ស្ថានភាព​ចរាចរណ៍​ច្រក​ទ្វារ​ប៉ោយប៉ែត​នៅ​តែ​បន្ត​ស្ទះ

RFA/Soun Sophalmony

ការ​កក​ស្ទះ​ចរាចរណ៍​នៅ​ច្រក​ទ្វារ​អន្តរជាតិ​ប៉ោយប៉ែត នៅ​តែ​បន្ត​កើត​មាន​នៅ​ព្រឹក​ថ្ងៃ​ទី​៦ ខែ​ធ្នូ ឆ្នាំ​២០១៣។ ការ​កក​ស្ទះ​ចរាចរណ៍​នេះ បាន​កើត​មាន​ឡើង​តាំង​ពី​ថ្ងៃ​ទី​១ ខែ​ធ្នូ ឆ្នាំ​២០១៣ ដោយសារ​មាន​រថយន្ត​ជាច្រើន​សម្រុក​ឆ្លង​ដែន​ចូល​ក្នុង​ទឹក​ដី​ថៃ។

ដោយ សួន សុផលមុន្នី RFA 2013-12-06

រថយន្ត​ទាំង​នោះ​ភាគ​ច្រើន​ជា​រថយន្ត​របស់​ប្រជាពលរដ្ឋ​ខ្មែរ ដែល​មក​ពី​បណ្ដា​ខេត្ត​ក្រុង​ផ្សេងៗ​គ្នា បាន​នាំ​គ្នា​ចូល​ទៅ​ទិញ​ហ្គាស៍​ពី​ទឹក​ដី​ថៃ យក​មក​លក់​នៅ​ក្នុង​ទឹក​ដី​ខ្មែរ។

មូលហេតុ​ដែល​កក​ស្ទះ​ចរាចរណ៍​នេះ បណ្ដាល​មក​ពី​អាជ្ញាធរ​ថៃ រឹត​បន្តឹង​សន្តិសុខ ត្រួត​ពិនិត្យ​រថយន្ត​ទាំង​នោះ​ឲ្យ​បាន​ច្បាស់​លាស់​ជា​មុន ទើប​អនុញ្ញាត​ឲ្យ​ចូល​ទៅ​ក្នុង​ទឹក​ដី​ថៃ។

អធិការ​នគរបាល​ក្រុង​ប៉ោយប៉ែត លោក អ៊ុំ សុផល បញ្ជាក់​នៅ​ព្រឹក​ថ្ងៃ​ទី​៦ ខែ​ធ្នូ ថា ក្រុម​អាជ្ញាធរ​ខ្មែរ​កំពុង​ធ្វើ​កិច្ច​អន្តរាគមន៍​ទៅ​ភាគី​ថៃ ដើម្បី​សម្រួល​ចរាចរណ៍​កក​ស្ទះ​នៅ​ច្រក​ទ្វារ​នោះ​ឡើង​វិញ៖ «ប្រជុំ​ដោះ​ហើយ សុំ​ឲ្យ​ភាគី​សម្រួល​ឲ្យ​រថយន្ត​នោះ​ចូល​បាន​ឆាប់​បន្តិច អាជ្ញាធរ​ថៃ មាន​ការ​រឹត​បន្តឹង​ខ្លះ។ ឥឡូវ​នេះ យើង​សុំ​ឲ្យ​ភាគី​ថៃ ជួយ​សម្រួល​ឲ្យ​បាន​លឿន​ឡើង​វិញ។ ថ្នាក់​ដឹក​នាំ​ខ្មែរ​មាន​អភិបាល​ក្រុង និង​លោក​ស្នង​ការ​ខេត្ត ចូល​ទៅ​ជួប​ចរចា​គ្នា។ ឥឡូវ​នេះ ធូរ​ស្រាល​ឡើង​វិញ​ហើយ​ការ​កក​ស្ទះ​នោះ»។

ការ​កក​ស្ទះ​នេះ បណ្ដាល​ឲ្យ​ប៉ះពាល់​ដល់​ការ​ធ្វើ​ចរាចរ​នៅ​ច្រក​ទ្វារ​ព្រំដែន​អន្តរជាតិ ជា​ពិសេស​ប៉ះពាល់​ដល់​ភ្ញៀវ​ទេសចរ ដែល​ធ្វើ​ដំណើរ​ចេញ​ចូល​ពី​ទឹក​ថៃ ចូល​មក​ក្នុង​ទឹក​ដី​កម្ពុជា៕