មន្ត្រី​រដ្ឋាភិបាល ចាត់ទុក​ការសង្ឃឹម​ឈ្នះឆ្នោតរបស់គណបក្ស​សមរ​ង្ស៊ី និង នាំ​លោក​សមរង្ស៊ី ចូល​ស្រុក ជាការ​យល់ច្រឡំ​របស់​គណបក្សប្រឆាំង

ថ្ងៃទី 12 ឧសភា 2012

 ដោយ: រតនា

 CEN

ភ្នំពេញ: ​លោក សុន ឆ័យ ប្រធាន​ក្រុម​អ្នកតំណាងរាស្ត្រ របស់​គណបក្ស​សមរ​ង្ស៊ី និង​ជា​អ្នកតំណាងរាស្ត្រ​មណ្ឌល​ភ្នំពេញ បាន​អំពាវ​ដល់​សកម្មជន និង​អ្នកបោះឆ្នោត​ទាំងអស់ ឲ្យ​បោះឆ្នោត​គាំទ្រ​គណបក្ស​សមរង្ស៊ី ដើម្បី​ការពារ​ផលប្រយោជន៍​ជាតិ ឲ្យ​បាន​ទាន់ពេលវេលា កុំ​ឲ្យជាតិ​អន្តរាយ​ទាំងស្រុង​។ ម្យ៉ាង​បើ​គណបក្ស​សមរង្ស៊ី​ឈ្នះឆ្នោត នោះ​នឹង​នាំ​លោកប្រធាន​សមរង្ស៊ី​ចូល​ប្រទេស​វិញ​។ តែ​មន្ត្រី​រដ្ឋាភិបាល​ចាត់ទុកថា ជា​ការយល់ច្រលំ​។​
​លោក​សុន​ឆ័យ បាន​ថ្លែង​បែបនេះ កាលពី​ព្រឹក​ថ្ងៃទី​១២ ខែឧសភា ឆ្នាំ​២០១២ ក្នុង​សិក្ខាសាលា​ស្តីពី​គោលនយោបាយ​ការងារ ហើយ​ពិធី​នេះ បានធ្វើ​ឡើង នៅ​អតីត​ទីស្នាក់ការ​គណបក្ស​សមរង្ស៊ី ដែលជា​ផ្ទះ​របស់លោក គង់ គាំ ប្រធានស្តីទី​គណបក្ស​។​
​លោក សុន ឆ័យ បាន​លើកឡើងថា "​ដូច្នេះ ខ្ញុំ​សុំ​ឲ្យ​ការសម្រេចចិត្ត​របស់​ប្រជាពលរដ្ឋ​យើង​ហ្នឹង ក្លាយជា​លទ្ធផលត្រចះត្រចង់ ជួយ​ឲ្យ​គណបក្ស​យើង​ឈ្នះឆ្នោត​ឲ្យ​ច្រើន ដើម្បី​ការពារ​ប្រទេសជាតិ​យើង ឲ្យ​បាន​ឆាប់​ជួយ​លោក​ប្រធាន​យើង (​លោក​សមរង្ស៊ី​) ត្រឡប់មកវិញ​ឲ្យ​បាន​”​។​
​លោក សុន ឆ័យ បាន​បន្តទៀតថា អ្នកសង្កេតការ​នៃ​គណបក្ស​សមរង្ស៊ី ត្រូវតែ​ចូលរួម​ការពារ​សន្លឹក​ឆ្នោត​របស់ខ្លួន ព្រមទាំង​ហ៊ាន​ប្តឹងតវ៉ា ដោយ​យក​ទីក្រុង​ភ្នំពេញ​ជា​គំរូ និង​ជំរុញ​ការ​ការ​ទម្រង់​គណៈកម្មាធិកា​រ​ជាតិ​រៀបចំ​ការបោះឆ្នោត ដោយ​ចូលរួម​ជាមួយ​អន្តរជាតិ​។​
​លោក សុន ឆ័យ បាន​លើកឡើងថា សមាជិក​គណបក្ស​ត្រូវតែ​សកម្ម​ចូលរួម​ផ្សព្វផ្សាយ​នូវ​គោល នយោបាយ​គណបក្ស ចូលទៅ​ដល់ផ្ទះ​ប្រជាពលរដ្ឋ ទោះបីជា​នៅខាងមុខ​មាន​បិទ​ផ្លាក គណបក្ស​នយោបាយ​ណាក៏ដោយ គឺ​ចែក​ឲ្យ​បានជា​អតិបរមា ដោយ​ចាប់ផ្តើម​ពី​ក្រុងភ្នំពេញ​មុនគេ​។​

​លោក សុន ឆ័យ បាន​បញ្ជាក់ថា ដើម្បី​ឲ្យ​ប្រជាពលរដ្ឋ បាន​យល់​ពី​គោលនយោបាយ​បក្ស​ត្រូវតែផ្តើម​អនុវត្ត​នៅ​ទីក្រុង​ភ្នំពេញ​ឲ្យ​បាន​។ គឺ​យើង​ម្នាក់ៗ ត្រូវមាន​ឯកសារ​កាន់​នៅ​នឹង​ដៃ ទៅ​ហុច​ឲ្យ​គេពន្យល់គេ ប្រាប់​គេ​ថា ខ្ញុំ​ជា​បេក្ខជន​ក្រុមប្រឹក្សាឃុំ​សង្កាត់ កុំ​កំណាញ់​ខ្លួន វា​មិន​យ៉ាប់​ដូច​សម័យ ៩៣ ទេ (១៩៩៣) នៅ​សៀមរាប​ពេល​ឃោសនា គេ​យក​បេ​៤០ មក​តម្រង់​គម្រាម​បាញ់​ខ្ញុំ​”​។​
​សូម​រម្លឹកថា លោក​សមរង្ស៊ី បានសម្រេច​ចិត្ត ​និរទេស​ខ្លួន នៅក្រៅ​ប្រទេស បន្ទាប់ពី​លោក បាន​ដក​តម្រុយ​បង្គោល​ព្រំដែន​គោក កម្ពុជា​-​វៀតណាម នៅ​ស្រុក​ចន្ទ្រា ខេត្តស្វាយរៀង កាលពី​ចុងឆ្នាំ​២០០៩​។ ក្នុង​រឿងក្តី​នោះ តុលាការខេត្ត​ស្វាយរៀង និង​តុលាការ​នៅ​ភ្នំពេញ បាន​ផ្តន្ទាទោស​កំបាំងមុខ​លោក​សមរង្ស៊ី សរុប​ចំនួន​ជាង ១០ ឆ្នាំ​។
​ចំណែក​លោក ទិ​ត សុធា អ្នកនាំពាក្យ​នៃ​អង្គភាព​ព័ត៌មាន និង​ប្រតិកម្ម​រហ័ស នៃ​ទីស្តីការគណៈរដ្ឋមន្ត្រី នៅ​រសៀល​ថ្ងៃទី​១២ ខែឧសភា ឆ្នាំ​២០១២ បាន​មានប្រសាសន៍​ឆ្លើយតប​ថា ចំពោះ​ការជឿជាក់​របស់លោក​សុន​ឆ័យ ដោយ​អំពាវ​ទៅកាន់​ប្រជាពលរដ្ឋ​បោះឆ្នោត​ឲ្យ​គណបក្ស​របស់ខ្លួន ដែល​គាត់​(​សុន​ឆ័យ​) យល់ថា នឹង​ទទួលបាន​ជោគជ័យ ដើម្បី​នាំ​លោក​សមរង្ស៊ី វិល​មកវិញ គឺ​វា​មិនមែន​ស្ថិតនៅលើ​លទ្ធ​បោះឆ្នោត​ជោគជ័យ ឬ​បរាជ័យ​ទេ​។ រឿង​លោក​សមរង្ស៊ី​គឺ​វា​ស្ថិតនៅលើ​ប្រព័ន្ធ​ច្បាប់ និង​ប្រព័ន្ធយុត្តិធម៌ ដែល​ត្រូវតែ​យកមកអនុវត្ត​។ មិនអាច​យកមក​ឡូកឡំ​ជាមួយគ្នា​បានទេ​។​
​លោក ទិ​ត សុធា បាន​បន្តថា មោទនភាព​របស់លោក​សុន​ឆ័យ ដែលថា​នឹង​ទទួលបាន​ជោគជ័យ ក្នុងការ​បោះឆ្នោតក្រុមប្រឹក្សា​ឃុំ​សង្កាត់ ក៏ដូចជា ការបោះឆ្នោត​ជ្រើសតាំង​អ្នកតំណាងរាស្ត្រ​នោះ គឺ​តាមរយៈ​លទ្ធផល​នៅពេល​ខាងមុខ នឹង​កាច់​បំបាក់​មោទនភាព​របស់​គណបក្សប្រឆាំង ពីព្រោះ​ប្រជាពលរដ្ឋ បាន​ផ្តោត​ការគាំទ្រ​លើ​ការអភិវឌ្ឍន៍​របស់​រា​ជ​រដ្ឋាភិបាល​និង​គណបក្ស​ប្រជាជន​កម្ពុជា​។​
​លោក​បន្តទៀតថា ជាពិសេស​តាមរយៈ​ការស្ទង់មតិ​របស់​វិទ្យាស្ថាន IRI បង្ហាញ​លទ្ធផល​ថា មាន​យុវជន ក៏​ដូច​ប្រជាពលរដ្ឋ​ភាគច្រើន បាន​គាំទ្រ​រាជរដ្ឋាភិបាលថា​ដើរ​លើផ្លូវ​ត្រូវ ដែលជា​សញ្ញា​នៃ​ការទទួល​ជោគជ័យ​នៅក្នុង​ការបោះឆ្នោត​ក្រុមប្រឹក្សា​ឃុំ​សង្កាត់ និង​ការបោះឆ្នោត​តំណាងរាស្ត្រ នៅពេល​ខាងមុខ​ដែរ​។​
​សូម​បន្ថែមថា ក្នុងពេល​កន្លងមក លោក​សមរង្ស៊ី ក៏​ធ្លាប់​បានធ្វើ​យុទ្ធនាការ ដើម្បី​ស្វែងរក​ការគាំទ្រ​ពី​បរទេស និង​ម្ចាស់ជំនួយ​ឲ្យ​ដាក់​គំនាប​លើ​រដ្ឋាភិបាល​កម្ពុជា ដើម្បី​ឲ្យ​លោក​បាន​វិល​មក​ប្រឡូក​ក្នុង​ឆាកនយោបាយ​ដោយផ្ទាល់​នៅក្នុង​ប្រទេស​វិញ ក៏ប៉ុន្តែ​ចាប់តាំងពី​ឆ្នាំ​២០០៩ មកដល់ពេលនេះ ហាក់ដូចជា មិនមាន​ឥទ្ធិពល​អ្វី​ ​សោះ​។ ដូច្នេះ​ការបោះឆ្នោត​ឃុំ​សង្កាត់ នា​ថ្ងៃទី​៣​មិថុនា ឆ្នាំ​២០១២ និង​រាប់ទាំង​ការបោះឆ្នោតជាតិ នា​ឆ្នាំ​២០១៣ គឺ​លោក​សមរង្ស៊ី នឹងចូលរួម​តាមរយៈ​វិ​ដេ​អូ​ខន​ហ្វឺ​រេ​ន ដើម្បី​ឃោសនា​រក​សំឡេងឆ្នោត​៕