រឿងពិតពីក្រោយឆាកនៃកិច្ចប្រជុំកំពូលអាស៊ាន៖ ហោ ខៀវ ហ៊ុន កុងគ្នាអាម៉ាស់ខ្មែរ

ដោយ៖ ផ្ទៃក្នុង

ថ្ងៃទី៧ ខែមេសាឆ្នាំ២០១២

ផ្សាយនៅហ្វេសប៊ុក៖ ខ្មែរ សុវណ្ណភូមិ 

កិច្ចប្រជុំកំពូលអាស៊ានលើកទី២០ ប្រារព្ធធ្វើនៅក្នុងរាជធានីភ្នំពេញពីថ្ងៃទី ៣០ មីនាដល់ថ្ងៃទី ៤ មេសាឆ្នាំ ២០១២ នៅវិមានសន្តិភាពនាទីក្រុងភ្នំពេញ ថ្មីៗនេះដែលរដ្ឋាភិបាល កម្ពុជាចាត់ទុកថាជាមហាមោទនាភាពរបស់ខ្មែរ។ ដើម្បីរៀបចំកិច្ចប្រជំនេះឲ្យបាន ជោគជ័យ លោក ហ៊ុន សែន បានបង្កើតឲ្យមាន«គណ:កម្មាធិ ការជាតិរៀបចំកិច្ច ប្រជុំកំពូលអាស៊ាន លើកទី ២០» ដោយតែងតាំងលោក ហោ ណាំហុង ឧបនាយករដ្ឋមន្រ្តី រដ្ឋមន្រ្តីក្រសួងការបរទេស⁣និងសហប្រតិបត្តិការអន្តរជាតិធ្វើជាប្រធាន។ ក្នុងនាមជាប្រ ធានលោក ហោ ណាំហុង បានចុះហត្ថលេខាលើលិខិតសំរេចលេខ ០១៨ កបទ.សអ.បល ដើម្បីបង្កើតអនុគណ:កម្មាការជំនាញចំនួន៦ក្រោមការចាត់ចែង របស់លោក ប្រាក់ សុខុន រដ្ឋមន្រ្តីប្រតិភូអមនាយករដ្ឋមន្រ្តី។ អនុគណ:កម្មាការ ជំនាញ ទាំង៦នោះមាន៖

1. អនុគណ:កម្មាការខ្លឹមសារ និងឯកសារ ដែលមាន ឯកឧត្តម កៅ គឹមហួន រដ្ឋលេខាធិការក្រសួង ការបរទេស និងសហប្រតិបត្តការអន្តរជាតិ ធ្វើជាប្រធាន
2. អនុគណ:កម្មាការផ្គត់ផ្គង់និងភស្តុភារ មានឯកឧត្តម ហោ សុធន អគ្គលេខាធិការ នៃក្រសួង ការបរទេស និងសហប្រតិបត្តិការអន្តរជាតិ ជាប្រធាន
3. អនុគណ:កម្មាការពិធីការ មានឯកឧត្តម ហោ សុធន អគ្គលេខាធិការ នៃក្រសួងការបរទេស និង សហប្រតិបត្តិការអន្តរជាតិ ជាប្រធាន
4. អនុគណ:កម្មាការព័ត៌មាន និងផ្សព្វផ្សាយ មានឯកឧត្តម អ៊ុក ប្រាថ្នា រដ្ឋលេខាធិការក្រសួង ព័ត៌មាន ជាប្រធាន ។
5. អនុគណ:កម្មាការសន្តិសុខ និងសុខាភិបាល មាន ឯកឧត្តមនាយឧត្តមសេនីយ នេត សាវឿន អគ្គស្នងការនគរបាលជាតិ ជាប្រធាន
6. លេខាធិការដ្ឋាន មានឯកឧត្តម ហោ សុធន អគ្គលេខាធិការនៃក្រសួងការបរទេស និងសហប្រតិ បត្តិការអន្តរជាតិ ជាប្រធាន។

កិច្ចប្រជុំកំពូលនេះត្រូវបានលោក ហ៊ុន សែន អួតថាបានប្រព្រឹត្តទៅដោយជោគជ័យថ្វីបើ សម្រេចបានលទ្ធផលតិចតូចពីប្រធានបទបួនចំនុចរួមមាន៖ (១) របៀបវារ:ភ្នំពេញសំរាប់ ការកសាងសហគមន៍អាស៊ាន, (២) សេចក្តីថ្លែងការណ៏ភ្នំពេញ ស្តីពី អាស៊ាន: សហគមន៍ មួយ វាសនាតែមួយ, (៣) សេចក្តីថ្លែងការណ៏ របស់ថ្នាក់ដឹកនាំអាស៊ាន ស្តីពី អាស៊ានគ្មាន គ្រឿងញៀន ឆ្នាំ ២០១៥, និង (៤) សេចក្តីប្រកាស របស់ ប្រធានអាស៊ាន ក្នុងឪកាសខួប លើកទី ៤៥ របស់អាស៊ាន : “ មាគ៌ាឆ្ពោះទៅមុខ” ក៏ដោយ។

តែផ្ទុយទៅវិញអ្នកដែលដឹងហេតុការណ៏ផ្ទៃក្នុងគឺពិតជាមិនធម្មតា ដែលកត្តានេះ បានបង្ហាញឲ្យឃើញថាការរៀបចំកិច្ចប្រជុំនេះមានភាពអវិជ្ជមានជាច្រើនដូច ការលើក ឡើងរបស់នាយកសារពត៌មានដើមអំពិលលោក សយ សុភាព ជាឧទាហរណ៍ ស្រាប់ដូច ជាបញ្ហា ការចុះឈ្មោះអ្នកសារពត៌មាន ការចែកចាយឯកសារ ការខ្វះអ្នកនាំ ពាក្យ ខ្វះអ្នកបកប្រែ កន្លែងចង្អៀត ខ្វះអនាម័យជាដើម ជាពិសេសការមិនយកចិត្ត ទុកដាក់លើកងសន្តិសុខមួយចំនួន។ល។និង។ល។ តាមពិតបញ្ហាទាំងនេះវាបណ្តាល មកពីបញ្ហា ហោ (ណាំហុង) ខៀវ (កញ្ញារិទ្ធ) ហ៊ុន (សែន) កាច់កុងគ្នាសោះ។

រឿងទី១កើតចេញពីការច្រណែននិងមិនទុកចិត្តគ្នាក្នុងថ្នាក់ដឹកនាំបក្សប្រជាជនជាពិសេស លោក ខៀវ កញ្ញារិទ្ធ ដែលជារដ្ឋមន្រ្តីក្រសួងពត៌មាននិងជាអ្នកនាំពាក្យ រាជរដ្ឋាភិបាល ត្រូវបានលោក ហ៊ុន សែន ធីបចោលដូចសន្លឹកបៀស្អុយ។ សូម្បីតែអ្នកពត៌មានក៏គេមិន សម្ភាសនិងរវល់នឹងលោកដែរតែគេបែជាទៅសម្ភាសលោក កៅ គីមហួន ហើយអ្វីដែល យ៉ាប់ទៅទៀតនោះគឺគេបែទៅជាសម្ភាសលោក ជាម យៀប ដែលគ្រាន់តែជា បណ្ឌិតខុស ជំនាញនៅ  រដ្ឋាសភាជាតិកាន់ផ្នែកហិរញ្ញវត្ថុទៅវិញ។ ក្នុងបទសម្ភាស នោះលោក ជាម យៀប ធ្លាប់បាននិយាយឡូងៗជំនួសរដ្ឋាភិបាលរបស់ខ្លួនថា បញ្ហាជំលោះនៅសមុទ្រ ចិនខាងត្បូងនឹងមិនត្រូវបានគេលើកយកមកនិយាយ នៅក្នុងរបៀបវីរៈនែកិច្ចប្រជុំកំពូលអាស៊ានទេ។ លោក ខៀវ កញ្ញារិទ្ធ វិញ ក៏រឹតតែមិន ពេញចិត្តនឹងលោក ហោ ណាំហុង ទៅទៀតដោយលោកគិតថាលោក ហោ ណាំហុង ជាមនុស្សមិនសូវទទួលខុសត្រូវចាស់ស្ពឹក មិនសូវចេះភាសាបរទេស ហើយបើ និយាយវិញស្តាប់មិនបាន។ហើយបានទាយទុកថាការដែល លោក ហ៊ុន សែន មិនព្រមផ្តល់សេចក្តីទុកចិត្តដល់ខ្លួន តែបែជាប្រើ មនុស្សបែបលោក ហោ ណាំហុង នេះ លោកហ៊ុន សែន នឹងភ្ញាក់ខ្លួនហើយ។ លោកខៀវ កញ្ញារិទ្ធ ក៏ដឹងដែរថាគាត់ ត្រូវធ្វើ យ៉ាងណាដែរដើម្បីបំបាក់មុខលោក ហោ ណាំហុង និង លោកហ៊ុន សែន ហេតុដូចនេះ ហើយបានជាគ្រាន់តែរឿងចុះឈ្មោះអ្នកសារពត៌មាន ធ្វើឲ្យមានភាពយឺតយ៉ាវនិងច្របូកច្របល់មិនចេះចប់។

ចំពោះលោក ហោ ណាំហុង វិញអ្នកណាក៏ដឹងដែរថាលោកមិនសូវគោរពលោក ហ៊ុន សែន ប៉ុន្មានទេតាមភាពជាក់ស្តែង។ លោកតែងតែនិយាយជាមួយមនុស្សស្និទ្ធនឹង លោកថា លោក ហ៊ុន សែន ជាមនុស្សពិបាកធ្វើការជាមួយណាស់ ក្រឡិចក្រឡុច គ្មានជំហរខ្លួនឯង ធ្វើអ្វីតាមតែអំពើចិត្ត ពិបាកផ្តល់យោបល់ដោយសាតែភាពល្ងង់និង មានៈរបស់គាត់។ តែ លោក ហោ ណាំហុង មិនដែលខ្លាចលោក ហ៊ុន សែន ទេ ដោយលោកគិតថាគាត់តជា មន្រ្តីមានឋានៈពិសេសមួយដែល លោក ហ៊ុន សែន មិនអាចប៉ះពាល់បាន។

រឿងមិនគួរកើតឡើងនៅតែកើតឡើងដោយសារតែភាពមានៈរបស់លោក ហ៊ុន សែន ចង់ឌឺដងនិងយកឈ្នះអ្នកវិភាគ និងលោក សម រង្ស៊ី ប្រធានបក្សប្រឆាំងគឺរឿងជំលោះ សមុទ្រចិនខាងត្បូង។ តាមពិតលោក ហោ ណាំហុង ក៏មិនចង់លើកយកបញ្ហា ជំលោះនេះ មកជជែក ក្នុងរបបៀបវារៈប្រជុំអាស៊ាននេះដែរ ដូចបានបញ្ជាក់នៅក្នុងសេចក្តីជូន ព័ត៌មានរបស់ក្រសួងការបរទេស ចុះថ្ងៃទី២៦ ខែមីនា ឆ្នាំ២០១២ស្រាប់។ ពោលគឺ មានតែរបៀបវារៈ៣តែប៉ុណ្ណោះគឺ៖ ទី១-សេចក្ដីថ្លែងការណ៍នៅភ្នំពេញ ស្ដីពីអាស៊ាន៖ សហគមន៍តែមួយ -វាសនាតែមួយ។ ២-សេចក្ដីថ្លែងការណ៍របស់ប្រមុខដឹកនាំប្រទេស អាស៊ាន ស្ដីពី តំបន់អាស៊ាន គ្មានគ្រឿងញៀនឆ្នាំ២០១៥ និងឯកសារទី៣-ឯកសារទស្សនា ទានស្ដីពីចលនាសកលនិយមកណ្ដាល។

ក្រៅពីនេះលោកក៏បានធ្លាប់បញ្ជាក់ជាច្រើនលើកដែរថា ប្រធានបទនេះអាចនឹងលើក ឡើង នៅពេល ណាដែលសមាជិកអាស៊ានបានត្រៀមលក្ខណៈរួចរាល់ក្នុងកិច្ចការនេះ។ ជាការឆ្លើយតមគឺមានតែប្រទេសឥណ្ឌូនេស៊ីមួយគត់ដែលបានបញ្ជាក់ថាខ្លួនអាចចូលរួម បានគ្រប់ពេល។

ជាការខកចិត្តគឺផែនការត្រូវបានប្តូរផ្លាស់បន្ទាប់ពី ទស្សនកិច្ចរបស់លោក ហ៊ូ ជីនតាវ មកកម្ពុជាមុន កិច្ចប្រជុំកំពូលអាស៊ាន។ លោក ហោ ណាំហុង ត្រូវតែធ្វើតាមលោក ហ៊ុន សែន ហើយបានធ្វើឲ្យមានការមិនពេញចិត្តគ្នាជាខ្លាំងជាមួយប្រទេស ហ្វ៊ីលីពីន ដែលមិនចង់ឲ្យចិនលូកដៃក្នុងអំឡុងពេលអាស៊ានធ្វើពង្រាង ក្របខណ្ឌ COC (Code of Conduct) ដែលខុសពីគោលបំណងរបស់លោក ហ៊ុន សែន ចង់ឲ្យចិនចូលរួម តាំងពី ធ្វើពង្រាងឡើងទៅ។ ជាគោលការណ៍លោក ហោ ណាំហុង ក៏ធ្លាប់បានលើកឡើង ដែរ ថាអាស៊ាននិងជួបប្រជុំជាមួយចិនបន្ទាប់ពី ក្របខណ្ឌ COC (Code of Conduct) ត្រូវបានគេ ធ្វើព្រាងរួចក្នុងក្របខណ្ឌអាស៊ាន។ ការណ៍នេះហើយដែលលោក ហោ ណាំហុង មិន ទទួលខុសត្រូវឲ្យអស់ពីដៃពីជើង ថែមទាំងខ្លួនចាស់ផង មិនពេញចិត្តផង មិនសូវមាន ជំនាញផង គាត់ក៏មិនបានចាត់តាំងអ្នកនាំពាក្យទទួលខុសត្រូវក្នុងកិច្ច ប្រជុំនេះ ហើយបាន បណ្តោយឲ្យថ្នាក់ដឹកនាំប្រទេសផ្សេងៗទៀតស៊ីឡាក់ចេញមក សម្ភាសជាមួយអ្នកពត៌មានជាតិនិងអន្តរជាតិស្រេចតែនឹងចិត្ត។

ក្រៅពីនេះក៏មានកងសន្តិសុខមួយចំនួនមិនសប្បាយចិត្តដែរ ជាពិសេសកងប្រឆាំង ភាវរកម្ម និងប៉ូលីសក្រុងដោយពួកគេនិយាយថា អ្នកដែលមានមុខមានមាត់ បានស៊ី បានចុក បានលាភសក្ការៈមានតែក្រុមលោក នេត សាវឿន ក្មួយប្រសារលោក ហ៊ុន សែន តែ ប៉ុណ្ណោះ ជាពិសេសគឺថាកងសន្តិសុខភាគច្រើនគេយកមកពីកងអង្គរក្សលោក ហ៊ុន សែន ហើយបានឆ្លៀតឳកាសបំប៉ោងការចំណាយដើម្បីពង្រឹងកងអង្គរក្សរបស់ ខ្លួនថែម ទៀត។

ចំពោះលោក ហ៊ុន សែន វិញការដែលមិនបានផ្តល់តួនាទីអ្វីដល់លោក ខៀវ កញ្ញារិទ្ធ នេះគឺមកពីលោកមិនពេញចិត្តនឹងលោក ខៀវ កញ្ញារឹទ្ធ នោះទេក្នុងមួយរយៈនេះចំពោះ រឿងរ៉ាវខ្លះដែលបានកើតឡើង។ គេមិនប្រាកដថាជារឿងអ្វីនោះទេគ្រាន់តែសន្និដ្នានថា អាចជារឿងស្រីញី និងដីធ្លីមួយចំនួនដែលលោក ខៀវ កញ្ញារឹទ្ធ បានកេងប្រវ័ញ្ច។

តែទោះជាយ៉ាងណាក៏ដោយគេបានមើលឃើញថាមានមនុស្សម្នាក់ដែលបានធ្វើការងារល្អជាងគេក្នុងការជួយបិទបាំងនិងលុបលាងភាពមិនល្អទាំងនេះនៅ ក្នុងកិច្ចប្រជុំអាស៊ាន កំពូលនៅភ្នំពេញគឺលោក ខឹម ឃុណវឌ្ឍ អគ្គនាយកទូរទស្សន៍ ជាតិកម្ពុជា។

នេះជារឿងដែលបានកើតឡើងរវាងមេដឹកនាំកំពូលកម្ពុជាដោយសារតែភាពមានៈ ការច្រ ណែន ការប្រើមនុស្សមិនត្រូវជំនាញ អញនិយម អំនួតគ្មានព្រំដែន បក្សពួកនិយម បានធ្វើឲ្យជាតិមានភាពអាម៉ាស់និងបរទេសមើលងាយមើលថោកមិនចេះស្វាង។