លោកសយ សុភាព ច្រណែនលោក ឈុត វុទ្ធី?

1 ខែ​ឧសភា 2012
Source: http://khmersme.wordpress.com/2012/05/01/%E1%9E%9B%E1%9F%84%E1%9E%80%E1%9E%9F%E1%9E%99-%E1%9E%9F%E1%9E%BB%E1%9E%97%E1%9E%B6%E1%9E%96-%E1%9E%85%E1%9F%92%E1%9E%9A%E1%9E%8E%E1%9F%82%E1%9E%93%E1%9E%9B%E1%9F%84%E1%9E%80-%E1%9E%88%E1%9E%BB/

កាលពីម្សិលមិញ លោកសយ សុភាព ត្រូវបានមិត្តអ្នកប្រើបណ្តាញសង្គមហ្វេសប៊ុក គូសគំនូសពណ៌ក្រហមខ្វែងលើរូបថតរបស់លោក ក្រោយពីលោកបញ្ចេញមតិថា សូមកុំឲ្យអ្នក នយោបាយ អង្គការសង្គមស៊ីវិល និង អ្នកកាសែតមួយចំនួនទៀត ធ្វើការវិភាគអំពីរឿងរ៉ាវ របស់លោកឈុត វុទ្ធី ដែលត្រូវបានបាញ់សម្លាប់ដោយចំហរ តែការស៊ើបអង្កេត នៅតែជាអាថ៌ កំបាំងនៅឡើយ។

លោកសយ សុភាព ក៏បានលើកឡើងផងដែរថា រឿងរ៉ាវត្រូវបានបញ្ចប់ដោយការស៊ើបអង្កេត របស់ព្រះរាជអាជ្ញា តុលាការខេត្តកោះកុង កាលពីពេល កន្លងទៅហើយ។ លោកក៏ បានស្តី បន្ទោស ដល់ប្រជាពលរដ្ឋ និង អ្នកគំាទ្រសកម្មភាពការពារព្រៃឈើរបស់លោកវុទ្ធីថា ជាការលើកតម្កើង ហួសហេតុ ដែលពួកគេ ឲ្យតម្លៃលោកវុទ្ធី សុទ្ធតែជាវីរបុរស ឯមន្រ្តីប៉េអឹម ដែលជាមនុស្សធ្វើការដើម្បីជាតិដែរនោះ គ្មានអ្នកណាម្នាក់អើពើ។


ការលើកឡើងរបស់លោកសយ សុភាព ត្រូវបានគេមើលឃើញថា ជាការរារាំងការគោរព និង ហាក់ច្រណែននឹងគុណតម្លៃរបស់លោកវុទ្ធី ដែលសព្វថ្ងៃ គេក៏ធ្លាប់ឃើញលោកចូលរួមក្នុង សកម្មភាពដោះស្រាយជម្លោះដែរ តែគ្មានអ្នកណា ហៅលោក(សយ សុភាព)ថាវីរបុរសទាល់តែសោះ។

ទស្សនៈប្រជាពលរដ្ឋមួយចំនួន បានលើកឡើងថា កុំថាឡើយត្រឹមប៉េអឹម ដែលយកតួនាទីរបស់ខ្លួនទៅបម្រើការងារឯកជនសូម្បីលោកសយ សុភាព ខ្លួនឯង ពេលមានបញ្ហា ឬស្លាប់ទៅ ក៏គ្មានអ្នកណា គេដាក់ រហ័សនាម ឲ្យជា វីរបុរសដែរ ព្រោះលោក ពុំបាន ធ្វើអ្វី ដើម្បីជាតិ ប៉ុន្មាន ក្រៅពីធ្វើការដើម្បីលាភសក្ការៈនោះទេ។

សម្តីលោកសយសុភាព ក៏ត្រូវបានគេមើលឃើញផងដែរថា ហាក់ជាការគំរាមដ៏ចំពោះមុខ មួយដល់ពលរដ្ឋណា ដែលនៅតែទាមទារឲ្យសមត្ថកិច្ចស៊ើបអង្កេតរឿងនេះឡើងវិញ ឬដែលនៅតែឲ្យតម្លៃលើការស្លាប់ ឬវីរភាពរបស់លោកឈុតវុទ្ធី។ពលរដ្ឋលើកឡើងថា គឺជាការច្រ ណែន និង ការគំរាមកំហែង ដល់អ្នកស្រលាញ់ជាតិ និង សន្តិភាព យុត្តិធម៌នៅកម្ពុជា ព្រោះ មិនត្រូវបានគេហៅថា វីរបុរស ដែរ។