 |
| លំនៅឋានប្រជាពលរដ្ឋនៅភូមិអូរជ្រៅ ខេត្តបន្ទាយមានជ័យ ដែលរងការលិចលង់ដោយសារទឹកជំនន់មកពីប្រទេសថៃ កាលពីថ្ងៃទី៩ ខែសីហា ឆ្នាំ២០១៣។ RFA/Soun Sophalmony |
ដោយ សួន សុផលមុន្នី RFA 2013-11-16
ជាក់ស្ដែង អ្នកភូមិជាច្រើនពាន់គ្រួសារនៅស្រុកភ្នំស្រុក ខេត្តបន្ទាយមានជ័យ បានលើកឡើងអំពីផលលំបាកនៅពេលពួកគាត់ធ្វើដំណើរឆ្លងកាត់នៅលើកំណាត់ផ្លូវពីរកន្លែងនៅក្នុងភូមិឋានរបស់ខ្លួនរស់នៅ។
ក្រុមអ្នកភូមិជាច្រើនគ្រួសារបានស្នើសុំទៅអាជ្ញាធរស្រុកភ្នំស្រុក ខេត្តបន្ទាយមានជ័យ ឲ្យចុះទៅជួសជុលកំណាត់ផ្លូវនៅជាប់ស្ពានបែកបាក់ពីរកន្លែង ដោយមួយកន្លែងឋិតនៅឃុំស្រះជីក និងមួយកន្លែងទៀតឋិតក្នុងឃុំរហាល ដើម្បីជួយសម្រួលដល់ការធ្វើចរាចរណ៍ឆ្លងកាត់ទៅវិញទៅមករបស់អ្នកស្រុកនៅតំបន់នោះ។
ការអំពាវនាវរបស់ស្រុកនេះ បានធ្វើឡើងក្រោយពីជំនន់ទឹកភ្លៀងដែលបានជន់លិចនៅតំបន់នោះ បានស្រកចុះអស់ទៅវិញ ប៉ុន្តែកំណាត់ផ្លូវវាងស្ពានពីរកន្លែងនៅក្នុងមូលដ្ឋានស្រុកភ្នំស្រុក មានការលំបាកខ្លាំង រថយន្តតូចធំមិនអាចបើកបរឆ្លងកាត់បាន។
ក្រុមអ្នកភូមិទាំងនោះថ្លែងនៅថ្ងៃទី១៦ ខែវិច្ឆិកា ថា ការកាត់ផ្ដាច់ប្រព័ន្ធគមនាគមន៍ទាំងពីរកន្លែងនៅក្នុងមូលដ្ឋានស្រុកភ្នំស្រុកនេះ បានធ្វើឲ្យប្រជាកសិករជួបការលំបាក ទាំងធ្វើដំណើរឆ្លងកាត់ និងមានផលប៉ះពាល់ដល់តម្លៃកសិផលថែមទៀត៖ «ប្រជាពលរដ្ឋគ្នាធ្វើផលដំណាំស្រូវបានហើយ ប៉ុន្តែ យ៉ាប់រឿងផ្លូវទៅអត់រួច។ កាលពីទឹកលិចគេធ្វើស្ពានទៅវាដាច់កន្លែងស្ពាន អាជ្ញាធរស្រុកគាត់អត់ដោះស្រាយឲ្យទេ ឡានឈ្មួញគេមកទិញផលិតផលស្រូវយើងហ្នឹង វាមកអត់រួច ជាប់រអិលធ្វើឲ្យតម្លៃស្រូវហ្នឹងចុះថោក ហើយប្រជាពលរដ្ឋទូទាំងស្រុកត្អូញត្អែរមែនទែនរឿងផ្លូវ»។
កំណាត់ផ្លូវក្បែរស្ពានដែលខូចខាតពិបាកធ្វើដំណើរឆ្លងកាត់នោះមានពីរកន្លែង។ មួយកន្លែងឋិតនៅក្នុងភូមិគោករំចេក ឃុំស្រះជីក និងមួយកន្លែងទៀត ឋិតនៅក្នុងភូមិព្រៃមាន់ ឃុំរហាល។ កំណាត់ផ្លូវដែលរងការខូចខាតពិបាកធ្វើដំណើរនេះ មួយកន្លែងៗមានប្រវែងប្រហែល ៣០ម៉ែត្រដូចគ្នា។
អាជ្ញាធរមូលដ្ឋានឃុំស្រះជីក ឲ្យដឹងថា ស្ពានខូចខាតទាំងពីរកន្លែងនោះ ជាគម្រោងសាងសង់របស់មន្ទីរសាធារណៈការនិងដឹកជញ្ជូន រួមទាំងមន្ទីរអភិវឌ្ឍន៍ជនបទខេត្តបន្ទាយមានជ័យ។ មន្ទីរស្ថាប័នរបស់រដ្ឋទាំងពីរនេះ ជាអ្នកទទួលខុសត្រូវក្នុងគម្រោងធ្វើស្ពានថ្នល់ក្នុងស្រុកភ្នំស្រុក។ គម្រោងនេះបានចាប់ផ្ដើមដំណើរចាក់ថ្នល់កៅស៊ូបានពាក់កណ្ដាលផ្លូវហើយ ប៉ុន្តែដោយសារតែមានជំនន់ទឹកភ្លៀងលិចលង់មក ក៏ផ្អាកទៅវិញ។
ចំណែកឯស្ពានទាំងពីរកន្លែងដែលត្រូវសាងសង់ជាមួយផ្លូវថ្នល់នោះ ក៏ត្រូវគេរុះរើចេញដើម្បីសាងសង់ស្ពានថ្មីនោះ ត្រូវរាំងស្ទះដោយសារតែជំនន់ទឹកភ្លៀងបានជន់លិច។ នៅក្នុងរដូវទឹកលិចអ្នកស្រុកបានយកក្ដារតម្រៀបគ្នានៅលើស្ពានចាស់ទាំងពីរនោះឆ្លងកាត់ជាបណ្ដោះអាសន្ន៖ «ស្ពានហ្នឹងនៅឃុំគោករំចេកមួយ ហើយមួយទៀតនៅខាងទឹកដីភូមិព្រៃមាន់ មួយកំណាត់ស្ពានដែលត្រូវវ៉ៃស្ពានចាស់ចោលដើម្បីធ្វើស្ពានថ្មី ប៉ុន្តែដល់យើងធ្វើអត់ទាន់វាហូរដាច់ផ្លូវដែលគេចាក់វាង វាជួបបញ្ហាប្រជាពលរដ្ឋខ្ញុំនៅស្រូវច្រើន ស្រូវចាស់ពីឆ្នាំមុនដែលមិនមែនឡានធំចូលមកទៅ មានមកទិញតិចតួច មិនបានថ្លៃ។ កន្លងទៅនេះបើកុំមានភ្លៀងមកឡានអាចបើកវាងបាន ឡានត្រឹម ៥តោនកន្លះអីអាចបើកវាងបាន»។
វិទ្យុអាស៊ីសេរី នៅពុំទាន់អាចសុំការបញ្ជាក់ពីលោក គឹម សុវណ្ណ ប្រធានមន្ទីរសាធារណការនិងដឹកជញ្ជូន រួមទាំងថ្នាក់ដឹកនាំអាជ្ញាធរខេត្តបន្ទាយមានជ័យ ជុំវិញគម្រោងស្តាហេដ្ឋារចនាសម្ពន្ធផ្លូវថ្នល់ នេះបានទេ ដោយសារពួកគេកំពុងរវល់ចូលរួមក្នុងពិធីធ្វើបុណ្យសពលោក ទ្រី ណារិន នៅឯខេត្តកំពង់ចាម។
ទាក់ទិនករណីស្ពានថ្នល់ដែលរងការខូចខាតនៅស្រុកភ្នំស្រុកនេះ ជំទប់ទី១ ឃុំស្រះជីក លោក ឡាត សេងជាតិ បញ្ជាក់ថា យោងលើស្មារតីនៃកិច្ចប្រជុំរបស់អាជ្ញាធរខេត្តបន្ទាយមានជ័យ កន្លងទៅថ្មីៗនេះ បានសម្រេចឲ្យមន្ទីរសាធារណការនិងដឹកជញ្ជូន រួមទាំងមន្ទីរអភិបាលជនបទខេត្តបន្ទាយមានជ័យ ចុះអនុវត្តគម្រោងកសាងស្ពានថ្នល់នៅក្នុងស្រុកភ្នំស្រុក ជាបន្តទៀត នៅចុងខែវិច្ឆិកា ឆ្នាំ២០១៣នេះ។ លោកបន្តថា ដើម្បីសម្រួលដល់ចរាចរណ៍ឆ្លងកាត់របស់ប្រជាពលរដ្ឋ អាជ្ញាធរស្រុកភ្នំស្រុក នឹងបញ្ជូនគ្រឿងចក្រទៅកាយបង្គោលឈើចេញ បន្ទាប់មកលើកដីចាក់ធ្វើផ្លូវប្រើជាបណ្ដោះអាសន្ន៕
No comments:
Post a Comment