ដោយ សេក បណ្ឌិត
RFA
Click here to listen to the audio program
អ្នកវិភាគស្ថានការណ៍នយោបាយ ជាពិសេសលើការបោះឆ្នោតក្រុមប្រឹក្សាឃុំ-សង្កាត់ បានចាប់អារម្មណ៍លើគណបក្សចំនួនបី ដែលអាចប្រកួតប្រជែងគ្នាបានក្នុងចំណោមគណបក្ស ១០ ដែលបានចូលរួមបោះឆ្នោតនៅអាណត្តិទី៣ ឆ្នាំ២០១២ នេះ។
អ្នកវិភាគឯករាជ និងប្រជាពលរដ្ឋមួយចំនួនបានព្យាករថា គណបក្ស សម រង្ស៊ី អាចស្ថិតនៅលំដាប់លេខ២ បន្ទាប់ពីគណបក្សប្រជាជនកម្ពុជា។ បន្ទាប់មក គឺគណបក្សសិទ្ធិមនុស្ស ដែលជាកូនពៅគេក្នុងការប្រកួតប្រជែងយកតំណែងជាសមាជិកក្រុមប្រឹក្សាឃុំ-សង្កាត់។
លោក កែម ឡី អ្នកវិភាគឯករាជ្យ និងជាអ្នកស្រាវជ្រាវផ្នែកអភិវឌ្ឍន៍សង្គម បានព្យាករនៅថ្ងៃបិទបញ្ចប់យុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ ថ្ងៃទី០១ ខែមិថុនា គណបក្សប្រជាជននឹងអាចបាត់បង់តំណែងជាមេឃុំ និងចៅសង្កាត់ខ្លះ រីឯបេក្ខភាពគណបក្ស សម រង្ស៊ី ជាគណបក្សប្រឆាំង ដែលជាដៃគូប្រកួតប្រជែងដ៏សំខាន់ជាមួយនឹងគណបក្សកាន់អំណាចនោះ នឹងអាចទទួលបានតំណែងជាប្រធានក្រុមប្រឹក្សាឃុំសង្កាត់ ឬជាមេឃុំ ចៅសង្កាត់ កើនឡើងជាងអាណត្តិមុនប្រហែលជិតពាក់កណ្តាល។
ទាក់ទងបញ្ហានេះ មានហេតុផលពីរយ៉ាងជាសំខាន់ គឺសំឡេងឆ្នោតទាំងនោះមួយចំនួនអាចចេញពីអ្នកដែលធ្លាប់គាំទ្រគណបក្សប្រជាជន និងគណបក្សហ្វុនស៊ិនប៉ិច មួយវិញទៀត អាចបណ្ដាលមកពីបរិយាកាសនៃនយោបាយកាន់តែអាក្រក់ជាងបណ្ដាឆ្នាំកន្លងទៅ។
ដោយឡែកប្រជាពលរដ្ឋម្នាក់ដែលសុំមិនបញ្ចេញឈ្មោះ រស់នៅក្នុងទីក្រុងភ្នំពេញ បានរំពឹងទុកថា លទ្ធផលឆ្នោតនៅពេលខាងមុខនេះ គណបក្ស សម រង្ស៊ី នឹងមានលទ្ធភាពគ្រប់គ្រងឃុំ-សង្កាត់ ប្រមាណជា ១០០ឃុំសង្កាត់ក្នុងប្រទេសកម្ពុជា បានន័យថា កើនឡើងជាងពីរដងបើប្រៀបធៀបនឹងអាណត្តិមុន។ ការព្យាករបែបនេះ ដោយលោកមានហេតុផលមួយចំនួនដែលពាក់ព័ន្ធនឹងបញ្ហានេះ។
ចំពោះលោកបណ្ឌិត សុខ ទូច អ្នកវិភាគឯករាជ្យវិញ លោកទស្សន៍ទាយថា សមាជិកក្រុមប្រឹក្សាឃុំ-សង្កាត់របស់គណបក្សប្រជាជន និងគណបក្ស សម រង្ស៊ី នឹងអាចមានគ្រប់ឃុំ-សង្កាត់ ទាំងអស់ ដែលខ្លួនបានដាក់បេក្ខភាពឲ្យឈរឈ្មោះ ប៉ុន្តែចំពោះតំណែងជាប្រធានក្រុមប្រឹក្សាឃុំ-សង្កាត់ ឬជាមេឃុំ ចៅសង្កាត់នោះ គណបក្ស សម រង្ស៊ី អាចរក្សាបានដដែល ឬក៏អាចកើនឡើងតិចតួច ជាពិសេសនៅតំបន់ទីប្រជុំជន។
ចំពោះគណបក្សសិទ្ធិមនុស្សវិញ លោកបានព្យាករថា អាចទទួលបានតំណែងជាសមាជិកក្រុមប្រឹក្សាឃុំ-សង្កាត់ ភាគច្រើននៅតំបន់ទីប្រជុំជន ខេត្តក្រុង។
អ្នកវិភាគឯករាជ្យម្នាក់ទៀត គឺលោកបណ្ឌិត ឡៅ ម៉ុងហៃ ក៏មានការទស្សន៍ទាយមួយប្រហាក់ប្រហែលគ្នានឹងលោកបណ្ឌិត សុខ ទូច ដែរ។ លោកថា គណបក្សប្រជាជនអាចរក្សាតំណែងរបស់ខ្លួនបានជាស្វ័យប្រវត្តិទៅហើយ ដោយឡែកគណបក្ស សម រង្ស៊ី ក៏អាចរក្សាតំណែងរបស់ខ្លួនបានប្រហាក់ប្រហែលនឹងអាណត្តិដែរ ហើយបើទោះបីជាមានការកើនឡើងនោះ ក៏មានតិចតួចដែរ ប៉ុន្តែមិនអាចបញ្ជាក់ថា នឹងកើនឡើងប៉ុន្មាននោះទេ។
លោកបន្តថា ចំពោះគណបក្សសិទ្ធិមនុស្ស ក៏អាចមានលទ្ធភាពដណ្ដើមយកតំណែងជាសមាជិកក្រុមប្រឹក្សាឃុំ-សង្កាត់ ជាលើដំបូងរបស់ខ្លួនបានក្នុងចំនួនមួយគួរឲ្យចាប់អារម្មណ៍ណាស់ដែរ នៅក្នុងបោះឆ្នោតនៅពេលខាងមុខនេះ។
ចំនួនឃុំសង្កាត់ក្នុងប្រទេសកម្ពុជាបច្ចុប្បន្នមានចំនួន ១.៦៣៣ឃុំ និងសង្កាត់ និងមានអ្នកដែលមានសិទ្ធិបោះឆ្នោតជាង ៩លាននាក់នៅអាណត្តិទី៣ នេះ៕
No comments:
Post a Comment