គណបក្ស​សង្គ្រោះ​ជាតិ អំពាវនាវ​ឲ្យ​​ពល​រដ្ឋ​​ប្តឹង​​ពី​​ល្បិចកល​មិន​ឲ្យ​ពួកគាត់​ទៅ​បោះឆ្នោត​បាន​

លោក យឹម សុវណ្ណ អ្នកនាំពាក្យគណបក្សសង្គ្រោះជាតិ(រូបថត មេត្ដា)

ដោយ ណាត សុភាព និងដួង សុខា ថ្ងៃពុធ ទី10 កក្កដា ឆ្នាំ2013 ម៉ោង11:24  VOD

គណបក្ស​សង្គ្រោះ​ជាតិ អំពាវនាវ​ឲ្យ​ពលរដ្ឋ​ខ្មែរ​ទាំងអស់​ឲ្យមាន​ការប្រុងប្រយ័ត្ន​ ចំពោះ​ល្បិចកល​ទាំងឡាយ​ណា​របស់​មន្ត្រី​មូលដ្ឋាន​មួយចំនួន ​របស់​គណបក្ស​កាន់​អំ​ណាច  ដែល​កំពុង​ស្វែរក និង​ទិញ​ទឹកចិត្ត អ្នកគាំទ្រ​គណបក្ស​ប្រឆាំង​។

​សេចក្តីប្រកាស​ព័ត៌មាន​របស់​គណបក្ស​សង្គ្រោះ​ជាតិ ចេញផ្សាយ​នៅ​ថ្ងៃទី​៩ ខែកក្កដា ឆ្នាំ​២០១៣ ឲ្យដឹងថា យុវជន យុវនារី និស្សិត គ្រូបង្រៀន  មន្ត្រីរាជការ នគរបាល ទាហាន ចូលរួម​គាំទ្រ​គណបក្ស​សង្រោះជាតិ​យ៉ាង​គគ្រឹកគគ្រេង ជា​ហេតុ​ធ្វើឲ្យ​ជន​ខិលខូច​ខ្លះ​ធ្វើ​សកម្មភាព​មួយ​ចំនួន​ដូចជា សុំ​លេខ​ទូរស័ព្ទ​អ្នកគាំទ្រ​គណបក្ស​សង្គ្រោះ​​ជាតិ កុំឲ្យ​ទៅ​បោះឆ្នោត និង​ផ្តល់​ថវិកា​ជូន​។ សេចក្តីប្រកាស​ព័ត៌មាន បន្តថា ជន​ខិលខូច​ខ្លះ បាន​ប្រមូល​យក​អត្តសញ្ញាណប័ណ្ណ ឬ​អត្តសញ្ញាណ​ប័ណ្ណអស់​សុពល​ភាព​​ថា ទៅ​ធ្វើ​នេះ ទៅ​ធ្វើ​នោះ ពីព្រោះ​បើ​គ្មាន​អត្តសញ្ញាណប័ណ្ណ ឬ​អត្តសញ្ញាណប័ណ្ណ​អស់​សុពលភាព បងប្អូន​មិន​អាច​ទៅ​បោះឆ្នោត​បាន​ទេ​។ សេក្តីប្រកាស​បញ្ជាក់​ថា អត្តសញ្ញាណប័ណ្ណ អស់​សុពលភាព អាច​ប្រើប្រាស់​រហូត​ដល់​ថ្ងៃទី​៣១ ខែ​ធ្នូ ឆ្នាំ​២០១៣​។

​អ្នកនាំពាក្យ​គណបក្ស​សង្គ្រោះ​ជាតិ លោក យឹម សុវណ្ណ មានប្រសាសន៍ថា មន្ត្រី​គណបក្ស​ប្រជាជន​កម្ពុជា​មួយចំនួន មានដូចជា មេភូមិ មេឃុំ ក្រុមប្រឹក្សា​ឃុំ​ជា​ដើម កំពុង​​ស្វែងរក និង​សុំ​លេខ​ទូរស័ព្ទ​ពលរដ្ឋ​ ដែល​គាំទ្រ​គណបក្ស​ប្រឆាំង​មួយ​នេះ ដើម្បី​ផ្តល់​ថវិកា​ដល់​ពួកគេ កុំ​ឲ្យ​បោះឆ្នោត​ថ្នាក់​ជាតិ​ខាង​មុខ​នោះ គឺ​ជា​ទង្វើ​ខុសច្បាប់​​ ៖​

​គណបក្ស​សង្គ្រោះ​ជាតិ អំពាវនាវ​ឲ្យ​ពលរដ្ឋ​ទាំង​អស់ កត់​ឈ្មោះ លេខ​ទូរស័ព្ទ​អ្នក​ដែល​ទូរស័ព្ទ​មក​ប្រាប់ថា កុំឲ្យ​ទៅ​បោះឆ្នោត ដើម្បី​ប្តឹងទៅ​សមត្ថកិច្ច​ពាក់ព័ន្ធ​។ 

ចំពោះ​អ្នក​​ដែល​បាត់​អត្តសញ្ញាណប័ណ្ណ ឬ​មិន​ទាន់​បាន​ទទួល សូម​ប្រញាប់​ទំនាក់ទំនង​ធ្វើ​លិខិត​បញ្ជាក់​អត្តសញ្ញាណ សម្រាប់​បម្រើ​ឲ្យ​ការបោះឆ្នោត នៅតាម​ឃុំ សង្កាត់​ឲ្យ​បាន​​ទាន់​ពេលវេលា​។​

​អ្នកសម្របសម្រួល​ផ្នែក​អង្កេត​នៃ​អង្គការ​ឃ្លាំមើល​ការបោះឆ្នោត ខុម​ហ្វ្រែល កញ្ញា គង់ រ៉ា​វីន ឲ្យដឹងថា បើ​គណបក្ស​កាន់​អ​ណា​ច​​ប្រើប្រាស់​មធ្យោបាយ​ទិញ​ទឹកចិត្ត​​របស់​ ប្រជាពលរដ្ឋ ដើម្បី​កុំ​ពួកគាត់​បាន​ទៅ​បោះឆ្នោត គឺ​ខុស​នឹង​ច្បាប់បោះឆ្នោត ​៖ ​

VOD មិនអាច​សុំ​អត្ថាធិប្បាយ​ពី​អគ្គលេខាធិការ គណៈកម្មាធិការ​ជាតិ​រៀបចំ​ការបោះឆ្នោត​(​គ​.​ជ​.​ប​) លោក ទេព នីថា បាន​នៅ​ទ្បើយ​ទេ ដោយ​លោក​ឆ្លើយ​ថា​ជាប់រវល់​ប្រ​ជុំ​៕