេះបានផ្ដោតលើការកែទម្រង់គោលនយោបាយមួយចំនួន និងលើកផែនការសកម្មភាពសម្រាប់ឆ្នាំខាងមុខ។
នេះជាលើកទី២ហើយដែលលេខាធិការដ្ឋាននៃអង្គការសមាគមខ្មែរកម្ពុជាក្រោមនៅកម្ពុជា បានរៀបចំអោយមានសន្និបាតឡើង បន្ទាប់ពីលេខាធិការដ្ឋានមួយនេះត្រូវបានបង្កើតឡើងនៅចុងឆ្នាំ២០១១។ សម្រាប់សន្និបាតប្រចាំឆ្នាំ២០១៣នេះ ព្រះសង្ឃនិងពលរដ្ឋខ្មែរក្រោមប្រមាណ ១៥០អង្គនិងនាក់ ដែលជាសមាជិកនៃអង្គការសមាគមខ្មែរកម្ពុជាក្រោមទាំង ១២ និងសាខាអង្គការសមាគមខ្មែរកម្ពុជាក្រោមតាមបណ្ដាខេត្តមួយចំនួនក្នុងប្រទេសកម្ពុជា ចូលរួម។
ប្រធានការិយាល័យទំនាក់ទំនងរដ្ឋបាល និងហិរញ្ញវត្ថុនៃលេខាធិការដ្ឋានអង្គការសមាគមខ្មែរកម្ពុជាក្រោម លោក សឺន ជុំជួន បានអោយដឹងថា គោលបំណងនៃសន្និបាតប្រចាំឆ្នាំនេះ គឺដើម្បីលើកយកបញ្ហាដែលព្រះសង្ឃនិងពលរដ្ឋខ្មែរក្រោមនៅកម្ពុជាក្រោម និងនៅក្នុងប្រទេសកម្ពុជា បានជួបប្រទះ និងដើម្បីបង្ហាញសមិទ្ធផលទាំងឡាយដែលអង្គការសមាគមខ្មែរកម្ពុជាក្រោម សម្រេចបានក្នុងឆ្នាំកន្លងមក។ សន្និបាតក៏មានបំណងបង្កើតផែនការរួមសម្រាប់អង្គការសមាគមខ្មែរកម្ពុជាក្រោមទាំងអស់ ដើម្បីអនុវត្តក្នុងឆ្នាំខាងមុខ។ ក្រៅពីនេះ សន្និបាតក៏បានលើកឡើងពីការប្រឈមផ្នែកហិរញ្ញវត្ថុ និងមធ្យោបាយដើម្បីស្វែងរកមូលនិធិទ្រទ្រង់ទាំងនោះ។
លោក សឺន ជុំជួន៖ «សម្រាប់ឆ្នាំចាស់កន្លងមក គឺយើងបានទទួលសប្បុរសជនក្រៅប្រទេស នៅក្នុងប្រទេស តាមរយៈបុគ្គល ដូចជានៅអាមេរិក នៅកាណាដា នៅបារាំង នៅអូស្ត្រាលី នៅអ៊ីតាលី ជាដើម។ នៅក្នុងឆ្នាំ២០១៤ ខាងមុខនេះ អ្វីដែលយើងបម្រុងនឹងធ្វើគោលនយោបាយហិរញ្ញវត្ថុនោះ គឺយើងនឹងបង្កើតដោយស្វែងរកប្រភពហិរញ្ញវត្ថុដោយខ្លួនឯង យើងនឹងបង្កើតគណៈកម្មការមួយដើម្បីយើងស្វែងរកពីប្រភពអន្តរជាតិ ចំណុចពិសេសមួយទៀត យើងនឹងមានបង្កើតបណ្ដាញមួយទៀត គឺបណ្ដាញមូលនិធិតាមបណ្ដាខេត្តនានាដែលយើងមានសកម្មជន យើងមានសាខានៅទីនោះ»។
លើសពីនេះ សន្និបាតក៏បានពិភាក្សាអំពីការកែទម្រង់គោលនយោបាយមួយចំនួនដើម្បីធ្វើអោយការអនុវត្តការងារក្នុងឆ្នាំខាងមុខប្រកបដោយប្រសិទ្ធភាព មានដូចជា ការផ្លាស់ប្ដូររចនាសម្ព័ន្ធការងារ ការពង្រឹងសមត្ថភាពសមាជិកសកម្មដែលមានស្រាប់ និងការលើកទឹកចិត្តឲ្យព្រះសង្ឃ និងនិស្សិតខ្មែរក្រោមដែលមានសមត្ថភាពចូលរួមឲ្យបានច្រើនក្នុងសកម្មភាពការងាររបស់អង្គការសមាគមខ្មែរកម្ពុជាក្រោម។
សម្រាប់ឆ្នាំ២០១៤ ខាងមុខ ផែនការសកម្មភាពចម្បងរបស់លេខាធិការដ្ឋាននៃអង្គការសមាគមខ្មែរកម្ពុជាក្រោម គឺបន្តស្វែងរកដំណោះស្រាយសម្រាប់ព្រះសង្ឃ និងពលរដ្ឋខ្មែរក្រោមដែលត្រូវបានតុលាការវៀតណាម កាត់ទោសអោយជាប់ពន្ធនាគារ និងបញ្ហាផ្សេងៗទៀតដែលខ្មែរក្រោមកំពុងប្រឈម។ ចំណែកនៅកម្ពុជាវិញ លេខាធិការដ្ឋានខ្មែរកម្ពុជាក្រោម នឹងបន្តដោះស្រាយបញ្ហាលំបាកដែលពលរដ្ឋខ្មែរក្រោមកំពុងជួបប្រទះ និងបន្តធ្វើការឲ្យជិតស្និទ្ធ ព្រមទាំងបង្កើនទំនាក់ទំនងជាមួយរដ្ឋាភិបាលកម្ពុជា ដើម្បីឲ្យរដ្ឋាភិបាលយកចិត្តទុកដាក់បន្ថែមលើពលរដ្ឋខ្មែរក្រោម៕
Subscribe to:
Post Comments (Atom)
2 comments:
Sam Rainsy use gender comparison to attacked political opponent is wrong, it show how narrow mind Sam Rainsy is and he need to check his own moral compass
History shown that Khmer only kill Khmer for power, I didn't see Khmer really fight a full scale war with other nation. If Khmer are so dump to be use by other nation, who fault is that? Some of those paranoia people scar about "Youn" take over Khmer it will be come true one day, because these people are the real "Youn" that keep making trouble and degrade Khmer unity that play into the enemy hand.
Post a Comment