សម រង្ស៊ី៖ ខ្ញុំនឹងវិល ចូលស្រុកវិញ ក្នុងពេលឆាប់ៗ

Tuesday, 02 October 2012 
 ដោយៈ ដើមអម្ពិល (DAP)

ភ្នំពេញ៖ មេបក្សប្រឆាំងដែលកំពុងរត់គេចខ្លូន នៅក្រៅប្រទេសនោះ បានសម្ដែងនូវក្ដី សង្ឃឹមជាថ្មីថា រូបលោក នឹងអាចវិលមកប្រទេសកម្ពុជាវិញ មុនការបោះឆ្នោតថ្នាក់ ជាតិឆ្នាំ២០១៣ ដោយមានកិច្ចអន្តរាគមន៍ពីអន្តរជាតិ និងការសម្រុះសម្រួលតាម ផ្លូវនយោបាយ។

ពីប្រទេសបារាំង តាមរយៈវីដេអូខនហ្វើរិន លោក សម រង្ស៊ី ប្រធានគណបក្ស សម រង្ស៊ី និងជាប្រធានគណបក្ស សង្រ្គោះជាតិ នៅថ្ងៃទី២ ខែតុលា ក្នុងពិធីជួបជុំមួយនៅទីស្នាក់ ការកណ្ដាលរបស់គណបក្សសិទ្ធិមនុស្ស បានថ្លែង ថា រូបលោកនឹងវិលចូលមកប្រទេស កម្ពុជាវិញ មុនការបោះឆ្នោតថ្នាក់ជាតិឆ្នាំ២០១៣ ដោយមានការអន្តរាគមន៍ ពីសហគមន៍ អន្តរជាតិ និងការសម្រុះសម្រួលតាមផ្លូវនយោបាយ។ «វាពាក់ព័ន្ធគ្នា តែខ្ញុំនិយាយសរុប តែមួយឃ្លា ទេ ខ្ញុំនឹងត្រឡប់មកប្រទេសកម្ពុជាវិញ មករួមចំណែកក្នុងការដឹកនាំប្រទេស»។

លោក សម រង្ស៊ី មិនបានបញ្ជាក់ថា នឹងមកដល់ប្រទេសកម្ពុជាវិញ នៅពេលណានោះទេ តែលោកបញ្ជាក់ថា

ពីរ ឬបីខែទៀត សភាពការណ៍នឹងមានការប្រែប្រួល។ លោកក៏នឹងអាចដឹកនាំសកម្មជន និងអ្នកគាំទ្ររបស់ខ្លួន សម្រាប់ការឃោសនាបោះឆ្នោតជ្រើសតាំងតំណាងរាស្រ្ដ ឆ្នាំ២០១៣ផងដែរ។

ចំណែក លោក កឹម សុខា ប្រធានគណបក្សសិទ្ធិមនុស្ស នឹងអនាគតជាអនុប្រធាន គណបក្សសង្រ្គោះជាតិ បាន បង្ហាញក្តីសង្ឃឹមដែរថា ព្រឹត្តិការណ៍ថ្មីមួយ នឹងអាច កើតមានឡើងមុន ការបោះឆ្នោតខាងមុខ គឺ លោក សម រង្ស៊ីនឹងវិលចូល ប្រទេសកម្ពុជាវិញ។ «ដូចគាត់បានមានប្រសាសន៍ហើយខ្ញុំគិតថា ទាំងអស់នេះ វាអាចនឹងកើតមាន នៅព្រឹត្តិការណ៍ថ្មីណាមួយនៅមុនពេលបោះឆ្នោត ដោយ សារសភាពការណ៍នៅក្នុងប្រទេសកម្ពុជាយើងនេះកំពុង តែពាក់ព័ន្ធនឹងអន្តរ ជាតិច្រើនណាស់ ជាពិសេសការប្រជុំអាស៊ាន»។

លោកបានឲ្យដឹងថា ថ្ងៃនេះ រូបលោកនឹងទៅជួបលោកសម រង្ស៊ី នៅទីក្រុង ប៉ារីសប្រទេសបារំាង ដើម្បីបន្តដំណើរ ស្វែងរកការគាំទ្រពីប្រទេសនានា ដូចជា ប្រទេសអូស្រ្ដាលី និងណូវែលហ្សេឡង់ជាដើម ដើម្បីឱ្យប្រទេសទាំងនោះ ដាក់ គំនាបមកលើរាជរដ្ឋាភិបាល ដើម្បីឲ្យលោក សម រង្ស៊ី វិលចូលប្រទេសវិញ និង ផ្លាស់ប្តូរសមាសភាព គ.ជ.ប ។

រដ្ឋលេខាធិការ និងជាអនុប្រធានអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី លោក កែវ រ៉េមី បានមានប្រសាសន៍ ក្នុងសន្និសីទកាសែត នាទីស្ដីការគណៈរដ្ឋមន្រ្ដី នៅថ្ងៃទី២ ខែតុលា នេះដែរ ថា បើលោក សម រង្ស៊ី វិលចូលស្រុក ត្រូវប្រឈមមុខនឹងច្បាប់។ «យោបល់ខ្ញុំ ត្រូវប្រឈមច្បាប់សិន គាត់ត្រូវមានការទទួល ខុសត្រូវចំពោះមុខច្បាប់»។

លោក កែវ រ៉េមី នាពេលកន្លងមក បានមានប្រសាសន៍ថា សហរដ្ឋអាមេរិក ឬសហគមន៍អន្តរជាតិ មិនអាចដាក់ គំនាបមកលើរដ្ឋាភិបាលកម្ពុជាបានទេ ដោយសារកម្ពុជាជាប្រទេសឯករាជ្យ អធិបតេយ្យភាព និងជាប្រទេស ប្រកាន់របបប្រជាធិបតេយ្យសេរី ពហុបក្ស ដោយការបោះឆ្នោតម្តងៗមានគណបក្សច្រើនចូលរួមប្រកួតប្រជែង។

លោក សម រង្ស៊ី កំពុងគេចខ្លួនពីការតាមចាប់របស់សមត្ថកិច្ចបន្ទាប់ពីតុលាការកម្ពុជាសម្រេចផ្តន្ទាទោសរូប លោកដាក់ពន្ធនាគារសរុប ១៤ឆ្នាំ ពីបទចោទប្រកាន់ជាច្រើនទាក់ទងនឹងដកតម្រុយបង្គោលព្រំដែន ការបង្ហាញ ផែនទីក្លែងក្លាយ និងបទបរិហារកេរ្តិ៍។

លោក សម រង្ស៊ី បានចាត់ទុកសំណុំរឿងទាំងនោះថា ជារឿងនយោបាយ ខណៈដែលរដ្ឋាភិបាល កម្ពុជាចាត់ទុក រឿងនេះ ពាក់ព័ន្ធនឹងរឿងផ្លូវច្បាប់។

លោក សម រង្ស៊ី បានសម្តែងក្តីសង្ឈឹមថា រូបលោកនឹងអាចវិលត្រលប់មកកាន់ប្រទេសកម្ពុជាវិញ មុនការបោះ ឆ្នោតជ្រើសរើសតំណាងរាស្រ្ដនាឆ្នាំ២០១៣ ខាងមុខ ខណៈដែលមន្រ្តីរាជរដ្ឋាភិបាលធ្លាប់បានថ្លែងថា អាចវិល ចូលស្រុកវិញបាន ប្រសិនបើលោក សម រង្ស៊ី ចិត្តសឿងប្រឈមមុខនឹងប្រព័ន្ធច្បាប់នៅកម្ពុជា៕