.jpg) |
| ឈូក បណ្ឌិត អតីតអភិបាលក្រុងបាវិត |
តុលាការសាលាដំបូងខេត្តស្វាយរៀង បានសម្រេចលើកលែងការចោទប្រកាន់អតីតអភិបាលក្រុងបាវិត លោក ឈូក បណ្ឌិត ក្នុងសំណុំរឿងបាញ់លើស្ត្រីកម្មករ ៣ នាក់ បណ្តាលអោយរងរបួសធ្ងន់ កាលពីខែកុម្ភៈ។ លោក ឈូក បណ្ឌិត ភ្លាមនោះ ត្រូវបានដកតំណែង និងត្រូវបានតុលាការ ចោទប្រកាន់ពីបទ បង្ករបួសស្នាមដោយអចេតនា តែមិនត្រូវបានចាប់ឃុំខ្លួនទេ។
18/12/2012
សេចក្តីរាយការណ៍របស់ លី ម៉េងហួរ
Radio France Internationale
ព្រះរាជអាជ្ញា អមសាលាដំបូង ខេត្តស្វាយរៀង លោក ហ៊ីង ប៊ុនជា បានប្រាប់អ្នកកាសែត កាលពីថ្ងៃទី១៨ ខែធ្នូ ឆ្នាំ២០១២ ថា តាមរយៈការស៊ើបអង្កេតរបស់តុលាការ និងវត្ថុតាង ពុំមានគ្រប់គ្រាន់ ដើម្បីដាក់សំអាងចោទលើលោក ឈូក បណ្ខិត ទេ។ ដូច្នេះលោកបានសំរេចលើកលែងការចោទប្រកាន់លើអតីតអភិបាលក្រុងបាវិត កាលពីសបា្តហ៍មុន។
ដំណឹងនៃការលើកលែងចោទប្រកាន់លើអតីតអភិបាលក្រុងបាវិត លោក ឈូក បណ្ឌិត ដែលជាមន្ត្រីជាន់ខ្ពស់គណបក្សប្រជាជនកម្ពុជា ប្រចាំតំបន់ជាប់ព្រំដែនវៀតណាម ក៏ត្រូវបានមេធាវីស្ត្រីជនរងគ្រោះ និងសកម្មជនសិទ្ធិមនុស្ស ទើបតែទទួលបាននៅថ្ងៃអង្គារនេះ។
លោក មឿន តុលា ប្រធានផ្នែកសិទ្ធិការងារ របស់មជ្ឈមណ្ឌលអប់រំច្បាប់ សម្រាប់សហគមន៍ បានសម្តែងការភ្ញាក់ផ្អើល និងហួសចិត្ត។ សកម្មជនសិទ្ធិមនុស្ស បញ្ជាក់ថា បើក្នុងករណីតុលាការលើកលែងការចោទប្រកាន់លើលោក ឈូក បណ្ឌិត ពិតប្រាកដមែន វាជារឿងមួយចម្លែកខ្លាំងមែនទែន ហើយលោកគិតថា វាមានរឿងមិនប្រក្រតីច្រើនកើតឡើង ក្នុងរឿងក្តីនោះ។
លោក មឿន តុលា ក៏បានអំពាវនាវឲ្យតុលាការ ខេត្តស្វាយរៀង ពិចារណាឡើងវិញ។ រីឯអង្គភាពប្រឆាំងអំពើពុករលួយ ក៏គួរតែបើកការស៊ើបអង្កេត លើភាពមិនប្រក្រតី នៅតុលាការ ក្នុងសំណុំរឿងដ៏រសើបនោះ ដើម្បីបំបាត់វប្បធម៌និរទណ្ឌភាព និងស្តារកេរ្តិ៍ឈ្មោះ ព្រមទាំងផ្តល់ទំនុកចិត្តដល់អ្នកបញ្ជាទិញសម្លៀកបំពាក់កាត់ដេរ ពីកម្ពុជា។
ជាការកត់សម្គាល់ ក្រោយពីប៉ូលិសក្រសួងមហាផ្ទៃ បានបញ្ជូនសំណុំរឿងទៅកាន់តុលាការ ខេត្តស្វាយរៀង តុលាការក៏បានចោទប្រកាន់លោក ឈូក បណ្ឌិត ពីបទបង្ករបួសស្នាម ដោយអចេតនា។ តែលោក ឈូក បណ្ឌិត មិនត្រូវបានចាប់ខ្លួនទេ។
លោក ឈូក បណ្ឌិត អតីតអភិបាលក្រុងបាវិត ជាប់ចោទក្នុងរឿងបាញ់ស្ត្រីកម្មករ ៣ នាក់ ឲ្យរបួសធ្ងន់ នៅពេលក្រុមកម្មករ ផ្ទុះការតវ៉ាក្នុងតំបន់សេដ្ឋកិច្ចពិសេស មេនហាតធេន នៅទីក្រុងបាវិត ជាប់ព្រំដែនវៀតណាម កាលពីថ្ងៃទី២០ ខែកុម្ភៈ ឆ្នាំ២០១២៕
2 comments:
បើគ្មានភស្តុតាងសម្រាប់ចោទប្រកាន់អញ្ចឹង អ្នករងគ្រោះបីនាក់ហ្នឹងប្រហែលជាត្រូវឈូក ទណ្ឌិត
ប្តឹងបកវិញ ពីបទផ្តល់ពត៌មានមិនពិត និងបរិហាកេរ្ត៍ ។ ចោររួចខ្លួន ម្ចាស់ជាប់គុក ?
បើ($$$$$$$$$ការ)កាត់ក្តី ,មិនខ្មេះ!
មានតែពលរដ្ឋខ្មែរ នាំគ្នាទៅ(កាត់ក្ត)
អាឈូក បណ្ឌិត វិញម្តង!
Post a Comment