លោក សម រង្ស៊ី៖ ព្រះមហាក្សត្រ មិនទាន់ ធ្វើការ កោះហៅ បេក្ខជន តំណាងរាស្រ្ត ជាប់ឆ្នោតថ្មី ចូលប្រជុំ សភាទេ

លោកបន្តថា «ព្រះមហាក្សត្រ អត់ទាន់កោះហៅទេ បើលោក (ព្រះមហាក្សត្រ) កោះហៅមែននោះ គឺលោកនឹងសរសេរព្រះរាជសារ ប្រទានដល់អ្នក តំណាងរាស្រ្ត មិនមែនសរសេរ តាមរយៈចោរអ៊ឹម សួស្តី នោះទេ»។

Tuesday, 10 September 2013 16:01 ដោយ ៖ ដើមអម្ពិល(DAP)

ភ្នំពេញ៖ ប្រធាន គណបក្សសង្រ្គោះជាតិ លោក សម រង្ស៊ី បានឲ្យដឹង នៅព្រឹកថ្ងៃទី១០ កញ្ញា នេះថា បេក្ខជនតំណាងរាស្រ្ត ដែលទើបនឹងជាប់ឆ្នោត ក្នុងការបោះឆ្នោតជ្រើសតាំង តំណាង រាស្រ្ត នីតិកាលទី៥ ឆ្នាំ២០១៣នេះ មិនទាន់បានទទួល ព្រះរាជសារកោះអញ្ជើញ ឲ្យចូលប្រជុំ សភាដំបូងនោះទេ។

លោក សម រង្ស៊ី បានអះអាងបែបនេះ ទៅកាន់ក្រុមអ្នកសារព័ត៌មាន ក្នុងពេលដែលលោក ចុះ ជួបជាមួយ អាជីវករផ្សារអូរប្ញស្សី នៅព្រឹកថ្ងៃទី១០ ខែកញ្ញា ឆ្នាំ២០១៣នេះ។

លោកបានឲ្យដឹងថា ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅមិនទាន់ បានកោះហៅ ឲ្យអ្នកតំណាងរាស្រ្ត ដែលទើបនឹងជាប់ឆ្នោតថ្មី ចូលប្រជុំ សភាដំបូងនោះទេ។

បើតាមលោក សម រង្ស៊ី ប្រសិនបើព្រះមហាក្សត្រ កោះអញ្ជើញមែននោះ ព្រះអង្គនឹងសរសេរ ព្រះរាជសារប្រទាន ដល់អ្នកតំណាងរាស្រ្ត មិនមែនសរសេរ តាមរយៈលោក អ៊ឹម សួស្តី ប្រធាន គណៈកម្មាធិការជាតិ រៀបចំការបោះឆ្នោត(គ.ជ.ប.) នោះទេ។ លោកបន្តថា «ព្រះមហាក្សត្រ អត់ទាន់កោះហៅទេ បើលោក (ព្រះមហាក្សត្រ) កោះហៅមែននោះ គឺលោកនឹងសរសេរព្រះរាជសារ ប្រទានដល់អ្នកតំណាងរាស្រ្ត មិនមែនសរសេរ តាមរយៈចោរអ៊ឹម សួស្តី នោះទេ»។

ជាមួយគ្នានេះដែរ ប្រធានគណបក្សប្រឆាំងរូបនេះ នៅតែបញ្ជាក់ជំហរថា នឹងមិនចូលរួមប្រជុំ សភាដំបូង នីតិកាលទី៥ នោះទេ។ ប្រសិនបើជា មិនមានដំណោះស្រាយ ឲ្យបានសមស្រប លើ ការបោះឆ្នោតទេនោះ។

យោងតាម ព្រះរាជសារ ចុះថ្ងៃទី០៩ ខែកញ្ញា ឆ្នាំ២០១៣ របស់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ផ្ញើជូនលោក អ៊ឹម សួស្តី ប្រធានគណៈកម្មាធិការជាតិ រៀបចំ ការបោះឆ្នោត(គ.ជ.ប.) បានឲ្យដឹងថា «ខ្ញុំនឹងអញ្ជើញ បេក្ខជនជាប់ឆ្នោត ជាតំណាងរាស្ត្រ នីតិកាលទី៥ ទាំងអស់ ប្រជុំដំបូង នាថ្ងៃទី២៣ ខែកញ្ញា ឆ្នាំ ២០១៣ នៅវិមានរដ្ឋសភា»។

តាមលទ្ធផលផ្លូវការ ដែលប្រកាសដោយ គណៈកម្មាធិការជាតិ រៀបចំការបោះឆ្នោត (គ.ជ.ប.) កាលពីថ្ងៃទី៨ ខែកញ្ញា ឆ្នាំ២០១៣ កន្លងទៅនេះ បានឲ្យដឹង គណបក្សប្រជាជនកម្ពុជា ជា គណបក្សកំពុងកាន់អំណាច បានទទួលសំឡេងគាំទ្រជាង ៣លានសំឡេង បើគិតជាចំនួន អាសនៈ បាន ៦៨អាសនៈ ក្នុងចំណោម ១២៣អាសនៈ ក្នុងរដ្ឋសភា នីតិកាលទី៥ ខណៈដែល គណបក្សសង្គ្រោះជាតិ ជាគណបក្សប្រឆាំង ទទួលបានសំឡេងគាំទ្រ ចំនួនជាង២ លានសំឡេង គិតជាចំនួនអាសនៈ បាន៥៥អាសនៈ។

គួរបញ្ជាក់ថា ការបោះឆ្នោតជ្រើសតាំង តំណាងរាស្ត្រ នីតិកាលទី៥ ឆ្នាំ២០១៣ មានគណបក្ស ចំនួន៨ ចូលរួមប្រកួតប្រជែង ដើម្បីដណ្តើមអាសនៈនៅក្នុងរដ្ឋសភា ដោយឡែកមានតែ គណបក្សធំៗចំនួនពីរទេ ដែលបានទទួលអាសនៈ នៅក្នុងរដ្ឋសភា ពោលគឺ គណបក្សប្រជាជន កម្ពុជា ដែលជាគណបក្ស កំពុងកាន់អំណាច និងគណបក្សសង្គ្រោះជាតិ ដែលជាគណបក្ស ប្រឆាំងដ៏ធំមួយនៅកម្ពុជា៕