Tuesday, November 26, 2013
ពលការិនីម្នាក់រកអន្តរាគមន៍ប្ដឹងក្រុមហ៊ុននាំពលករទៅធ្វើការនៅម៉ាឡេស៊ី
ពលការិនីធ្វើការងារតាមផ្ទះនៅប្រទេសម៉ាឡេស៊ី ម្នាក់ រស់នៅឃុំមេលំ ស្រុកបរិបូរណ៍ ខេត្តកំពង់ឆ្នាំង កំពុងតែស្វែងរកការប្រឹក្សាផ្លូវច្បាប់ ដើម្បីប្ដឹងក្រុមហ៊ុនបញ្ជូនពលករមួយឈ្មោះ ហ្ស៊ី.អ៊ី.អិន ត្រេននីង សិនធឺ (Z E N Training Center) ដែលមានទីស្នាក់ការនៅផ្សារអូរឫស្សី ក្រុងភ្នំពេញ។
ដោយ ជិន ជេដ្ឋា RFA 2013-11-26
ការប្ដឹងនោះ បន្ទាប់ពីជនរងគ្រោះបានរត់ចេញពីកន្លែងឃុំខ្លួនរបស់ក្រុមហ៊ុន ក្នុងប្រទេសម៉ាឡេស៊ី ហើយរអិលជើងធ្លាក់ពីលើអគារជាន់ទី១ បណ្ដាលឲ្យបាក់ជើងឆ្វេង។
ពលការិនីវ័យ ២១ឆ្នាំម្នាក់ ដែលរងរបួសបាក់ជើង បានប្រាប់វិទ្យុអាស៊ីសេរី នៅថ្ងៃទី២៦ ខែវិច្ឆិកា ថា កញ្ញាបានចេញទៅធ្វើការងារតាមផ្ទះនៅប្រទេសម៉ាឡេស៊ី ក្នុងឆ្នាំ២០១០ តាមរយៈក្រុមហ៊ុន ហ្ស៊ី.អ៊ី.អិន ត្រេននីង សិនធឺ ហើយបានធ្វើការងារជាអ្នកបម្រើតាមផ្ទះចប់កុងត្រារយៈពេល ៣ឆ្នាំ។ ក្រោយពេលបញ្ចប់កុងត្រា ភាគីក្រុមហ៊ុនបានព្យាយាមឲ្យកញ្ញាបន្តកុងត្រាថ្មី ដោយយកលេសថា ក្រុមហ៊ុនមិនទាន់រត់ការសំបុត្រយន្តហោះឲ្យកញ្ញា វិលត្រឡប់មកស្រុកខ្មែរវិញបាន។ កញ្ញាបន្តថា ដោយកញ្ញាមិនអាចទ្រាំទ្រនឹងការជេរប្រមាថ និងវាយធ្វើបាបពីសំណាក់ម្ចាស់ផ្ទះ ក៏សម្រេចចិត្តមិនបន្តកុងត្រាតាមការទាមទាររបស់ក្រុមហ៊ុននោះទេ។
មន្ត្រីសម្របសម្រួលនៃអង្គការសិទ្ធិមនុស្សលីកាដូ (Licadho) ប្រចាំខេត្តកំពង់ឆ្នាំង លោក គង់ ច័ន្ចមុនី មានប្រសាសន៍ថា នៅក្នុងឆ្នាំ២០១៣ លីកាដូ បានទទួលពាក្យបណ្ដឹងទាក់ទងនឹងពលករចំណាកស្រុកចំនួន ១០ករណី ក្នុងនោះមាន ៣ករណី ដែលពលការិនីទទួលរងនូវការរំលោភផ្លូវភេទ និងធ្វើទារុណកម្មធ្ងន់ធ្ងរ៕
Subscribe to:
Post Comments (Atom)
No comments:
Post a Comment