ព្រះរាជអាជ្ញាតុលាការខេត្តស្វាយរៀង បញ្ជាក់ថា មិនមានការចាប់ខ្លួនអភិបាលក្រុងបាវិតទេ
03 March 2012
សុខ ភក្តី
CEN
ភ្នំពេញ: ព្រះរាជាអាជ្ញាតុលាការខេត្តស្វាយរៀង លោក ហ៊ីង ប៊ុនជា បញ្ជាក់ប្រាប់ CEN នៅព្រឹកថ្ងៃទី៣ ខែមីនា ឆ្នាំ២០១២ ថា គ្មានការចាប់ខ្លួនលោក ឈូក បណ្ឌិត អភិបាលក្រុងបាវិត ដែលជាប់ចោទក្នុងរឿងបាញ់ស្ត្រីកម្មករកាត់ដេរ ៣ នាក់ របួសធ្ងន់ទេ។ សំណុំរឿងនោះ កំពុងស្ថិតក្នុងដៃព្រះរាជអាជ្ញានៅឡើយ។
លោក ហ៊ីង ប៊ុនជា បានមានប្រសាសន៍តាមទូរស័ព្ទថា "ខ្ញុំអត់មានទាន់ចាត់ចែងទេ។ រឿងកំពុងនៅក្នុងដៃខ្ញុំ។ អីចឹងមិនទាន់មានហេតុការណ៍ចាប់ខ្លួនទេ។ បើមាន ( ចាប់ខ្លួនលោក ឈូក បណ្ឌិត អភិបាលក្រុងបាវិត ) គឺមន្ត្រីនគរបាលនឹងរាយការណ៍ មកខ្ញុំហើយ"។
ការបញ្ជាក់របស់លោកព្រះរាជអាជ្ញាយ៉ាងដូច្នេះ បានធ្វើឡើងខណៈដែលមានដំណឹងលេចឮពីសកម្មជនសិទ្ធិមនុស្ស បញ្ជាក់ថា មន្ត្រីប៉ូលិសខេត្តស្វាយរៀង បានរាយការណ៍ថា លោក ឈូក បណ្ឌិត អភិបាលក្រុងបាវិត ដែលជាជនសង្ស័យ បាញ់ប្រហារលើក្រុមកម្មករកាត់ដេរតវ៉ានៅក្រុងបាវិត កាលពីថ្ងៃទី២០ ខែកុម្ភៈ ឆ្នាំ២០១២ បណ្តាលឲ្យស្ត្រីកម្មករ ៣នាក់ រងរបួសធ្ងន់នោះ ត្រូវបានប៉ូលិសចាប់ខ្លួន កាលពីល្ងាចថ្ងៃទី២ ខែមីនា ឆ្នាំ២០១២ នៅស្រុករមាសហែក ជាប់ព្រំដែនវៀតណាម។ លោកឈូកបណ្ឌិត ត្រូវបានប៉ូលិសឃុំខ្លួន នៅស្នងការនគរបាលខេត្តស្វាយរៀង។
យ៉ាងណាក៏ដោយ លោកព្រះរាជអាជ្ញា ហ៊ីង ប៊ុនជា ក៏បានបន្ថែមថា "មិនមានការចាប់ខ្លួន ( លោក ឈូក បណ្ឌិត ) ទេ។ ជួនកាល វាគ្រាន់តែធ្វើឲ្យសភាពការណ៍ វាច្របូកច្របល់ប៉ុណ្ណោះ។ ខ្ញុំកំពុងតែមើលសំណុំរឿងនេះ មកដល់ម៉ោង ១២ ថ្ងៃត្រង់ហើយ ខ្ញុំមិនទាន់ហ៊ានទៅផ្ទះផង។ ខ្ញុំកំពុងខំលម្អិតការងារនេះ។ អីចឹងនិយាយរួម គឺគ្មានការចាប់ខ្លួនទេ"។
ជាមួយនឹងប្រសាសន៍ដូច្នេះ លោកព្រះរាជអាជ្ញាតុលាការខេត្តស្វាយរៀង បានបន្តថា លោកមិនបានទាក់ទងថា លោកឈូកបណ្ឌិត សព្វថ្ងៃនេះ គាត់នៅកន្លែងណាទេ។
ទោះជាយ៉ាងណាក៏ដោយ មន្ត្រីនៅសាលាក្រុងបាវិត ខេត្តស្វាយរៀង ជាប់ព្រំដែនប្រទេសវៀតណាម បានឲ្យដឹងថា ក្រោយពីថ្ងៃកើតហេតុ កាលពីថ្ងៃទី២០ ខែកុម្ភៈ ឆ្នាំ២០១២ គឺលោក ឈូក បណ្ឌិត អភិបាលក្រុងបាវិត មិនបានទៅកាន់ការិយាល័យសាលាក្រុង ដើម្បីធ្វើការឡើយ៕
Subscribe to:
Post Comments (Atom)
1 comment:
នៅអាកែវ គង់ ម្នាក់ទៀត៕
Post a Comment