18 July 2012
ម៉ៃ ទិត្យថារ៉ា
The Phnom Penh Post
តើពាក្ស បង្កើតតំបន់អបគមន៍ ជាយុទ្ធសាស្ត្រ ផ្លន់ដី បែបថ្មី ជំនួសពាក្សអភិវឌ្ឍ ឬ ក៏ជាប្រផ្នូលចាស់ កាល ឆ្នាំ១៩៦៣នៅ សំឡូតនិងអមលាំង?ពោធិ៍សាត់ៈយ៉ាងហោចណាស់មានផ្ទះពលរដ្ឋជាង ៥០០ ខ្នង ដែលស្ថិតនៅក្នុងចំណុចស្រែយក្សភូមិកំពង់ក្ដី ឃុំក្រពើពីរ ស្រុកវាលវែង ត្រូវបានរុះរើ និងពលរដ្ឋម្នាក់ ត្រូវបានកម្លាំងចម្រុះ ធ្វើការឃាត់ខ្លួន នៅខណៈពេលអាជ្ញាធរ បានបើកយុទ្ធនាការបណ្តេញពលរដ្ឋឲ្យចាកចេញពីលំនៅដ្ឋាន របស់ពួកគេ ដោយចោទប្រកាន់ពីបទរស់នៅអនាធិបតេយ្យ ទន្ទ្រានយកដីរដ្ឋខុសច្បាប់ និងបង្កើតតំបន់អបគមន៍។
លោក ជិន វន តំណាងប្រជាពលរដ្ឋចំនួន ៦០០ គ្រួសារ ដែលកំពុងតែគេចខ្លួន ពីការតាមចាប់របស់អាជ្ញាធរ ដែលបានចោទពីបទបំផុសឲ្យពលរដ្ឋ ចូលទន្ទ្រានយកដីរដ្ឋ និងបង្កើតតំបន់អបគមន៍នោះ បានថ្លែងថា អាជ្ញាធរចម្រុះ ដែលមានប៉ូលិស ប៉េអឹមប្រមាណ ៥០ នាក់ បានចុះមករុះរើ បង្ខំឲ្យពលរដ្ឋ ចាកចេញពីលំនៅដ្ឋាន និងតាមស្វែងរកតាមចាប់ខ្លួនពួកលោក។ លោក និយាយថា៖ «ខ្ញុំធ្វើអ្វីៗដើម្បីឲ្យប្រជាជនក្រីក្រមានដីរស់នៅ ហើយខ្ញុំធ្វើគឺអនុវត្តទៅតាមច្បាប់ បែរជាគេចោទខ្ញុំថា បង្កើតតំបន់អបគមន៍ប្រឆាំង នឹងគេទៅវិញ។ តើខ្ញុំមានអីធ្វើអបគមន៍នោះ ខ្ញុំមិនបានធ្វើដូចជាការចោទប្រកាន់នោះទេ»។
លោកបានឲ្យដឹងទៀតថា មុននឹងលោកចូលមករស់នៅក្នុងទីតាំងចាស់ដែលជាដីរបស់ជនជាតិភាគ តិចរស់នៅពីមុននោះ លោកបានស្នើសុំទៅលោកនាយករដ្ឋមន្ត្រីហ៊ុន សែន រដ្ឋសភា អាជ្ញាធរស្រុក ឃុំ ដើម្បីឲ្យពលរដ្ឋចំនួន ២០៣ គ្រួសាររស់នៅ លើផ្ទៃដី៧០០០ ហិកតា នៅក្នុងឆ្នាំ ២០០៨ ហើយ លោកមេឃុំ និងអភិបាលស្រុក ក៏បានយល់ព្រមតាមសំណើនោះដែរ។ ដោយសារតែការរស់នៅយូរទៅ បានធ្វើឲ្យពលរដ្ឋមួយចំនួន បានចូលមករស់នៅបន្ថែមទៀតជាហូរហែ ចាប់តាំងពី ២០០៩ រហូតដល់បច្ចុប្បន្ន ដែលធ្វើឲ្យពលរដ្ឋកើនរហូតដល់ ៦០០ គ្រួសារ។ លោកបញ្ជាក់ថា៖«លោកចៅហ្វាយស្រុក បានប្រព្រឹត្តអំពើពុករលួយជាមួយបក្ខពួកគាត់ ដូច្នេះគេយកគ្រឿងចក្រ មកឈូសផ្ទះពលរដ្ឋ ដើម្បីបង្ខំឲ្យចាកចេញ ហើយយកដីលក់ឲ្យឈ្មួញ ហេតុអ្វីក៏ពួកគេរួចខ្លួន? ខ្ញុំមិនយល់ទេច្បាប់ស្រុកខ្មែរ»។ លោក ជិន វន ឲ្យដឹងទៀតថា នៅក្នុងយុទ្ធនាការរបស់អាជ្ញាធរចម្រុះ ចាប់តាំងពីថ្ងៃចន្ទ រហូតមកដល់ម្សិលមិញ គេបានឈូសបំផ្លាញផ្ទះប្រជាពលរដ្ឋអស់ ៥០០ ខ្នង ដែលផ្ទះខ្លះ មានទំហំ៦ម៉ែត្រ គុណ ៧ ម៉ែត្រ។ អាជ្ញាធរ ចាប់ខ្លួនពលរដ្ឋម្នាក់ដែលជាជនពិការ និងកំពុងតែស្វែងរកតាមចាប់ខ្លួនពួកលោកបីនាក់ទៀត។
